ނުތާހިރު ކެފޭއެއް ބަލައި ފާސްކޮށް 11 ބިދޭސީން ހައްޔަރުކޮށްފި
އާންމު ސިއްހަތަށް ނުރައްކާވާ ގޮތަށް ހިންގަމުންދިޔަ ކެފޭއެއްގައި ގަވާއިދާ އުޅެމުންދިޔަ 11 ބިދޭސީއަކު މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފި އެވެ.
ގަވާއިދާ ހިލާފަށް ރާއްޖޭގައި އުޅެމުން އަންނަ ބިދޭސީންނަށް އަމާޒުކޮށް ޓާސްކްފޯހުން ދަނީ ރެއިޑު އޮޕަރޭޝަންތަކެއް ހިންގަމުންނެވެ. އެގޮތުން ބުރާސްފަތި ދުވަހުގެ ރޭ ކުރިއަށް ގެންދިޔަ ރެއިޑުގައި މާލޭގައި ހުރި ކެފޭއެއް ވަނީ ބަލައި ފާސްކޮށްފަ އެވެ.
އިމިގްރޭޝަނުން ރޭ "އެކްސް" ގައި ކުރި ޕޯސްޓުގައި ވަނީ އެ ރެއިޑުގެ ވީޑިއޯ އާންމުކޮށްފަ އެވެ. ވީޑިއޯއިން ފެންނަނީ އާންމު ސިއްހަތަށް ނުރައްކާވާ ގޮތަށް ކެފޭ ތެރޭގައި ކާބޯތަކެތި ތައްޔާރުކުރަމުންދާ މަންޒަރެވެ.
ބަދިގެ ތެރެ ވަރަށް ނުތާހިރުކޮށް އޮތްއިރު، ކާތަކެތި ތައްޔާރުކުރަން ބޭނުންކުރާ ބާވަތްތައް އެ ތަނުގެ ތެރޭގައި ހުރީ އެއްވެސް ތަރުތީބެއް ނެތި އެވެ. ކާބޯތަކެތި ރައްކާކުރުމާއި ބޭނުންކުރުމުގައި އެއްވެސް ވަރަކަށް ބެލުމެއް ނެތެވެ.
އިމިގްރޭޝަނުން ބުނީ އާންމު ސިއްހަތަށް ނުރައްކާވާ ގޮތަށް ހިންގަމުންދިޔަ އެ ކެފޭގައި ގަވާއިދާ ހިލާފަށް އުޅެމުންދިޔަ 11 ބިދޭސީއަކު އެ އިދާރާގެ ބެލުމުގެ ދަށަށް ގެންގޮސްފައިވާ ކަމަށެވެ.
އިމިގްރޭޝަނުން ދަނީ ގަވާއިދާ ހިލާފަށް އުޅެމުންދާ ބިދޭސީން ފުރުވާލުމަށް ގިނަ އޮޕަރޭޝަންތަކެއް ހިންގަމުންނެވެ. އެ އޮޕަރޭޝަންތަކުގައި މިހާތަނަށް ގިނަ ބަޔަކު ޑީޕޯޓު ކޮށްފައިވެ އެވެ.
ރާއްޖެއިން ފުރުވާލި ބިދޭސީންގެ ތެރޭގައި ސައްހަ ވިސާއެއް ނެތި އުޅެމުންދިޔަ މީހުންނާއި އެކި ކުށްތަކަށް އަރައިގަންނަމުން ދިޔަ މީހުން ހިމެނެ އެވެ. އޭގެ ތެރޭގައި ހިމެނެނީ މަސްތުވާތަކެތީގެ މައްސަލަތަކާއި ވައްކަމުގެ އިތުރުން ހަށިވިއްކުމުގެ ވިޔަފާރީގައި ހަރަކާތްތެރިވި މީހުންނެވެ.
ރާއްޖޭގައި އުޅޭ ހުރިހާ ބިދޭސީންގެ ބަޔޯމެޓްރިކް ނެގުމުގެ މަސައްކަތް ވެސް ކުރިއަށް އެބަދެ އެވެ. އޮޕަރޭޝަން ކުރަނގީގެ ދަށުން މިހާތަނަށް 59 ރަށެއްގައި ދިރިއުޅޭ 43،294 ބިދޭސީންގެ މައުލޫމާތު އެއްކުރެވިފައިވާ ކަމަށް ސަރުކާރުން ބުނެ އެވެ. އޭގެ ތެރެއިން 24,540 ބިދޭސީން ރެގިއުލަރައިޒް ކޮށްފައިވެ އެވެ.
Ads by STO
