އިހުސާން ސަސްޕެންޑްކުރަން އެމްޑީޕީން ގޮވާލައިފި
ޕީއެންސީ އަށް މެންބަރުން އިތުރުކުރުމަށް ހިންގި ހަރަކާތުގައި ސައްހަ ނޫން ފޯމުތަކެއް އިލެކްޝަންސް ކޮމިޝަން (އީސީ) އަށް ހުށަހެޅި މައްސަލައިގައި ހޯމް މިނިސްޓަރު އަލީ އިހުސާާން މަގާމުން އެކެހެރިކުރަން އިދިކޮޅު އެމްޑީޕީން ގޮވާލައިފި އެވެ.
އެމްޑީޕީން މިއަދު ނެރުނު ނޫސް ބަޔާނުގައި ތުހުމަތުކޮށްފައިވަނީ މިހާރު އާންމުވެފައިވާ ފޮޓޯތަކުން ފެންނަ ގޮތުން ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު) ގެ މުވައްޒަފުންނާއި، ވަސީލަތްތަކާއި އެ އިދާރާގައި ހުރި މައުލޫމާތު ބޭނުންކޮށްގެން ޕީއެންސީއަށް މީހުން ވެއްދުމުގެ މުޅި އިޖުރާއަތު ހިނގައި ދިޔައީ މިނިސްޓަރު އިހުސާނުގެ ސީދާ ބެއްލެވުމުގެ ދަށުން ކަމަށެވެ.
އެހެންވެ ޒާތީ މައުލޫމާތުން ވައްކަން ކުރުމުގެ މި ބޮޑު ޖަރީމާ ހިންގުމުގައި ހޯމް މިނިސްޓަރު އިސް ދައުރެއް އަދާކޮށްފައިވާކަން ތުހުމަތުކޮށް އެމްޑީޕީން ވަނީ އެ އަމަލު ކުށްވެރިކޮށްފަ އެވެ.
އެމްޑީޕީން ބުނީ ވަޒީރުންނަކީ ގާނޫނުއަސާސީއާއި ރައްޔިތުންގެ ހައްގުތަކަށް ރައްކާތެރިވުމަށް މާތްﷲ ގަންދީ ހުވައެއް ކޮށްގެން އެ މަގާމާ ހަވާލުވާ ބައެއް ކަމަށްވާއިރު، އެކިއެކި ހިދުމަތްތަކަށް އެދިގެން ދިވެހި ސަރުކާރަށް ލިޔެކިޔުން ހުށަހަޅާ ދިވެހި ރައްޔިތުންގެ ޒާތީ މައުލޫމާތުން ވައްކަން ކުރުމުގައި މިނިސްޓަރު އިހުސާންގެ ބައިވެރިވުން އޮތް ކަމީ އެ ވަޒީރު ކުރެއްވި ހުވަޔާ ވެސް ހިލާފު އަމަލެއް ކަމަށެވެ.
އެހެންވެ މިނިސްޓަރުގެ އެ މައްސަަލަ ފުލުހުން ތަހުގީގުކުރުަމަށް ވެސް އެމްޑީޕީން ގޮވާލައިފައި ވެއެވެ.
"މިނިސްޓަރު އިހުސާނަކީ ފުލުހުންގެ އިދާރާގެ ކަންކަން ބެލެހެއްޓުން ހަވާލުވެފައިވާ ވަޒީރުކަމަށްވާއިރު، އޭނާ އެ މަގާމުގައި ހުރެއްޖެނަމަ މިމައްސަލައިގެ އިންސާފުވެރި ތަހުގީގެއްކުރުމަކީ މުސްތަހީލުކަމަކަށްވާތީ، މި މައްސަލައިގައި އިންސާފުވެރި ތަހުގީގެއް ކަށަވަރުކުރުމަށްޓަކައި، މިނިސްޓަރު އިހުސާނު މަގާމުން އެކަހެރިކުރުމަށް ވެސް ސަރުކާރަށް ގޮވާލަމެވެ." އެމްޑީޕީން ނެރުނު ނޫސް ބަޔާނުގައި ބުނެފައި ވެއެވެ.
ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގަތުމާ އެކީ ޕީއެންސީއަށް 75،000 މެންބަރުން ހަމަކުރުމުގެ މަސައްކަތް ފެށި އެވެ. އެ ހަރަކާތް ހިނގަމުން ދަނިކޮށް ވެސް ސައްހަ ނޫން ފޯމުތަކެއް ހުށަހަޅާ ކަމަށް ގިނަ ބަޔަކު ދިޔައީ ތުހުމަތުކުރަމުންނެވެ.
މި ދިޔަ ދެ ހަފުތާއެއްހާ ދުވަހު އެމްޑީޕީގެ ބައެއް މެންބަރުން އެ މީހުންނަށް ނޭނގި ޕީއެންސީއަށް ވައްދާފައިވާ ކަން ފެންމަތިވި އެވެ. އެމްޑީޕީގެ ގައުމީ މަޖިލީހުގެ ބައެއް މެންބަރުން ވެސް އޭގެ ތެރޭގައި ހިމެނެ އެވެ. އެންމެ ފަހުން އެމްޑީޕީގެ މަޖިލިސް މެންބަރު، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓެ) ވެސް ޕީއެންސީއަށް ވައްދާފައިވާ ކަން ފެންމަތިވި އެވެ.
