ޑިޖިޓަލް ކަލަންޑަރުގެ އަޕްޑޭޓާ އެކު އެސްޓީއޯއިން އާކުރީ ދެމެހެއްޓެނިވިކޮށް ކުރިއަށް ދިއުމުގެ ވައުދު
ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އިން ވިޔަފާރީގަ އާއި ކުންފުނީގެ އާންމު ހިންގުމުގައި ގެންގުޅޭ ސަސްޓެއިނަބިލިޓީ، އިނޮވޭޝަން އަދި ޑިޖިޓަލް ޓްރާންސްފޮމޭޝަން ވިސްނުމުގެ ދަށުން ތައާރަފުކޮށްފައިވާ ޑިޖިޓަލް ކަލަންޑަރުގެ ހިދުމަތް އަންނަ އަހަރަށް ދަންމާލަން ނިންމައިފި އެވެ.
އޮފީސް މޭޒުތަކާއި ގޭތެރޭގައި ބެހެއްޓުމަށް ވެސް މަގުބޫލު 'އެސްޓީއޯ ޑިޖިޓަލް ކަލަންޑަރު' އެ ކުންފުނިން ތައާރަފުކުރީ މި އަހަރަށެވެ.
އެސްޓީއޯއިން މިހާރު ވަނީ އަންނަ އަހަރަށް ވެސް އެ ކަލަންޑަރު ސޮފްޓްވެއާ އަޕްޑޭޓާ އެކު 'ރީޔޫސް' ކުރުމަށް ނިންމާފަ އެވެ.
މިއީ އެ ކުންފުނި ހިންގުމުގައި ގެންގުޅޭ ދެމެހެއްޓެނިވި ވިސްނުންތަކާއި އުސޫލުތަކާ އެކު، ޕޭޕަލެސް ޕޮލިސީގެ ދަށުން ތިމާވެއްޓަށް ކުރާ އަސަރު ކުޑަ ކުރުމަށް ކުރަމުންދާ މަސައްކަތްތަކަށް އިތުރަށް ބާރުދިނުމަށް ނިންމާފައިވާ ނިންމުމެއް ކަމަށް އެސްޓީއޯއިން ބުންޏެވެ.
އަދި 2025 ވަނަ އަހަރުގެ ސޮފްޓްވެއާ އަޕްޑޭޓާ އެކު މިފަހަރު ވެސް އެސްޓީއޯ ޑިޖިޓަލް ކަލަންޑަރު ވާނީ އިތުރު ފަސޭހަތަކެއް ލިއްބައިދޭ, މަގުބޫލު ވަސީލަތަކަށް ކަމަށެވެ.
އެސްޓީއޯއިން ބުނީ އެ ކުންފުނިން ކަރުދާހަށް ކުރާ ހޭދަ ކުޑަކުރުމުގެ ސިޔާސަތުގެ ދަށުން ހިންގުމުގައި ކަރުދާސް ބޭނުންކުރާ މިންވަރު މިހާރު ވަރަށް ބޮޑަށް ދަށްކޮށްފައިވާ ކަމަށެވެ. އަދި ޕްރިންޓްކުރެވޭ ކަލަންޑަރުތައް އުފެއްދުމާއި އުފުލުމުގައި ކާބަން ބޭރުވާ މިންވަރު ހީވެސް ނުކުރާހާ މަތިއިރު، މީގެކުރިން އަހަރެއްގެ މައްޗަށް އާންމުކޮށް 8،000 ކަލަންޑަރު ޕްރިންޓްކުރި ކަމަށެވެ.
ނަމަވެސް ޑިޖިޓަލް ކަލަންޑަރުގެ ސަބަބުން އަލުން ޕްރިންޓްކުރަން ނުޖެހި، ކުނި އުފެދުމާއި ތިމާވެއްޓަށް ދެވޭ ގެއްލުން ވަރަށް ބޮޑަށް ކުޑަކުރެވޭނެ ކަމަށް އެސްޓީއޯއިން ބުންޏެވެ.
އެސްޓީއޯއިން އަޕްޑޭޓް ކުރެވިފައިވާ ޑިޖިޓަލް ކަލަންޑަރުގައި އަންނަ އަހަރުގެ ރަސްމީ ބަންދު ދުވަސްތަކާއި އެ ކުންފުންޏަށް ހާއްސަ އިވެންޓްތަކުގެ މުހިންމު ތާރީހުތަކާއި ހަރަކާތްތަކުގެ މައުލޫމާތުގެ އިތުރުން އާ ތީމްތަކާއި ވިޝުއަލްސް އަދި ކަސްޓަމް ރިމައިންޑަސް އާއި ކުންފުނީގެ ބައެއް ބްރޭންޑްތަކުގެ މައުލޫމާތު ހިމެނެ އެވެ.
އެސްޓީއޯއިން ބުނީ މި ފެށޭ އަހަރުގެ ސޮފްޓްވެއާ އަޕްޑޭޓްކުރަން ފަސޭހަވާނެ ކަމަށާ އަދި އެއާ ގުޅޭ މައުލޫމާތާއި އިރުޝާދު އެ ކުންފުނީގެ ވެބްސައިޓާއި ސޯޝަލްމީޑިއާ މެދުވެރިކޮށް ވަރަށް އަވަހަށް ހިއްސާކުރާނެ ކަމަށެވެ.
"އާ ސޮފްޓްވެއާގައި އިނޮވޭޝަނާ ޔޫޒަ އެކްސްޕީރިއަންސަށް އަހައްމިއްޔަތުކަން ދެވިފައިވާނެ.
ފަސޭހައިން ސޮފްޓްވެއާ އަޕްޑޭޓް ކުރެވުމުގެ އިތުރުން ޑިޖިޓަލް ޓޫލްތަކާ ގުޅުވުމާ، ބޭނުން ހިފޭ އިތުރު ކަންކަން ހިމެނިގެންދާނެ،" އެސްޓީއޯއިން ބުންޏެވެ.
