ބާ ކައުންސިލްގެ އިންތިހާބުގައި ވޯޓުލުމަށް ރަޖިސްޓްރީވުމުގެ ފުރުސަތު ހުޅުވާލައިފި
ބާ ކައުންސިލުގެ އެގްޒެކެޓިވް ކޮމިޓީގެ މަގާމުތަކަށް މެންބަރުން ހޮވުމަށް މި މަހުގެ 26 ވަނަ ދުވަހު ބާއްވާ އެ ކައުންސިލްގެ އިންތިހާބުގައި ވޯޓުލާން ރަޖިސްޓްރީވުމުގެ ފުރުސަތު މިއަދު ހުޅުވާލައިިފި އެވެ.
ބާ ކައުންސިލްއިން މިއަދު ބުނީ ވޯޓުލުމަށް ރަޖިސްޓްރީ ވުމުގެ ފުރުސަތު އަންނަ އަންގާރަ ދުވަހުގެ ނިޔަލަށް ހުޅުވާލައިފައިވާ ކަމަށެވެ.
އެހެންވެ އިންތިހާބުގައި ވޯޓުލުމުގެ ހައްގު ލިބިފައިވާ ގާނޫނީ ވަކީލުންގެ ތެރެއިން ވޯޓުލުމަށް ބޭނުންފުޅުވާ ފަރާތްތަކުން އެކަމަށް ކަނޑައެޅިފައިވާ ފޯމު ފުރުމުން ރަޖިސްޓްރީ ވެވޭނެ ކަމަށް ވެސް ބާ ކައުންސިލްއިން ބުންޏެވެ.
ނަމަވެސް އީ-ވޯޓިންގ މެދުވެރިކޮށް ބާ ކައުންސިލުން ކުރިން ބާއްވާފައިވާ އިންތިހާބެއްގައި ވޯޓުލުމަށް ރަޖިސްޓަރީވެފައިވާ ފަރާތްތަކުން އަލުން މި ވޯޓުލާން ރަޖިސްޓްރީވާން ނުޖެހޭނެ ކަަމަށް އެ ކައުންސިލްއިން ބުންޏެވެ. އަދި ކުރިން އީ ވޯޓިން މެދުވެރިކޮށް ރަޖިސްޓްރީވެ ނަމަވެސް މައުލޫމާތު ބަދަލުވެފައިވާ ފަރާތްތަކަށް ފޯމު މެދުވެރިކޮށް މައުލޫމާތު އަޕްޑޭޓް ކުރެވޭނެ ކަމަށް ވެސް ބުންޏެވެެ.
އީ-ވޯޓިންގ މެދުވެރިކޮށް ބާ ކައުންސިލުން ކުރިން ބާއްވާފައިވާ އިންތިޚާބުތަކުގައި ވޯޓުލުމަށް ރަޖިސްޓަރީވެފައިވާ ފަރާތްތަކުގެ ދަފުތަރު ވެސް ބާ ކައުންސިލްއިން ވަނީ އާންމުކޮށްފަ އެވެ.
