ހިލޭ ބަހާ މަސްދަޅުން 40 ގްރާމް އުންޏެއް ނުވާނެ: މިފްކޯ
ރޯދަ މަހަށް ހާއްސަކޮށް ސަރުކާރުން ހިލޭ ބެހުމަށް ނިންމާފައިވާ މަސްދަޅުން 40 ގްރާމް އުނިނުވާނެ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބުނެފި އެވެ.
ރޯދަ މަހަށް ރާއްޖޭގެ ކޮންމެ ގެއަކަށް ސަރުކާރުން މަސްދަޅު ކޭހެއް ދޭން ނިންމާފައިވާކަން ރައީސް ޑރ. މުހައްމަދު މުއިއްޒު ހާމަކުރެއްވީ ސަރުކާރަށް އަހަރެއް ފުރުމާ ގުޅިގެން ސޯޝަލް ސެންޓަރުގެ ހޯލުގައި މިދިޔަ ނޮވެމްބަރު މަހުގެ 17 ވަނަ ދުވަހުގެ ރޭ ބޭއްވި ޖަލްސާގަ އެވެ.
ރައީސް ވިދާޅުވެފައިވާ ގޮތުގައި ގޭގެއަށް މަސްދަޅު ކޭސް ދިނުމަށް ވާން ޖެހޭ ތައްޔާރީތައް ވުމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް އަންގަވާފައިވާނެ ކަމުގަ އެވެ.
ރޯދައަށް ހާއްސަކޮށް އުފައްދާ ދަޅުތަކުން 40 ގްރާމުގެ މަސް އުނިކޮށްފައިވާ ކަމަށް ބުނެ ވާހަކަތައް ދަނީ ފެތުރެމުންނެވެ. މިފްކޯއިން ބާޒާރަށް ނެރޭ ދަޅުތަކަށް ވުރެ މަދުން މަސް އަޅައިގެން ދަޅު އުފައްދަން ނިންމީ އަގުބޮޑުކޮށް އުފައްދާ މަސްދަޅު ބެހުމަކީ މުހިންމު ކަމެއް ކަމަށް ނުދެކޭތީ ކަމަށް ވެސް ބުނެފައިވެ އެވެ.
މިފްކޯއިން މިއަދު "އެކްސް" ގައި ކުރި ޕޯސްޓެއްގައި ބުނީ ރޯދަ މަހަށް ހާއްސަކުރާ މަސްދަޅުތަކުން 40 ގްރާމް އުނިކުރާ ކަމަށް ބުނެ ފަތުރަމުން ދަނީ ދޮގު ވާހަކަތަކެއް ކަމަށެވެ.
"140ގ ބާޒާރަށް ނެރުނީ ކުދި ގޭބީސީތަކަށް އަދި އެއްފަހަރު ބޭނުން ކުރެވޭ އެއްޗެއްގެ ގޮތުގައި. މަސްދަޅު ފްރިޖް ކުރުމަކީ ރަނގަޅު ކަމަކަށް ނުވާތީ،" ޕޯސްޓުގައިވެ އެވެ.
ރައީސްގެ ވައުދުފުޅާ އެއްގޮތަށް ރޯދަޔަށް ގެތަކަށް ހިލޭ ބަހާ މަސްދަޅުން 40 ގްރާމް މަސް އުނި ނުވާނެ ކަމަށް ވެސް މިފްކޯއިން ފާހަގަކުރި އެވެ.
މިފްކޯއިން އަލަށް ނެރުނު 140 ގްރާމްގެ މަސްދަޅު ކޭހުގައި 48 ދަޅު ހިމެނެ އެވެ. އެ ކުންފުނީގެ މާލެ ސަރަހައްދުގެ ފިހާރަކުންނާއި ރީޖަނަލް ފިހާރަތަކުން އަދި އައިސްޕްލާންޓްތަކުން މަސްދަޅު ކޭސް ހޯލްސޭލްކޮށާއި ރީޓެއިލްކޮށް ގަންނަން ލިބެން ހުންނާނެ ކަމަށް މިފްކޯއިން ބުންޏެވެ.
މި ރޯދަމަހު ގޭގެއަށް މަސްދަޅު ކޭސް ދޭން ނިންމާފައިވާއިރު، މިދިޔަ ރޯދަ މަހު ކޮންމެ ގެއަކަށް ހަނޑޫ ބަސްތާއަކާއި ފުށް ބަސްތާއެއް އެސްޓީއޯ މެދުވެރިކޮށް ސަރުކާރުން ވަނީ ދީފަ އެވެ. އެކަމަށް ވަރަށް ބޮޑު ތަރުހީބެއް ލިބިފައިވާ ކަމަށް ވެސް ރައީސް ވިދާޅުވެފައިވެ އެވެ.
