ގޯއްޗެއް ނުވަތަ ފުލެޓެއް އޮވެގެން ޑިސްކޮލިފައި ކޮށްފައިވަނީ ގެޒެޓްކޮށްފައިވާ ޢިއުލާނާ ޚިލާފަށް:މުޢިއްޒު
ކުރީގެ ރައީސް ، ރައީސް ޢަބުދުﷲ ޔާމީންގެ ވެރިކަމުގައި އެޅުއްވި ހިޔާ މަޝްރޫޢުގެ ފުލެޓްތައް ލިބުނު ފަރާތްތަކުގެ ތެރެއިން ގޯއްޗެއް ނުވަތަ ފުލެޓެއް އޮވެގެން ، މިސަރުކާރުން ޑިސްކޮލިފައި ކޮށްފައިވާ ފަރާތްތައް ޑިސްކޮލިފައި ކޮށްފައިވަނީ ގެޒެޓް ކޮށްފައިވާ އިޢުލާނާ ޚިލާފަށް ކަމަށް ކުރީގެ ހައުސިން މިނިސްޓަރ އަދި ޕީޕީއެމްގެ ނައިބު ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު ކުރެއްވި ޓްވީޓެއްގައި ވިދާޅުވީ ގެޒެޓްކޮށްފައިވާ އިޢުލާންގައިވާ ގޮތުން ހިޔާ މަޝްރޫޢުގެ ފުލެޓެއް ލިބިއްޖެނަމަ ކުރިން ލިބިފައިވާ ގޯތި ނުވަތަ ފުލެޓް ދޫކޮށްލަން ފުރުސަތު ދޭން ޖެހޭނެ ކަމަށާއި އެހެން ނަމަވެސް މި ސަރުކާރުން އެ ސަބަބަށްޓަކައި ކެންސަލް ކުރީ އެ އުސޫލާ ޚިލާފަށް ކަމަށެވެ.
ހިޔާ ފުލެޓްތަކާއި ގުޅިގެން ސަރުކާރުން ގެޒެޓްކޮށްފައިވާ އިއުލާންގައި ބަޔާން ކޮށްފައި ވަނީ "30 އޭޕްރީލް 2018 އާ ހަމަޔަށް މާލެއިން ، 600 އަކަފޫޓް ނުވަތަ އެއަށްވުރެ ބޮޑު ގޯއްޗެއް/ފްލެޓެއް/ރޯހައުސްއެއް ލިބިފައިވާނަމަ ނުވަތަ އެކަކަށްވުރެ ގިނަ މީހުންގެ ނަމުގައި ރަޖިސްޓްރީ ކޮށްފައިވާ ގޯއްޗަކުން 600 އަކަފޫޓް ނުވަތަ އެއަށްވުރެ ބޮޑު ބައެއް ލިބިފައިވާނަމަ ނުވަތަ 600 އަކަފޫޓް ނުވަތަ އެއަށްވުރެ ބޮޑު ފުލެޓެއް ގަނެ ވިއްކުމުގެ އެއްބަސްވުމެއްގައި އެއްވެސް ފަރާތަކާއެކު ސޮއިކޮށްފައި ވާނަމަ ފައިނަލް ލިސްޓްގައި ހިމެނި ފްލެޓް ހަވާލު ކުރެވޭއިރު ސަރުކާރަށް އެތަނަށް ދޫކޮށްލަން" ޖެހޭ ކަމަށެވެ.
އިއުލާންގައި މިގޮތަށް އޮތް ނަމަވެސް ފްލެޓެއް ހުރެގެން ނުވަތަ ގޯއްޗެއް އޮވެގެން ޑިސްކޮލިފައި ކުރި ފަރާތްތަކަށް އެ ފުރުސަތު ދީފައި ނުވާކަން މުޢިއްޒު ވަނީ ފާހަގަ ކުރައްވާފައެވެ.
ރައީސް އިބްރާހީމް މުޙައްމަދު ޞާލިޙް އެކުލަވާލެއްވި ފްލެޓް ކޮމިޓީން ފްލެޓް ދީފައިވާގޮތް ބެލުމަށްފަހު މިހާތަނަށް އާއްމުކޮށްފައި ވަނީ H4، ޑޮކްޓަރުންނާއި ނަރުހުންނަށް ޚާއްސަ ކެޓަގަރީ އާއި H5، ޓީޗަރުންނަށް ޚާއްސަ ކެޓަގަރީ އާއި H8 މާލޭ ރަށްވެހިންނަށް ޚާއްސަ ކެޓަގަރީ އާއި H10، ނުކުޅެދުންތެރިކަން ހުންނަ ފަރާތްތަކާއި އާއިލާތަކަށް ޚާއްސަ ކެޓަގަރީން ފްލެޓްތައް ލިބޭ ފަރާތްތަކުގެ އިތުރުން ދަފްތަރުގެ ކެޓަގަރީން ފުލެޓް ލިބޭ ފަރާތްތަކުގެ ވަގުތީ ލިސްޓެވެ.
މިކެޓަގަރީތަކުން ކުރިން ފްލެޓް ލިބުނު ކަމުގެ ލިޔުން ލިބިފައިވާ 136 މީހެއް ވަނީ ޑިސްކޮލިފައި ކޮށްފައެވެ.
