މުޑުދާރު ތަނެއްގައި ފޯއް ތައްޔާރުކުރަމުން ދިޔަ ބިދޭސީއެއް އިމިގްރޭޝަންގެ ހައްޔަރަށް
މާލޭގައި، ސާފުތާހިރުކަން ކުޑަތަނެއްގައި "ފޮނި ފޯއް" ތައްޔާރު ކުރަމުންދިޔަ ބިދޭސީއެއް މޯލްޑިވްސް އިމިގްރޭޝަނުން ހައްޔަރު ކޮށްފި އެވެ.
އިމިގްރޭޝަނުން 'އެކްސް' ގައި މިއަދު ކުރި ޕޯސްޓެއްގައި ބުނީ، ރޭ އިމިގްރޭޝަންގެ ޓާސްކްފޯހުން ހެންވޭރުގައި ހުރި ގެއެއް ބަލާ ފާސްކޮށްފައި ކަމަށެވެ. ލިބުނު ރިޕޯޓަކާއި ގުޅިގެން ބަލާ ފާސްކޮށްފައިވާ ތަނަކީ އާއްމު މިންގަނޑުތަކާ ހިލާފަ ދިވެހި އުފެއްދުންތައް ވިޔަފާރީގެ ބޭނުމަށް ތައްޔާރު ކުރަމުންދާ ތަނެއް ކަމަށް އިމިގްރޭޝަނުން ބުންޏެވެ.
އިމިގްރޭޝަނުން ހިއްސާކުރި ފޮޓޯތަކުން ފެންނަނީ ސާފުތާހިރުކަން ކުޑަ ތަނެއްގައި ފޮނި ފޯއް ތައްޔާރު ކުރާ މަންޒަރެވެ. "ފޮނި ފޯއް" ޕެކެޓްތަކުގެ ލޭބަލްތަކާއި، އެ ތަނުގެ ހާލަތު ދައްކުވައިދޭ ފޮޓޯތައް އިމިގްރޭޝަނުން ހިއްސާ ކޮށްފައިވެ އެވެ.
އިމިގްރޭޝަނުން ބުނީ، އެތަނުން އާއްމުކޮށް ފިހާރަތަކުން ލިބެން ހުންނަ ގިނަ ބާވަތްތަކުގެ ކާބޯތަކެތި ފެނިފައިވާ ކަމަށެވެ. އަދި ގަވާއިދާ ހިލާފަށް އެ މަސައްކަތް ކުރަމުން ދިޔަ ބިދޭސީ މީހާ މިހާރު އިމިގްރޭޝަނުގެ ބެލުމުގެ ދަށަށް ގެންގޮސްފައިވާ ކަމަށް ބުންޏެވެ.
ރާއްޖޭގައި ގަވާއިދާ ހިލާފަ އުޅެމުންދާ ބިދޭސީންގެ މައްސަލަ ހައްލުކުރުމުގެ ގޮތުން އިމިގްރޭޝަނުން އަންނަނީ އޮޕަރޭޝަންތަކެއް ހިންގަމުންނެވެ. އެ އޮޕަރޭޝަންތަކުގެ ތެރެއިން ސާފުތާހިރުކަން ކުޑަކޮށް ކާބޯތަކެތި ވިއްކަމުންދާ ތަންތަން ބަލާ ފާސްކޮށް، އެފަދަ ފަރާތްތަކަށް ވެސް ފިޔަވަޅު އަޅާފައިވެ އެވެ.
ޚިލާފަށް
މިފޯއްތައްކައިގެން ދިވެހީން ގޮސް މުއިއްޒުއަށް ވޯޓއެޅީ!