ކަސްޓަމަރ ކެއަރ ގައި މަސައްކަތް ކުރާ މުވައްޒަފެއްގެ ތަޖުރިބާ : ވޭން ހުރި ވަޒީފާއެއް
އެންމެ ފުރަތަމަ ވަޒީފާއެއްގައި މަސައްކަތް ކުރަން ލިބުނީ ވެސް ކަސްޓަމަރ ސާވިސް ދާއިރާއިންނެވެ. އަލަތު ވަޒީފާ ކަމަށް ވީތީ މަސައްކަތުގެ ތަޖުރިބާއެއް ވެސް ނެތެވެ. ނަމަވެސް އަލަށް ފަށައިގަންނަން ލިބުނު ފުރުސަތު ލިބިގެން ދިޔައީ “ކަސްޓަމަރ ސާވިސް” ދާއިރާއިންނެވެ.
އޭރު މައުލޫމާތު ލިބުނު ގޮތުގައި ކަސްޓަމަރުންނަށް ޚިދުމަތް ކުރުމަކީ މާ އުނދަގޫ ކަމެއް ނޫނެވެ. ތެދެކެވެ. އުނދަގުލެއް ނޫނެވެ. އެހެނަސް އެވަޒީފާގައި ގިނަދުވަސް ތަކެއް ހޭދަވާން ފެށުމުން އަހަންނަށް ވިސްނުނީ އެއީ ފަސޭހަ ވަޒީފާއެއް ނޫންކަމެވެ. އަދި ކެތްތެރިކަން އިންތިހާއަށް ބޭނުންވާ ކަމެއް ކަމެވެ.
ސާފު ތެދު ނިޔަތުގައި މަސައްކަތް ކުރާ ހާލު ޚިދުމަތް ހޯދަން އަންނަ ފަރާތްތަކަށް، ޚިދުމަތް ދެނީ، އެ ޚިދުމަތް ލިބޭ ފަރާތަކީ ހިތްހަމަ ޖެހިގެން، ހިނިތުންވުމާއި އެކު އެތަނަކުން ނިކުންނާނެ މީހެއްކަމުގައި ވޭތޯ ކުރާ އުއްމީދުގައެވެ. އަދި މިކަން ހާސިލުވުމުން ހިތަށް އެ ލިބޭ ހިތްހަމަޖެހުމާއި، ތަސައްލީ އަކީ ބުނެދޭން ދަތި އެހާމެ އުފާވެރި ހިތްހަމަޖެހުމެކެވެ. މަސައްކަތް ކުރުމަށް ލިބޭ އިތުރު ހިތްވަރެކެވެ.
މި ދާއިރާގައި ކުރަންޖެހޭ މަސައްކަތުގެ ގޮތުން، ފޯނުންނާއި އަދި ކަސްޓަމަރުންނާއި ބައްދަލުވެ ބައެެއް ކަހަލަ ޚިދުމަތް ދޭން ޖެހެއެވެ. ކުށް ކުރެވޭ ފަހަރު ވެސް އާދެއެވެ. އަދި އެކަމަށް މަޢާފަށް ވެސް އެދެމެވެ. މަސައްކަތް ކުރާ އޮފީހުގެ އެހެން ބައެއްގެ ސަބަބުން ކަސްޓަމަރަށް ލިބޭ ގެއްލުމާއި ގުޅިގެން، އެ ރުޅިގަދަ ކަސްޓަމަރުންނާއި ކެރިހުރެެ ހިތްވަރާ އެކު ކުރިމަތި ވެސް ލަމެވެ.
ފަހަރުގައިވެސް މިއީ އެއްވެސް ވަރަކަށް ފަސޭހަ ކަމެއް ނޫނެވެ. ބައެއް މީހުންނަށް ވަރަށް ފަސޭހައިން ވިސްނިދާނެއެވެ. އެހެނަސް އެންމެންނަކީ އެއްވަރެއްގެ ބައެއް ނޫނެވެ. ރުޅި ގަދަ އަދި ވިސްނައިދޭން އުނދަގޫ މީހަކާ ދިމާވާ ފަހަރުތޯއެވެ؟ އެވަގުުތު އެ މީހެއްގެ ހިތަށް އައިހާ އެއްޗެއް ގޮވާލާނެއެވެ. ބައެއް ފަހަރު ހިތަށް ވަރަށް އަސަރު ވެސް ކުރާނެއެވެ.
އެހެންނަމަވެސް ކެތްތެރި ކަމާއެކު ހިތްވަރުކޮށް އަޅުގަނޑު އެ ވާހަކަތައް އަޑު އަހަމެވެ. ޚިދުމަތް ހޯދުމުގައި އެފަރާތަށް ދިމާވި ދަތި އުނދަގޫތައް އަޅުގަނޑަށް ވިސްނޭ ޙާލުއެވެ. އެވަގުތު ހިތަށް ކިތަންމެ އަސަރެއް ކުރި ކަމުގައިވީ ނަމަވެސް އަދި އެކަމާ މާޔޫސްވި ކަމުގައި ވީނަމަވެސް އެ ބޭފުޅަކާ އަޅުގަނޑު ވާހަކަ ދައްކަނީ ހިނިތުންވެ ހުރެއެވެ.
ކަސްޓަަމަރ ސާވިސް ދާއިރާގައި އަޅުގަނޑަށް ދިމާވި ހާދިސާއެއް ހިއްސާ ކޮށްލާނަމެވެ. ރާއްޖެއިން ބޭރުން ވިޔަފާރި ކޮށްގެން ގެންނަ މުދާ ދޫކުރާ، ރާއްޖޭގެ މައި ކުންފުނި ކަމުގައިވާ މޯލްޑިވްސް ޕޯސްޓުގައި އަޅުގަނޑު މަސައްކަތް ކުރި ދުވަސްވަރެވެ.
ރުފިޔާ ދީގެން ބޭރުން ގެންނަ މުދާ އަޅުގަނޑުމެން އޭގެ ވެރިފަރާތަށް ރައްދު ކުރުމުގެ ތެރޭގައި ހިމެނޭ “ކައުންޓަރ ސާވިސް” ގައި މަސައްކަތް ކުރީމެވެ. އެފަހަރުގައި އަޅުގަނޑު އިނީ މައުލޫމާތު ފޯރުކޮށްދޭ ކައުންޓަރުގައެވެ. ބޭރުން އޯޑަރު ކުރާ “ޕެކޭޖު” ތައް އައުން ލަސްވެގެން، އެ ޕެކޭޖުތަކުގެ ތަފްސީލެއް ބަލާލުމަށް އައި ކަސްޓަމަރެކެވެ.
އަޅުގަނޑު ބެލި ބެލުމުން އެ ޕެކޭޖު ރާއްޖެއަށް އައި ކަމަކަށް އަޅުގަނޑުމެންގެ ސިސްޓަމަކުން ފެންނާކަށް ނެތެވެ. އެ ވާހަކަ އަޅުގަނޑު ކަސްޓަމަރުގެ ކިބައިން މަޢާފަށް އެދެމުން ބުނެލީމެވެ. ގަބޫލު ކުރާނެ ކަމަށް ހީކޮށެވެ. އެހެން ނަމަވެސް ކަންތައް ވީ ހީކުރި ގޮތާއި މުޅިން ޚިލާފަށެވެ.
މުޅި އެ ކައުންޓަރ ހިމެނޭ ސަރަހައްދުގައި އެންމެނަށް އަޑު އިވޭ ގޮތަށް އެބޭފުޅާ ފެށީ އަޅުގަނޑާ ދިމާލަށް ހަޅޭއްލަވާށެވެ. ނުވީތާކަށް އަޅުގަނޑުމެން އެބޭފުޅުން ގެންނަ ޕެކޭޖުތައް ވަގަށް ނަގަނީ ކަމަށް ވެސް އެބޭފުޅާ ބުންޏެވެ. އެހެން ނަމަވެސް އަޅުގަނޑުގެ ހިތުގައި ވަގުތުން ބިންވަޅު ނެގުނީ އެބޭފުޅާ ދެން ބުނި ބަހަކުންނެވެ.
“މިތަނުގައި ރައްޔިތުންނަށް އިހާނެތިކޮށް ކަންތައް ކުރާ އެންމެނަށް ވެސް މާތް الله ލައުނެއް ލައްވާނެ” މިހެން ބުނި ބަސްކޮޅެވެ. ހަގީގަތުގައި މި ޕެކޭޖު ފޮނުވާ ފަރާތުން ދީފައިވާ މައުލޫމާތު އެބޭފުޅާއަށް ނަގައި ނުގަނެވުނީއެވެ. އޭގައި ވަނީ އެ ޕެކޭޖު އެދުވަހު ރާއްޖެއަށް އައިސްފައިވާ ވާހަކައެވެ. ނަމަވެސް އެތައް ހާސް ޕެކޭޖެއް ރާއްޖެ އަަންނައިރު ސިސްޓަމަށް އެހުރިހާ އެއްޗެއް އެންޓަރ ކުރަން ވެސް ވަގުތު ނަގާނެއެވެ. ހުރިހާ ޕެކޭޖެއް ރާއްޖެ އަންނަ ދުވަހު އޭގެ ވެރިފަރާތަށް ރައްދު ނުކުރެވިދާނެއެވެ.
އެހެންނަމަވެސް އަޅުގަނޑު ހިނިތުންވެ ހުރެ އެ ބޭފުޅާއާއި ވާހަކަ ދެއްކީ ހިތްހެޔޮ ކަމާއިއެކުގައެވެ. އެހެން ދުވަސްތަކުގައި އެފަދައިން ކަސްޓަމަރުން މާ ބާރަށް ހަޅޭ ލެވި ކަމުގައި ވީނަމަވެސް ދުވަސް ނިމިގެން ގެއަށް ދާއިރުގައި އެކަންތައް ހަނދާނެއް ނުހުރެއެވެ. އެހެންނަމަވެސް އަޅުގަނޑު މި ކިޔައިދިން ހާދިސާ އަކީ އަބަދުމެ އަބަދަށް ހިތުގައި ވާނެ ކަމެކެވެ.
އާދޭހެވެ. ކަސްޓަމަރ ސާވިސް ދާއިރާގައި މަސައްކަތް ކުރަނީ “ރޮބޮޓުން”ނެއް ނޫނެވެ. ހަމަ އިންސާނުންނެވެ. އެހެންމީހުންގެ ހިތެއްވާ ފަދައިން އެމީހުންގެ ވެސް ހިތެއްވާނެއެވެ. އަސަރު ކުރާނެއެވެ. އެއްވެސް އިންސާނަކީ ފުރިހަމަ މީހެއް ނޫނެވެ. ކުރާ ކަންކަމުގައި މައްސަލަ ޖެހިދާނެއެވެ. މައްސަލަ ޖެހުމުން ހަޅޭވެސް ލެވިދާނެއެވެ.
ނަމަަވެސް އެފަދަ ކަމެއް ދިމާވުމުން އަޅުގަނޑު ކުރިން ދެންނެވި މޭރުމުން އެ މުވައްޒަފަކާ ދިމާލަށް މުޚާތަބު ކުރުމަކީ ރަނގަޅު ގޮތެއް ހެއްޔެވެ؟ ނޫނެކެވެ. އެމީހުންވެސް އެކަން އެނގިތިބެ އެ މަސައްކަތް ކުރަނީ ހަމަ ތިޔަ ކަސްޓަމަރުންގެ ޚިދުމަތުގައެވެ. ވަރުބަލި ވެސް ވާނެއެވެ. މަސައްކަތަށް ނައިސް ގޭގަ ވެސް ހުރެވިދާނެއެވެ. އެހެނަސް އެމީހުން ގޭގައި މަޑުކުރުމުގެ ސަބަބުން އެ ޚިދުމަތް ދޭން ތިބޭނީ ވަކި ކޮން ބައެއްހެއްޔެވެ؟
މިއީ ކަސްޓަމަރ ސާވިސް ދާއިރާގައި މަސައްކަތް ކުރަމުން ދާ މުވައްޒަފެއްގެ ވާހަކައެވެ. އެހެން މީހުނެކޭ އެއްފަދައިން ކަސްޓަމަރ ސާވިސްގައި އުޅޭ މީހުނަށް ވެސް އެހެންމީހުންގެ އިޙުތިރާމް ލިބުން ޙައްޤެވެ. އެއީ ބަޔަކަށް ޚިދުމަތް ހޯދައިދިނުމަށް ތިބޭ ހިތްވަރު ގަދަ ބައެކެވެ.
