ޗައިނާގެ ޑްރޯން އުފައްދާ ދެ ކުންފުންޏެއްގެ އައު އުފެއްދުންތައް އެމެރިކާގައި މަނާކުރަން އުޅެނީ
އެމެރިކާގެ ކޮންގްރެސްއިން ޗައިނާގެ ޑްރޯން އުފައްދާ ދެ ކުންފުންޏެއްގެ އައު އުފެއްދުންތައް އެމެރިކާގައި ވިއްކުން މަނާކުރުމަށް ހުށމަށް ހުށަހަޅާފައިވާ ބިލެއް މިހާރު ވަނީ ތައްޔާރުކޮށްފައެވެ. މި ބިލު ފާސްވެއްޖެނަމަ، ޗައިނާގެ ޑީޖޭއައި (DJI) އަދި އޯތެލް (Autel) ކުންފުނިތަކުގެ އައު ޑްރޯންތައް އެމެރިކާގެ ބާޒާރަށް ނެރުން މަނާވެގެންދާނެއެވެ.
ރޮއިޓަރސް ނިއުސް އޭޖެންސީން ރިޕޯޓުކޮށްފައިވާ ގޮތުގައި، މި ބިލު ހުށަހަޅާފައިވަނީ އެމެރިކާގެ ޤައުމީ ސަލާމަތަށް ނުރައްކާވެދާނެ ކަމަށް ބެލެވޭތީއެވެ. ބިލުގައި ބަޔާންކޮށްފައިވާ ގޮތުން، މި ދެ ކުންފުނީގެ ޑްރޯންތަކުން ނަގާ މަޢުލޫމާތު ޗައިނާ ސަރުކާރަށް ލިބިދާނެ ކަމަށް ބެލެވޭތީ، އެމެރިކާގެ ސަލާމަތީ ކަންކަމަށް ނޭދެވޭ އަސަރުކޮށްފާނެ ކަމަށް ވަނީ ފާހަގަކޮށްފައެވެ.
މި ބިލު ފާސްވެއްޖެނަމަ، އެމެރިކާގެ ފެޑެރަލް ކޮމިއުނިކޭޝަންސް ކޮމިޝަނުން (އެފްސީސީ) މި ދެ ކުންފުނީގެ އައު އުފެއްދުންތަކަށް ހުއްދަ ދިނުން ހުއްޓާލަންޖެހޭނެއެވެ. ނަމަވެސް، މިހާރު ބާޒާރުގައި ވިއްކަމުންދާ ޑްރޯންތަކަށް މި ގާނޫނުގެ އަސަރެއް ނުކުރާނެއެވެ.
ޑީޖޭއައި އަދި އޯތެލް ކުންފުނިތަކުން މި މައްސަލައާ ގުޅޭގޮތުން އަދި ރަސްމީ ބަޔާނެއް ނެރެފައެއް ނުވެއެވެ. އެހެންނަމަވެސް، މީގެ ކުރިން ވެސް ޑީޖޭއައި އިން ވަނީ އެ ކުންފުނީގެ އުފެއްދުންތަކުން ނަގާ މަޢުލޫމާތު ޗައިނާ ސަރުކާރާ ހިއްސާކުރާ ކަމުގެ ތުހުމަތުތައް ދޮގުކޮށްފައެވެ.
މި ބިލު ފާސްވުމުން އެމެރިކާގެ ޑްރޯން މާކެޓަށް ބޮޑު ބަދަލެއް އަންނާނެ ކަމަށް ބެލެވެއެވެ. ސަބަބަކީ ޑީޖޭއައި އަކީ އެމެރިކާގެ ޑްރޯން ބާޒާރުގެ ބޮޑު ބައެއް ހިއްސާކުރާ ކުންފުންޏެއް ކަމަށްވާތީއެވެ. މި ބިލާ ގުޅޭގޮތުން އިތުރު މަޝްވަރާތައް ކުރިއަށްދާނެ ކަމަށް ބެލެވެއެވެ.
