ކަނޑުމަތިން ފެނުނު ސޯމާލިއާ ބަޔަކު، ފުވައްމުލަކަށް
ފުވައްމުލަކު ބޭރުން ސޯމާލިއާގެ 3 މީހުންނާއެކު ޑިންގީއެއް ހިފަހައްޓާ، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ބެލުމުގެ ދަށަށް ގެންގޮސްފި އެވެ.
ކަނޑުމަތިން ބެހިގެން އައި ބަޔަކު ފުވައްމުލަށް ކައިރިން އެމްއެންޑީއެފުން ހިފަހައްޓާފައިވާ ކަމަށް ބުނެ ސޯޝަލް މީޑިއާގައި އަންނަނީ ފޮޓޯތަކެއް ވެސް ދައުރުވަމުންނެވެ. އެ ފޮޓޯތަކުން ފެންނަ ގޮތުން ހިފަހައްޓާފައިވަނީ ނޫ ކުލައިގެ ކުޑަ ކުޑަ ޑިންގީ އެކެވެ.
އެމްއެންޑީއެފުން ބުނީ، އެ ޑިންގީ ހިފަހައްޓާފައިވަނީ ފުވައްމުލަކު ސިޓީ ހުޅަނގު އުތުރުން 10 ވަރަކަށް މޭލު ބޭރުން ކަމަށެވެ.
އެ ޑިންގީ ހިފަހައްޓާފައިވަނީ ޝައްކު ވެގެން ކަމަށާއި، އެމްއެންޑީއެފް ކޯސްޓްގާޑްގެ ޓީމު އެ ސަރަހައްދަށް ގޮސް ބެލިބެލުމުން އެއީ ސޯމާލިއާގެ މީހުން ބޭނުންކުރާ ވައްތަރުގެ "ސްކިފް" އެއްކަން އެނގުނު ކަމަށް އެމްއެންޑީއެފް އިން ބުނެ އެވެ.
އެމްއެންޑީއެފް ސަދަން އޭރިއާ ކޮމާންޑް، ކޯސްޓްގާޑު ފޯތު ސްކޮޑްރަންގެ ހާބަރ ޕެޓްރޯލުން ހިފަހައްޓާފައިވާ ސޯމާލިއާ ޑިންގީގައި ސޯމާލިއާ މީހުން ކަމަށް ޝައްކު ކުރެވޭ 3 މީހުން ތިބި ކަމަށް ވެސް އެމްއެންޑީއެފުން ބުނެ އެވެ.
ފުލުހުން ބުނީ، ކަނޑުމަތިން ބެހިގެން ދިޔަ ބައެއް ކަމަށް ބެލެވޭ ބަޔަކު ފުވައްމުލަކަށް ގެނެސްފައިވާތީ ފުލުހުން ހަރަކާތްތެރިވާން ފަށާފައިވާ ކަމަށެވެ.
