ސްކޫލް ކުދިން ހިމެނޭ ހަރަކާތެއް ބާއްވާ ނަމަ މިނިސްޓްރީގެ ހުއްދަ ހޯދަން އެދިއްޖެ
މުއައްސަސާތަކުން ދަރިވަރުން ހިމަނައިގެން ހަރަކާތްތައް ކުރިއަށް ގެންދަން ބޭނުންވާ ނަމަ، ދިރާސީ އަހަރު ފެށުމުގެ ކުރިން އެޑިއުކޭޝަން މިނިސްޓްރީން ހުއްދަ ނަގަން އެދިއްޖެ އެވެ.
އެޑިއުކޭޝަން މިނިސްޓްރީން ވަނީ އިއްޔެގެ ވަގުތެއްގައި ސަރުކާރުގެ ހުރިހާ އިދާރާއަކާއި ސިޓީ އަދި ލޯކަލް ކައުންސިލްތަކާއި ކްލަބް ޖަމިއްޔާ އަދި ޖަމާއަތްތަކަށް ސާކިއުލާއެއް ފޮނުވާފަ އެވެ.
އެ ސާކިއުލާގައި ބުނީ، ކޮންމެ އަހަރެއްގެ ދިރާސީ އަހަރުގެ ކަލަންޑަރާ އެއްގޮތަށް އެކްޓިވިޓީ ކަލަންޑަރު ވެސް މިނިސްޓްރީން ތައްޔާރުކުރަމުންދާ ކަމަށެވެ. ނަމަވެސް، އެކްޓިވިޓީ ކަލަންޑަރުގައި ނުހިމަނާ އަދި މިނިސްޓްރީއާ މަޝްވަރާ ނުކޮށް އެކި ހަރަކާތްތައް ކުރިއަށް ގެންދާކަން ފާހަގަ ކުރެވިފައިވާ ކަމަށެވެ.
އެ ސާކިއުލާގައިވާ ގޮތުން އެފަދަ ހަރަކާތްތައް ގެންދިއުމުގެ ސަބަބުން ދަރިވަރުންނާއި މުދައްރިސުންގެ ޖިސްމާނީ އަދި ނަފްސާނީ ދުޅަހެޔޮ ކަމަށް ނުރަނގަޅު އަސަރުކުރާ ކަމަށެވެ. އަދި ސްކޫލްތަކުން ދުރާލާ ރާވާފައިވާ ކަންކަމަށް ބުރޫ އަރާ، ދަރިވަރުންގެ އުނގެނުމަށް ނޭދެވޭ އަސަރު ކުރާ ކަމަށާއި ކުއްލިއަކަށް ރާވާ ހަރަކާތްތަކުގެ ސަބަބުން ބެލެނިވެރިންނަށް މާލީ ބުރައަކަށްވާ ކަމަށް ބުނެފައިވެ އެވެ.
އެހެންވެ، މިނިސްޓްރީން ބޭނުންވަނީ ދައުލަތުގެ އިދާރާތަކާއި ކްލަބް، ޖަމިއްޔާތަކުން އިންތިޒާމުކުރާ ހަރަކާތެއްގައި ސްކޫލްތަކުގެ ކުދިން ބައިވެރިކުރާ ނަމަ، ދިރާސީ އާ އަހަރު ފެށުމުގެ ކުރިން ހުއްދަ ނެގުމަށެވެ.
ސްކޫލްތަކުގެ އެކްޓިވިޓީ ކަލަންޑަރުގައި އެ ހަރަކާތެއް ހިމަނާފައި އޮންނަން ވާނެ ކަމަށް އެޑިއުކޭޝަން މިނިސްޓްރީން ބުންޏެވެ. އަދި ބުނީ، އެފަދަ ހަރަކާތްތައް ރާވަން ވާނީ ދަރިވަރުންގެ އުނގެނުމުގެ ވަގުތު ނުގެއްލޭ ފަދަ ގޮތަކަށް ކަމަށެވެ.
Ads by STO
