އިޒްރޭލުން ގާޒާގެ ހޮސްޕިޓަލަށް ހަމަލާ ރާއްޖެއިން ކުށްވެރިކޮށްފިަ
އިޒްރޭލުން ފަލަސްތީނުގެ ގާޒާގެ އުތުރުގައި ހުންނަ ކަމާލް އަދްވާން ހޮސްޕިޓަލުގައި ދިން ހަމަލާ ދިވެހި ސަރުކާރުން މިއަދު ކުށްވެރިކޮށްފި އެވެ.
ކަމާލް އަދްވާން ހޮސްޕިޓަލުގައި އިޒްރޭލުގެ ފައުޖުން ހުޅުޖަހާ އަންދާލައި، ބަލިމީހުންނާއި މުވައްޒަފުން އެތަނުން ނެރުމަށް މަޖުބޫރުކޮށްފައިވެ އެވެ.
"މިއީ ބައިނަލްއަގްވާމީ އިންސާނިއްޔަތާބެހޭ ގާނޫނާއި ބައިނަލްއަގްވާމީ އިންސާނީ ހައްގުތަކާބެހޭ ގާނޫނާ މުޅިން ހިލާފު، ނުރައްކާތެރި އަމަލެކެވެ" އެކަން ކުށްވެރިކޮށް ފޮރިން މިނިސްޓްރީން ނެރުނު ބަޔާނެއްގައި ބުންޏެވެ.
މިނިސްޓްރީން ބުނީ އެއީ ފަލަސްތީނު ރައްޔިތުންނާ ދެކޮޅަށް އިޒްރޭލުން ކެނޑިނޭޅި ދެމުންގެންދާ އަނިޔާވެރި، އުދުވާނީ ހަމަލާތަކުގެ އިތުރު ލާއިންސާނީ ހަމަލާއެއް ކަމަށެވެ. އަދި ސިއްހީ ހިދުމަތްދޭ މުހިންމު މަރުކަޒުތަކަށް ހަމަލާ ދިނުމަކީ ހަނގުރާމައިގެ މައިދާނުގައި ކުށެއްކަމުގައި ބައިނަލްއަގްވާމީ މުއާހަދާތަކުގައި ކަނޑއަޅާފައިވާ އަމަލެެއް ކަމަށް ބުންޏެވެ.
ގާޒާގައި އިޒްރޭން ހިންގަމުންދާ އަނިޔާވެރި އަމަލުތައް ހުއްޓުވައި، ފަލަސްތީނުގެ ރައްޔިތުން ހިމާޔަތްކޮށް، ޖަރީމާތަކަށް ޒިންމާވާ ފަރާތްތަކާމެދު ފިޔަވަޅު އެޅުމަށް ބައިނަލްއަގްވާމީ މުޖުތަމައައަށް، ހާއްސަކޮށް އދ ގެ ސަލާމަތީ މަޖިލީހަށް، ރާއްޖެއިން ގޮވާލާފައިވެ އެވެ.
އަދި ހަމަނުޖެހުމަށް ދެމެހެއްޓެނިވި އަދި އަދުލުވެރި، ސުލްހަވެރި ހައްލެއް ލިބޭނީ 1967 ގެ ކުރީގެ ސަރަހައްދުތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި މުސްތަގިއްލު ފަލަސްތީނު ދައުލަތެއް ގާއިމްކުރެވިގެންކަމުގައި ދެކޭ ކަމަށް ސަރުކާރުން ބުންޏެވެ.
