އަލިފާނުގެ ހާދިސާ: 22 މީހުންނަށް ވަގުތީ ބޯހިޔާވަހިކަމުގެ މުއްދަތު އިތުރުކޮށްދީފި
މީގެ ހަފުތާއެއް ކުރިން ގްރީން ބިލްޑިންގައި ހިނގި އަލިފާނުގެ ހާދިސާ އާ ގުޅިގެން ވަގުތީ ހިޔާތަކަށް ބަދަލުކުރި މީހުންގެ ތެރެއިން 22 މީހަކަށް ދިން ބޯހިޔާވަހިކަމުގެ މުއްދަތު އިތުރުކޮށްދީފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.
ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އާއި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އަދި ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ ހިންގަމުން އައި ގްރީން ބިލްޑިންގައި އަލިފާނުގެ ހާދިސާއެއް ހިނގާފައި ވަނީ މިދިޔަ ބުރާސްފަތި ދުވަހުގެ ހެނދުނު އެވެ.
އެ ހާދިސާ އާ ގުޅިގެން ސަލާމަތާއި ރައްކާތެރިކަމަށް ބަލައި އެ ސަރަހައްދުގައި ހުރި 3 އިމާރާތެއްގެ 7 ގޭބީސީއަކުން 29 މީހަކު ވަގުތީ ހިޔާތަކަށް ބަދަލުކުރި އެވެ. އެއީ 15 ފިރެހެނުންނާއި 14 އަންހެނުންނެވެ.
އެންޑީއެމްއޭއިން މިއަދު "އެކްސް" ގައި ކުރި ޕޯސްޓެއްގައި ބުނީ ގްރީން ބިލްޑިންގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ވަގުތީ ހިޔާތަކަށް ބަދަލުކުރެވުނު 29 މީހުންގެ ތެރެއިން 5 މީހަކު އެ މީހުންގެ އަމިއްލަ ގެތަކަށް ބަދަލުވެފައިވާ ކަމަށެވެ.
"ބާކީ ތިބި 22 މީހުންނަށް 5 ދުވަސް ވަގުތީ ބޯހިޔާވަހިކަން ވަނީ އިތުރުކުރެވިފައި،" އެންޑީއެމްއޭއިން ބުންޏެވެ.
އެންޑީއެމްއޭގެ ޗީފް އެގްޒެކެޓިވް ހިސާން ހަސަން "ދެން" އަށް ވިދާޅުވެފައިވާ ގޮތުގައި ވަގުތީ ގޮތުން އެ މީހުން ގެސްޓް ހައުސްތަކަށް ބަދަލުކޮށްފައި ވަނީ ދުމުގެ އަސަރު ހުރުމުގެ ސަބަބުން އެ ގެތަކުގައި ދިރިނޫޅެވޭނެ ކަމަށް ބެލެވޭތީ އާއި އަލިފާން ނިންވަން ފެން ޖެހުމުގެ ތެރެއިން އިމާރާތްތަކުގެ ބޭރު ބިއްލޫރިތައް ތަޅައިގެން ގޮސްފައިވާތީ ކަމުގަ އެވެ.
ވަގުތީ ހިޔާތަކަށް މީހުން ބަދަލުކުރީ ފަސް ދުވަހު މުއްދަތަކަށެވެ. އެއީ އެ މީހުން އަނބުރާ ގެތައް ސާފުކޮށް، އަމިއްލައަށް ބަދަލުވާ ގޮތަށެވެ. ހާދިސާގައި ބިއްލޫރިތައް ތަޅައިގެންދިޔަ ތަންތަން ސާފުކޮށްފައިވާ ކަމަށާއި ވަގުތީ ގޮތުން ފިލައި ޖަހައި ބަންދު ކުރުމަށް ފަހު ބޭނުން ކުރަން އިރުޝާދުދީފައިވާނެ ކަމަށް ހިސާން ވިދާޅުވި އެވެ.
ލިބުނު ގެއްލުންތައް ބެލުމަށް ފަހު ބަދަލުދޭނެ ކަމަށާއި އިމާރާތްތަކަށް ބޮޑެތި ގެއްލުންތަކެއް ލިބިފައި ނުވާކަން އޭނާ ފާހަގަކުރެއްވި އެވެ.
ތިން މިނިސްޓްރީ ހިންގަމުން އައި އިމާރާތްތަކަށާއި އެ ކޮށީގައި ހިންގަމުން އައި މާލެ ސިޓީ ކައުންސިލުގެ ލޭންޑް ބިލްޑިން އެންޑް ވައިޓަލް ސާވިސަސް ޑިޕާޓްމަންޓަށް ލިބުނު ގެއްލުންތަކާ އެކު މިނިސްޓްރީތަކުން ދެމުން އައި ހިދުމަތްތައް ވަނީ ދަރުބާރުގެއަށް ބަދަލުކޮށްފަ އެވެ. އަދި ވައިޓަލް ރަޖިސްޓްރީގެ ހިދުމަތް ދެމުން އަންނަނީ ހުޅުމާލޭގައި ހުންނަ ސިޓީ ކައުންސިލުގެ އޮފީހުންނެވެ.
