މި އަހަރަށް ކަނޑައެޅި ޓޫރިސްޓް އެރައިވަލް ޓާގެޓަށް ވާސިލުވާން ބާކީ 80،000
މި އަހަރު ރާއްޖެއަށް ދެ މިލިއަން ފަތުރުވެރިން ގެނައުމަށް ސަރުކާރުން ކަނޑައެޅި 'ޓޫރިސްޓް އެރައިވަލް' އަމާޒަށް ވާސިލުވާން ބާކީ 80،000 އަށް ވެއްޖެ އެވެ.
ޓޫރިޒަމް މިނިސްޓްރީން އެންމެފަހުން އާންމުކުރި ތަފާސް ހިސާބުތައް ދައްކާ ގޮތުން ހޮނިހިރު ދުވަހުގެ ނިޔަލަށް ރާއްޖެއަށް ޖުމްލަ 1،920،119 ފަތުރުވެރިން ވަނީ ޒިޔާރަތްކޮށްފަ އެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 8.9 އިންސައްތަ އިތުރު އަދަދެކެވެ. މިދިޔަ އަހަރުގެ އެ މުއްދަތުގައި އައިސްފައި ވަނީ 1،763،710 ފަތުރުވެރިންނެވެ.
ހިނގަމުންދާ މަހުގެ ފުރަތަމަ 14 ދުވަހުގެ ތެރޭގައި 82،484 ފަތުރުވެރިން ޒިޔާރަތްކުރި އެވެ. އަހަރުގެ މިހާތަނަށް އެވްރެޖްކޮށް ދުވާލަކު 5،502 ފަތުރުވެރިން އާދެ އެވެ. އެވްރެޖްކޮށް 7.7 ދުވަސް ރާއްޖޭގައި ހޭދަކުރެ އެވެ.
ތަފާސް ހިސާބުތައް ދައްކާ ގޮތުން މި މަހުގެ ބާކީ އޮތް 15 ދުވަހުގެ ތެރޭގައި މި އަހަރަށް ކަނޑައަޅާފައިވާ 'ޓޫރިސްޓް އެރައިވަލް' އަމާޒަށް ވާސިލުވާން ބޭނުންވަނީ 80،000 ފަތުރުވެރިންނެވެ. އެވްރެޖްކޮށް ދުވާލަކު އަންނަ ފަތުރުވެެރިންގެ އަދަދަށް ބަލާއިރު، މި މަހުގެ ފަހުކޮޅު ދެ މިލިއަން ފަތުރުވެރިންގެ އަމާޒަށް ވާސިލުވާނެ ކަަމަށް ބެލެވެ އެވެ.
އެންމެ ގިނަ އަދަދަކަށް ފަތުރުވެރިން އައި ގައުމުތަކަކީ:
- ޗައިނާ - 257،794 ފަތުރުވެރިން (13.4 އިންސައްތަ)
- ރަޝިއާ - 212،685 ފަތުރުވެރިން (11.1 އިންސައްތަ)
- އިނގިރޭސިވިލާތް - 168،460 ފަތުރުވެރިން (8.8 އިންސައްތަ)
- ޖަރުމަނުވިލާތް - 148،402 ފަތުރުވެރިން (7.7 އިންސައްތަ)
- އިޓަލީ - 129،513 ފަތުރުވެރިން (6.3 އިންސައްތަ)
މި ގައުމުތަކުގެ އިތުރުން ދެން އެންމެ ގިނަ އަދަދަކަށް ފަތުރުވެރިން އައީ އިންޑިއާ، އެމެރިކާ، ފްރާންސް، ސްޕެއިން އަދި ސްވިޒަލޭންޑުންނެވެ.
ފަތުރުވެރިންނަށް ހިދުމަތް ދިނުމަށް ތަނެއް ދަނީ ހިންގަމުންނެވެ. އޭގެ ތެރޭގައި 171 ރިސޯޓާއި 15 ހޮޓަލާއި 155 ސަފާރީ އަދި 920 ގެސްޓް ހައުސް ހިމެނެ އެވެ. އެ ތަންތަނުން ޖުމްލަ 63،092 އެނދު އޮޕަރޭޓްކުރެ އެވެ.
