އެޗްއާރުސީއެމްގެ ނާއިބު ރައީސްއަކަށް މޫމިނާ އައްޔަނުކުރައްވައިފި
އެޗްއާރުސީއެމްގެ ނައިބު ރައީސްގެ މަގާމަށް ރައީސް ޑރ މުހައްމަދު މުއިއްޒު، މޫމިނާ އާދަމް މިއަދު އައްޔަނު ކުރައްވައިފި އެވެ.
އެޗްއާރުސީއެމުން އެކްސްގައި މިއަދު ބުނީ މޫމިނާ އެ މަގާމަށް އައްޔަނުކުރައްވާފައިވާ ކަމަށެވެ.
މޫމިނާ އައްޔަނުކުރަން މަޖިލީހުން ރުހުން ދިނީ މި މަހުގެ 20 ވަނަ ދުވަހު އެވެ.
އެޗްއާރުސީއެމްގެ މެމްބަރު ކަމަށް މޫމިނާ އައްޔަންކުރެއްވީ 2020 ވަނަ އަހަރުގެ ސެޕްޓެމްބަރު މަހުގެ 8 ވަނަ ދުވަހު އެވެ. އޮސްޓްރޭލިއާގެ ޔުނިވާސިޓީ އޮފް ސިޑްނީން ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓާސް ހާސިލުކުރައްވާފައިވާ މޫމިނާ ވަނީ އިކޮނޮމިކް މިނިސްޓްރީގެ އިތުރުން ޓްރީޓޮޕް ހޮސްޕިޓަލުގައި ވެސް މަސައްކަތް ކުރައްވާފަ އެވެ.
އިކޮނޮމިކް މިނިސްޓްރީގައި ކޮންސަލްޓެންޓެއްގެ ގޮތުގައި މަސައްކަތް ކުރެއްވިއިރު، ޓްރީޓޮޕްގެ ހިއުމަން ރިސޯސް މެނޭޖަރުގެ މަގާމުގެ އިތުރުން އެސިސްޓެންޓް މެނޭޖަރުގެ މަގާމު އޭނާ އަދާކުރެއްވި އެވެ.
އެޗްއާރުސީއެމްގެ މެމްބަރަކަށް ވެވަޑައިގެންނެވުމުގެ ކުރިން، އެ ކޮމިޝަނުގެ އެސިސްޓެންޓް ރިސާޗް އޮފިސަރުގެ މަގާމާއި ޕްލޭނިން އޮފިސަރުގެ މަގާމު އަދި ކޯޕަރޭޓް އެފެއާޒް ޑިޕާޓްމެންޓުގެ ޑިރެކްޓަރުގެ މަގާމު ވެސް އަދާކުރައްވާފައިވެ އެވެ.
އެޗްއާރުސީއެމަށް ނައިބަކު އައްޔަންކުރަން މަޖިލިހަށް ނަން ފޮނުވާފައިވަނީ އެ ކޮމިޝަނުގެ ކުރީގެ ނައިބު ރައީސް ޑރ. އަހުމަދު އަދުހަމް އަބްދުﷲ އިސްތިއުފާދެއްވުމުންނެވެ.
