ބަލޮޗިސްތާނުގައި 46 ވަނަ ޕޯލިއޯ ކޭސް ފެނުމުން ޞިއްޙީ ކަންބޮޑުވުން އިތުރުވެއްޖެ
ޕާކިސްތާނުގެ ބަލޮޗިސްތާން ސޫބާގައި މިއަހަރުގެ 46 ވަނަ ޕޯލިއޯ ކޭސް ފެނިފައިވާކަމަށް އެ ޤައުމުގެ ޞިއްޙީ އިދާރާތަކުން ހާމަކޮށްފިއެވެ. މިއީ ޕާކިސްތާނުގެ ޞިއްޙީ ދާއިރާއަށް ބޮޑު ގޮންޖެހުމަކަށް ވެފައިވާ ކަމެއްކަމަށް ބެލެވެއެވެ.
ބަލޮޗިސްތާނުގެ ކްވެޓާ ސަރަޙައްދުގައި ދިރިއުޅޭ 3 އަހަރުގެ ކުޑަކުއްޖަކަށް ޕޯލިއޯ ޖެހިފައިވާކަން ފާހަގަކުރެވުނީ ޞިއްޙީ އިދާރާތަކުން ކުރި ތަޙުލީލުތަކަކުންނެވެ. މިކުއްޖާއަކީ ޕޯލިއޯ ވެކްސިން ދީފައިވާ ކުއްޖެއްް ނޫންކަން ވެސް ފާހަގަކުރެވިފައިވެއެވެ.
ޕާކިސްތާނުގެ ޤޤައުމީ ޞިއްޙަތު އިންސްޓިޓިއުޓުން ބުނާ ގޮތުގައި، މިއަހަރު ފެނިފައިވާ 46 ޕޯލިއޯ ކޭސްގެ ތެރެއިން 33 ކޭސް ވަނީ ބަލޮޗިސްތާނުގައި ފެނިފައެވެ. މީގެ އިތުރުން، ޚައިބަރ ޕަޚްތުންޚްވާގައި 8 ކޭސްއާއި، ސިންދު ސޫބާގައި 5 ކޭސް ވަނީ ފެނިފައެވެ.
ޕޯލިއޯ ފެތުރުން ހުއްޓުވުމަށް ޕާކިސްތާނު ސަރުކާރުން ގިނަ މަސައްކަތްތަކެއް ކުރަމުން ދިޔަ ނ ނަމަވެސް، މިފަދަ ކޭސްތައް އިތުރުވަމުން ދިއުމަކީ ބޮޑު ކަންބޮޑުވުމެއް ކަމުގައި ޞިއްޙީ މާހިރުން ފާހަގަކުރެއެވެ. ޚާއްޞަކޮށް ވެކްސިން ނުދޭ ކުދިންގެ އަދަދު ގިނަވުމަކީ މި ބަލި ފެތުރުމަށް މަގުފަހިވާ ކަމެއް ކަމަށް ވެސް އެ ފަރާތްތަކުން ބުނެއެވެ.
ޕޯލިއޯ ނައްތާލުމަށް ޕާކިސްތާނު ސަރުކާރުން ކުރަމުންދާ މަސައްކަތްތައް އިތުރަށް ހަރުދަނާކުރުމަށާއި، ވެކްސިނޭޝަން ޕްރޮގްރާމްތައް ފުޅާކުރުމަށް ބައިނަލްއަޤްވާމީ ޞިއްޙީ ޖަމްޢިއްޔާތަކުން ގޮވާލާފައިވެއެވެ. އަދި މި މައްސަލައަށް އަވަސް ޙައްލެއް ހޯދުމަށް ޕާކިސްތާނު ސަރުކާރުން މަސައްކަތްކުރަމުންދާ ކަމަށް ވެސް ބުނެފައިވެއެވެ.
