ހީނާމާގޭ ޕާކިން ސަރަހައްދުގައި ބޮޑު ރެއިޑެއް، 17 ބިދޭސީން އަތުލައިގެންފި
ގަވައިދާ ހިލާފަށް އުޅޭ ބިދޭސީން ހޯދުމަށް ހިންގާ އޮޕަރޭޝަންގެ ތެރެއިން ހިނާމާގޭ ޕާކިން ސަރަހައްދުގައި އިމިގްރޭޝަންއިން ބޮޑު ރެއިޑްއެއް ހިންގައި ބިދޭސީންތަކެއް އަތުލައިގެންފި އެވެ.
އިމިގްރޭޝަންއިން މިއަދު އެކްސްގައި ބުނީ ހީނާމާގެ ޕާކިން ސަރަހައްދަކީ ބިދޭސީންގެ ބޮޑު ކޮންޓްރޯލެއް އޮންނަކަމަށް، އަބަދުވެސް އާއްމުންގެ ފަރާތުން ކަންބޮޑުވުން ލިބެމުން އަންނަ ސަރަހައްދެއް ކަމަށެވެ.
އެހެންވެ އެ ސަރަހައްދަށް އަމާޒުކޮށް ހާއްސަ ރެއިޑު އޮޕަރޭޝަނެއް ކުރިއަށް ގެންގޮސް އެ ސަރަހައްދަށް އެއްވެއުޅޭ ބިދޭސީންނާއި އެ ސަރަހައްދުގައި ބިދޭސީން އިސްވެ ތިބެ ހިންގަމުންދާ ފިހާރަ، ކެފޭ ފަދަ ތަންތަން ބަލައި ފާސްކުރި ކަމަށެވެ.
އެގޮތުން އެ ސަރަހައްދުން ބަލައި ފާސްކުރެވުނު ތަންތަނުގައި ސައްހަ ވިސާއެއްނެތި ގަވާއިދާ ހިލާފަށް މަސައްކަތްކުރަމުންދާ 17 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނައިކަމަށް ވެސް އެ އިދާރާއިން ބުނެފައިވެ އެވެ.
އިމިގްރޭޝަނުން ދަނީ ގަވާއިދާ ހިލާފަށް އުޅެމުންދާ ބިދޭސީން ރާއްޖެއިން ފުރުވާލުމަށް ގިނަ އޮޕަރޭޝަންތަކެއް ހިންގަމުންނެވެ. އެ އޮޕަރޭޝަންތަކުގައި މިހާތަނަށް ގިނަ ބަޔަކު ޑީޕޯޓު ކޮށްފައިވެ އެވެ.
ރާއްޖެއިން ފުރުވާލި ބިދޭސީންގެ ތެރޭގައި ސައްހަ ވިސާއެއް ނެތި އުޅެމުންދިޔަ މީހުންނާއި އެކި ކުށްތަކަށް އަރައިގަންނަމުންދިޔަ މީހުން ހިމެނެ އެވެ. އޭގެ ތެރޭގައި ހިމެނެނީ މަސްތުވާތަކެތީގެ މައްސަލަތަކާއި ވައްކަމުގެ އިތުރުން ހަށިވިއްކުމުގެ ވިޔަފާރީގައި ހަރަކާތްތެރިވި މީހުންނެވެ.
އިމިގްރޭޝަންއިން މިހާރު ދަނީ ރާއްޖޭގައި އުޅޭ ހުރިހާ ބިދޭސީންގެ ބަޔޯމެޓްރިކް ޑޭޓާ ވެސް ނަގަމުންނެވެ.
