ސީއެމްބިއުލާންސުގެ ހިދުމަތް ހަރުދަނާ ކުރުމުގެ މަޝްވަރާތައް ފަށަނީ
އެމެޖެންސީ ހާލަތްތަކުގައި ކަނޑުމަތިން މީހުން އުފުލާ ސީއެމްބިއުލާންސުގެ ހިދުމަތް މިހާރަށްވުރެ ހަރުދަނާކުރުމުގެ މަސައްކަތް ފައްޓަވާނެ ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެ އެވެ.
ހުވަދޫ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ކަނޑުހުޅުދޫ ރައްޔިތުންނާ ބައްދަލުކުރައްވައި ރައީސް މުއިއްޒު ވިދާޅުވީ އެ ރަށް ހިމެނޭހެން ހުރިހާ ރަށެއްގައިވެސް ސީއެމްބިއުލާންސުގެ ހިދުމަތް ރަނގަޅުކުރަން ޖެހިފައިވާ ކަމަށެވެ.
".. ރާއްޖޭގެ އެކި ކަންކޮޅުތަކުގައި މިހާރަށްވުރެ ހިދުމަތް ރަނގަޅުކުރަން ޖެހިފައި އޮތް ކަމެއް (ސީއެމްބިއުލާންސް) އެހެންވީމަ އެކަމަށް ރަނގަޅު ހައްލެއް ގެނައުމުގެ މަސައްކަތް ފަށާނަން" ރައީސް ވިދާޅުވީ ހުވަދޫއަށް ކުރައްވާ ދަތުރުފުޅު ނިންމަވާލެއްވުމަށް ފަހު މައްސަލަ އަށް ހައްލު ހޯދަން މަޝްވަރާތައް ފަައްޓަވާނެ ކަމަށެވެ. އިތުރު ތަފްސީލެއް ހިއްސާއެއް ނުކުރައްވަ އެވެ.
ސީއެމްބިއުލާންސުގެ ހިދުމަތް އިތުރަށް ރަނގަޅުކުރަން ޖެހޭ ކަމަށް ރައީސް ވިދާޅުވެފައިވާއިރު، ގިނަ ރަށްރަށުގެ ސީއެމްބިއުލާންސުން އެކަށީގެންވާ ވަރުގެ ހިދުމަތް ނުލިބޭކަމުގެ ކަންބޮޑުވުން އަބަދުހެން ދެކެވެ އެވެ. ބައެއް ރަށްރަށުގެ ސީއެމްބިއުލާންސްތައް ހުރި ބޭނުންނުކުރެވޭ ވަރަށް ހަލާކުވެފަ އެވެ. އެމެޖެންސީގައި ސީއެމްބިއުލާންސުން މީހުން ބަލައި ދިޔުން ލަސްވާކަމުގެ ޝަކުވާވެސް އޮވެ އެވެ. ސީއެމްބިއުލާންސު އޮޕަރޭޓްކުރަނީ އެމްއެންޑީއެފުންނެވެ.
މި ސަރުކާރުން ވަނީ ގައުމީ އެއާލައިން، މޯލްޑިވިއަންގެ ފްލީޓަށް ސީޕްލޭންއެމްބިއުލާންސްތަކެއް އިތުރުކޮށް ހިދުމަތްދޭން ފަށާފަ އެވެ. އެ ހިދުމަތް ފެށިތާ ފުރަތަމަ ދުވަސްކޮޅު ޑިމާންޑު އޮތަސް މިހާރު ޑިމާންޑު ވަނީ ދަށްވެފަ އެވެ.
ސީ އެމްބިއުލާންސް އަކީ ސިފައިން ޕެޓްރޯލްކޮށް އެމީހުންގެ ލޮޖިސްޓިކް ދަތުރުތަކަށް ހާއްސަ އުޅަދު ތަކެއްނޫންތޯ