މި ދުވަސްވަރު ވިޔަފާރިތަކަށް ހުރަސް އެޅުމަކީ ހެދޭ އެންމެ ބޮޑު ގޯސް: ސައީދު
ރާއްޖޭގެ އިގްތިސާދު އަރިއަޅާލާފައިވާ މި ދުވަސްވަރު ވިޔަފާރިތަކަށް ހުރަސް އެޅުމަކީ ސަރުކާރަށާއި މަޖިލީހަށް ހެދޭނެ އެންމެ ބޮޑު ގޯސް ކަމަށް ޕީއެންސީގެ ނައިބް ރައީސް އަދި މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވީ ކޮވިޑް-19 ގެ ސަބަބުން ދުނިޔެ އާއި ރާއްޖޭގެ އިގްތިސާދު ދަށްވެފައިވާއިރު، މިއީ މަތީ އާމްދަނީ ލިބޭ ފަރާތްތަކުގެ އަތުން ދައުލަތަށް ޓެކްސްގެ ގޮތުގައި ނަގާ ފައިސާގެ ބޭނުންތެރިކަން އެންމެ ބޮޑު ވަގުތު ކަމަށް މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވުމާ ގުޅިގެންނެވެ.
ސައީދު ކުރެއްވި ޓްވީޓެއްގައި ވިދާޅުވީ މިހާބޮޑަށް ރާއްޖޭގެ އިޤްތިސާދު އަރިއަޅާލި ވަގުތު، ކަށިހިތްވަރުނެރެ، ވިޔަފާރިތަކަށް ދަތިވާނެހާ ކަންކަން ކޮށް، ހުރަސް އެޅުމަކީ، މަޖިލިހާއި ސަރުކާރަށް ހެދޭނެ އެންމެބޮޑު ގޯސް ކަމަށެވެ.
"މިކަމުން ގެއްލިދާނީ އެތައްހާސް ވަޒީފާ. ނިކަމެތި ވާނީ އެތައް އާޢިލާތަކެއް" ސައީދު ވިދާޅުވިއެވެ.
މިހާބޮޑަށް ރާއްޖޭގެ އިޤްތިސާދު އަރިއަޅާލި ވަގުތު، ކަށިހިތްވަރުނެރެ، ވިޔަފާރިތަކަށް ދަތިވާނެހާ ކަންކަން ކޮށް، ހުރަސް އެޅުމަކީ، މަޖިލިހާއި ސަރުކާރަށް ހެދޭނެ އެންމެބޮޑު ގޯސް. މިކަމުން ގެއްލިދާނީ އެތައް ހާސްވަޒީފާ. ނިކަމެތި ވާނީ އެތައް އާޢިލާތަކެއް. https://t.co/0oY6KzCEEJ
— Mohamed Saeed (@em_saeed) March 30, 2020
މިއަދު އޮންލައިންކޮށް ބޭއްވި މަޖިލީހުގެ ޖަލްސާގައި ވާހަކަ ދައްކަވަމުން އީވާ ވިދާޅުވީ މިއީ އިންކަމް ޓެކްސް ނަގަން ފަށަންވީ ވަގުތު ކަމަށާއި ފުދުންތެރިކަން ހުރި މީހާ ދައުލަތަށް އެއްޗެއް ދޭންވީ ވަގުތު ކަމަށެވެ. އަދި އިންކަމް ޓެކްސްއަކީ ގެއަށް ގެންނަ ފައިސާ އިން ނަގާ އެއްޗެއް ކަމަށާއި މަހަކު 60،000 ރުފިޔާ ގެއަށް ގެނެވޭ ހާލަތުގައި ހުރި މީހާ ދައުލަތަށް އެ ޓެކްސް ދައްކަން ޖެހޭ ވަގުތު ޖެހިއްޖެ ކަމަށެވެ.
