ތާރީހުގައި އެންމެ ގިނަ ކާގޯ އެތެރެކުރީ ނިމުނު އަހަރު: ވަޖީހު
ރާއްޖޭގެ ތާރީހުގައި އެންމެ ގިނަ ކާގޯ އެތެރެކުރީ ނިމިދިޔަ އަހަރުގައި ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހް އިބްރާހިމް ވިދާޅުވެއްޖެ އެވެ.
ފޭސްބުކްގައި މިއަދު ކުރެއްވި ޕޯސްޓެއްގައި ވަޖީހް ވިދާޅުވީ ޖުމްލަ 217،330 ކާގޯ ނިމުނު އަހަރު އެތެރެކުރެވިފައިވާ ކަމަށެވެ. އޭގެ ތެރެއިން 66،639 ޓީއީޔޫސްގެ ކާގޯއަކީ ކޮންޓެއިނަރައިޒް ކާގޯ ކަމަށެވެ. ދެ ވަނައަށް އެންމެ ގިނައިން އެތެރެކޮށްފައިވަނީ ޖެނެރަލް ކާގޯ ކަމަށެވެ. 150،692 ފްރެއިޓް ޓަނުގެ ކާގޯ އެތެރެކޮށްފައިވާ ކަމަށެވެ.
މިއީ 2023 ވަނަ އަހަރާ ބަލާއިރު، ކޮންޓެއިނަރައިޒްޑް ކާގޯއިން 7 އިންސައްތަ އަދި ޖެނެރަލް ކާގޯ 29 އިންސައްތަ އިތުރު އަދަދެއްކަން އޭނާ ފާހަގަކުރެއްވި އެވެ.
އެމްޕީއެލްގެ ސީއީއޯގެ ޕޯސްޓުގައި ހިއްސާކުރެއްވި ތަފާސް ހިސާބުތައް
އެމްޕީއެލްގެ ސީއީއޯ ވިދާޅުވީ މިއީ ރައީސް ޑރ. މުހައްމަދު މުއިއްޒުގެ ވެރިކަމުގެ ފުރަތަމަ އަހަރު ރާއްޖޭގެ އިގުތިސޯދަށް ދިރުން އައިސްފައިވާކަން ދައްކުވައިދޭ އެއް ތަފާސްހިސާބު ކަމަށެވެ. އަދި މި އަހަރު ގިނަ ޕްރޮޖެކްޓުތަކެއް ފެށުމުން، އިގުތިސޯދަށް އިތުރު ކުރިއެރުން ލިބޭނެކަމުގެ އުންމީދު އޮތް ކަމަށެވެ.
މި ކުރިއެރުމާ ގުޅިގެން ރާއްޖެއަށް އެތެރެކުރާ ކާގޯގެ އަދަދު އިތުރުވާނެ ކަމަށް ބެލެވޭތީ، ޕްރޮޖެކްޓްތަކަށް ދަތިނުވާނެ ގޮތަށް ކާގޯ މެނޭޖްކުރުމަށް އެމްޕީއެލުން މިހާރު ތައްޔާރުވަމުންދާ ކަމަށް ވިދާޅުވި އެވެ.
މީގެކުރިން ރާއްޖެއަށް އެންމެ ގިނައިން ކާގޯ އެތެރެކުރިކަމުގެ ރިކޯޑު ގާއިމުކޮށްފައިވަނީ 2018 ވަނަ އަހަރުގަ އެވެ. އެ އަހަރުގައި ޖުމްލަ 186،671 ކާގޯ އެތެރެކޮށްފައިވެ އެވެ. އެއީ 63،002 ޓީއީޔޫސްގެ ކޮންޓެއިނަރާއި 123،669 ފްރެއިޓް ޓަނުގެ ޖެނެރަލް ކާގޯ އެވެ.
ޖެހިގެން އައި 2019 ވަނަ އަހަރު އެ އަދަދުތަކަށް މާ ބޮޑު ބަދަލެއް އައިސްފައި ނުވާ ކަމަށް ވެސް ވަޖީހް ވިދާޅުވި އެވެ.
Ads by STO
