ވިޔަފާރި ކުންފުނިތަކަށް ހާއްސަކޮށްގެން ދެކުނު އޭޝިއާގެ ސަރަހައްދުގައި ބާއްވާ އެންމެ ބޮޑު އެއް އެވޯޑު ކަމަށްވާ "ސައުުތު އޭޝިއަން ބިޒްނަސް އެކްސެލެންސް އެވޯޑްސް 2024" ގައި މުހިންމު ދެ އެވޯޑެއް އެމްޕީއެލްއަށް ލިބިއްޖެ އެވެ.
އިންޑިއާގެ ނިއު ދިއްލީގައި މި މަހުގެ 20 ވަނަ ދުވަހު އޮތް ސައުތު އޭޝިއަން ބިޒްނަސް އެކްސެލަސް އެވޯޑްސް ދިނުމުގެ ހަފްލާގައި އެމްޕީއެލްއަށް ލިބުނީ "އިނޮވޭޓިވް ލާރނިންގ އެންޑް އޯގަނައިޒޭޝަނަލް ޑިވެލޮޕްމަންޓް ޕްރެކްޓިސް" އެވޯޑާއި "އިނޮވޭޓިވް ބިޒްނަސް ޓްރާންސްފޯމޭޝަން" އެވޯޑް އެވެ.
މިއީ "އިނޮވޭޓިވް ބިޒްނަސް ޓްރާންސްފޯމޭޝަން" އެވޯޑް އެމްޕީއެލްގެ ތާރީހުގައި ވެސް އެ ކުންފުންޏަށް ލިބުނު ފުރަތަމަ ފަހަރެވެ. އެ އެވޯޑް އެ ކުންފުންޏަށް ލިބުނީ ފާއިތުވި އަހަރެއްހާ ދުވަސް ތެރޭގައި ވިޔަފާރި ފުޅާކުުރުމާއި އާމްދަނީ އިތުރު ކުރުމަށް ކުންފުނިން ކޮށްފައިވާ ގިނަ މަސައްކަތްތައް ފާހަގަކުރުމުގެ ގޮތުން ކަމަށް އެމްޕީއެލްއިން ބުނެފައި ވެއެވެ.
އެމްޕީއެލްއިން ވަނީ އެ ކުންފުނީގެ ވިޔަފާރި ފުޅާކުރުމުގެ ގޮތުން ރާއްޖޭގައި މުޅިން އާ ދާއިރާއެެއްގެ ގޮތުގައި ސީޓުއެއަރ ކާގޯގެ ހިދުމަތް ފެށުމާއި އުތުރުގެ މެރިޓައިމް ސާވިސްގެ ހިދުމަތް ތައާރަފްކޮށްފަ އެވެ.
"އިނޮވޭޓިވް ލާރނިންގ އެންޑް އޯގަނައިޒޭޝަނަލް ޑިވެލޮޕްމަންޓް ޕްރެކްޓިސް" އެމްޕީއެލްއިން ލިބުނީ ކުންފުނީގެ މުވައްޒަފުންނަށް ތައުލީމާއި ތަމްރީނުތައް ދިނުމަށް ކުރަމުންދާ ގިނަގުނަ މަސައްކަތްތައް ފާހަަކޮށްކަމަށް އެމްޕީއެލްއިން ބުނެފައި ވެއެވެ.
އެމްޕީއެލްއަކީ މުވައްޒަފުންނަށް ތައުލީމާއި ތަމްރީނުގެ ފުރުސަތުތައް ތަނަވަސް ކުރުމަށް އެމްޕީއެލްގެ ލާރނިންގ ޑިޕާޓްމެންޓް މެދުވެރިކޮށް ކޮންމެ އަހަރަކުވެސް ގިނަ ކޯސްތަކާއި ތަމްރީނުތައް ހިންގުމާއި އަދި އެޕްރެންޓިސް ޕްރޮގްރާމްތަކާއި އިންޓާރންޝިޕް ޕްރޮގްރާމްތައް ހިންގަމުންދާ ކުންފުންޏެއްކަން ފާހަގަކޮށްލެވެ އެވެ.
އެމްޕީއެލްއިން ބުނީ އެ ދެ އެވޯޑްވެސް އެމްޕީއެލްއަށް ލިބިފައިވަނީ ދެކުނު އޭޝިއާ ސަރަހައްދުގެ ހަތް ގައުމެއްގެ ކުންފުނިތަކާ ވާދަކޮށްގެން ކަމަށެވެ.
އެމްޕީއެލްއިން ބުނީ އެ އެވޯޑްތަކަކީ އޭޝިއާގެ ވާދަވެރިކަން ބޮޑު ވިޔަފާރީގެ މާކެޓެއްގައި ވިޔަފާރި ފުޅާކުރުމާއި، ތަރައްގީކުރުމާއީ ޒަމާނީ ކުރުމަށް ކުންފުނިތަކުން ކުރަމުންދާ މަސައްކަތްތައް ފާހަަގަކޮށް އެކި ދާައިރާތަކުގެ ތަޖުރިބާކާރުން ހިމެނޭ ފަނޑިޔާރުންގެ ޕެނަލްއަކުން ކުންފުނިތަކުގެ ޕާފޯމެންސް އިވެލުއޭޓް ކުރުމަށް ފަހު ދޭ އެވޯޑްތަކެއް ކަމަށެވެ،
އެގޮތުން ތަފާތު 17 ދާއިރާއަކުން އެންމެ ކުރި އަރަމުން އަންނަ ފަރާތްތައް ފާހަގަކޮށް އެވޯޑް ދީފައިވާ ކަމަށްވެސް އެމްޕީއެލްއިން ބުނެފައި ވެއެވެ.
