އީސަ ދެއްކެވި ވާހަކަ ނަޝީދު ދިފާއު ކުރައްވައިފި
މާލޭގައި މިވަގުތު ކުލި ނުދައްކާ ހާލުގައި ތިބި މީހުން ރަށަށް ބަދަލު ވުމަށް ގޮވާލައި ކެނދިކުޅުދޫ ދާއިރާގެ މެންބަރު އަހުމަދު އީސަ ދެއްކެވި ވާހަކަ މަޖިލީހުގެ ރައީސް މުހައްމަދު ނަޝީދު ދިފާއު ކުރައްވައިފިއެވެ.
އިއްޔެ ބޭއްވި މަޖިލީހުގެ ޖަލްސާގައި މާލެ އަދި ހުޅުމާލޭގައި ކުއްޔަށް ދިރިއުޅެމުންދާ ރައްޔިތުން ކުލި ނުދެއްކިގެން މަގުމަތި ނުވަނީސް، އެމީހަކު އަމިއްލަ ރަށަށް ދިޔުމަށް އީސާ ވަނީ ގޮވާލައްވާފައެވެ.
އީސާ ވިދާޅުވީ، ހާލުގައި ޖެހި އާއިލާ ނުބެލޭ ހިސާބަށް ކަންކަން ދިއުމުގެ ކުރިން ފަރުދީ ޒިންމާ އަދާކޮށް އަމިއްލަ ރަށަށް ބަދަލުވާން ޖެހޭ ކަމަށެވެ. އީސާ އިތުރަށް ވިދާޅުވީ، ކުއްޔަށް އެޕާޓްމެންޓް ދޭ ބައެއް ތަންތަނުގެ ވެރިން ކުލި ކުޑަކޮށްދިން ނަމަވެސް އަދިވެސް ބައެއް މީހުންނަށް ކުލި ދެއްކުމުގައި އުނދަގޫތަކާއި ކުރިމަތިލާން ޖެހޭ ކަމަށެވެ.
އީސަގެ މި ވާހަކަތައް ދިފާއުކުރައްވާ ، މިއަދު ބޭއްވި ނޫސްވެރިންގެ ބައްދަލުވުމެއްގައި ނަޝީދު ވިދާޅުވީ އެ މައްސަލާގައި މެންބަރު ބޭނުން ކުރެއްވި ބަސްތައް ފަހަރެއްގައި އެންމެ އެކަށީގެން ނުވާ ކަމަށާއި އެކަމަކު މެންބަރު ފާހަގަ ކުރެއްވި ނުކުތާ ރަނގަޅު ކަމަށެވެ.
ނަޝީދު ވިދާޅުވީ އުނދަގޫ ހަގީގަތްތައް ހާމަކުރުމުން އާއްމުންގެ ނުރުހުން އަމާޒުވާނެ ކަން އެނގިވަޑައިގަންނަވާ ކަމަށާއި މެމްބަރު އީސާ އަކީ އަބަދުވެސް ވަރަށް ސާފުބަހުން އެފަދަ ވާހަކަތައް ދައްކަވާ ބޭފުޅެއް ކަމަށެވެ.
