މިދިޔަ އަހަރު ރާއްޖެ އައި ފަތުރުވެރިންގެ ރިކޯޑް މި އަހަރު މުގުރާލައިފި
މިދިޔަ އަހަރު ރާއްޖެ އައި ފަތުރުވެރިންގެ ރިކޯޑް މި އަހަރު މުގުރާލައިފި އެވެ.
މޯލްޑިވްސް އިމިގްރޭޝަނުން 'އެކްސް' ގައި ކުރި ޕޯސްޓެއްގައި ބުނީ މިއަދާ ހަމައަށް ރާއްޖެއަށް 1.88 މިލިއަން ފަތުރުވެރިން ރާއްޖެ އައިސްފައިވާ ކަމަށެވެ.
އެއީ މިދިޔަ އަހަރު ރާއްޖެ އައި ފަތުރުވެރިންނަށް ވުރެ ވެސް އިތުރު އަދަދެއް ކަމަށް އިމިގްރޭޝަނުން ބުންޏެވެ.
މިދިޔަ އަހަރު ރާއްޖެ އައީ 1.87 މިލިއަން ފަތުރުވެރިން ނެވެ.
ކުރިއަށް އޮތީ ހޮލިޑޭ ސީޒަންއާ ކަމަށްވާތީ ރާއްޖެއަަށް މި އަހަރުގެ ބާކީ އޮތް ދުވަސްތަކުގައި އަންނަ ފަތުރުވެރިންގެ އަދަދުވެސް ވަރަށް ބޮޑަށް އިތުރުވާނެ ކަމަށް މިހާރު ވަނީ ބެލެވިފަ އެވެ.
ޓޫރިޒަމް މިނިސްޓަރު އިބްރާހިމް ފައިސަލް މިދިޔަ ސެޕްޓެމްބަރު މަހު ވިދާޅުވީ މި އަހަރު ދެ މިލިއަން ފަތުރުވެރިން އަންނާނެ ކަމަށް ބެލެވޭ ކަމަށެވެ.
މި އަހަރުގެ މިހާތަނަށް އެންމެ ގިނަ ފަތުރުވެރިން އައިސްފައިވަނީ ޗައިނާއިން އިން އެވެ. ޗައިނާއިން 254،000 އަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވެ އެވެ. ދެވަނައިގައި އޮތީ ރަޝިއާ އެވެ. އެއީ ދެ ލައްކައަށް ވުރެ ގިނަ ފަތުރުވެރިންނާ އެކު އެވެ.
ތިންވަނައިގައި އޮތީ އިނގިރޭސިވިލާތެވެ. އަދި ހަތަރު ވަނައިގައި ޖަރުމަނެވެ.
Ads by STO
