ހަގީގީ ހާދިސާ: "ބުންޏޭ، ބުންޏޭ" ވާހަކަތަކުގެ ސަބަބުން އަހަންނަށް ދިމާވި ގޮތް
މިއީ ރައްޓެއްސަކަށް ދިމާވި ކަމެއްގެ ވާހަކައެކެވެ. ވާހަކަ ކިޔައިދިން އިރު ހީހީ ހަލާކު ނުވީ ކިރިޔާއެވެ. އަދި މިހާރު ވެސް އެކަން ހަނދާން ވުމުން ހިނި އަންނަ ގޮތް ވެއެވެ. ނަމަވެސް ޙަގީގަތުގައި ހިނިއަޔަސް މިއީ އަޅުގަނޑުމެންގެ މުޖުތަމަޢުގައި އޮތް ނުރައްކާތެރި މައްސަލައެކެވެ. ބައިބައިވުމާއި ހަމަނުޖެހުމަށް ހުށަހެޅޭ އެންމެ ބޮޑު ސަބަބުގެ ވާހަކައެކެވެ.
ކޮންމެއަކަސް މިވާހަކަ ތިޔަ ކިޔުންތެރިންނަށް މި ދޫކޮށްލަނީ އޭނާ ކިޔައިދިން ގޮތަށެވެ.
"އަހަރެންގެ އުފަން ރަށަށް މިދިޔަ އަހަރުގެ ޑިސެމްބަރު މަހު ދިޔައީ ރަށަށް ނުދާތާ 2 އަހަރު ފަހުންނެވެ. އަހަރެން ރަށަށް ނުދިޔަ ނަމަވެސް ރަށުގައި ކުޑައިރު އަދި ސުކޫލް ދައުރުގައި އެކުގައި އުޅުނު ރައްޓެހިންގެ މަތިން އަހަރެން ހަނދާނެއް ނުނެތެއެވެ. އަދި އަހަރެން އަބަދުވެސް ރަށުގެ ރަހުމަތްތެރިންނާ ގާތް ގުޅުމެއް ބާއްވަމެވެ.
ކޮންމެއަކަސް އަހަރެން ރަށަށް ދިޔައީ ހުކުރު ދުވަހެއްގެ ހެނދުނުއެވެ. އަހަރެން ރަށަށް އައިކަން އެނގިގެން އަހަރެންގެ އަންހެން ރައްޓެއްސެއް އަހަންނަށް ގުޅީ އަހަރެން ހުކުރަށް ދިއުމަށް ތައްޔާރު ވާން ހުއްޓައެވެ. ހިޝްމާ (އަސްލު ނަމެއް ނޫން) އަހަންނަށް ގުޅާފައި ބުނީ، ހުކުރުން ފައިބައިގެން އެގެއަށް ކާން ދިޔުމަށެވެ. ހިޝްމާ އަކީ އަހަރެންގެ ސުކޫލް ދައުރުގެ އެންމެ ގާތް އެއް ރަހުމަތްތެރިޔާއެވެ.
ކޮންމެއަކަސް ހުކުރު ނަމާދުން ފައިބައިގެން އަހަރެން ހިޝްމާމެންގެ ގެއަށް ކާން ގޮސްފީމެވެ. ކައިގެން އަހަރެން އެގެއިން ނިކުތްއިރު މާ ގިނަ ބަޔަކު މަގުމަތީގައި ފެންނާކަށް ނެތެވެ. ނަމަވެސް މަގުގެ އެއް ކައިިރިއެއްގައި ހުރި ބަނބުކެޔޮ ގަހެއްގެ ދޮށުގައި "އަނގަތަޅަން" ހަރު އުމުރުގެ ދެތިން އަންހެނަކު ތިއްބެވެ. އަހަރެން ފެނުމުން ފާޑަކަށް އަހަންނާ ދިމާލަށް ބަލާހެން ހީވިއެވެ. ރަށަށް އައިސްފިނަމަ އަބަދު ވެސް މިކަހަލަ ކަންކަމާ ކުރިމަތިލާން ޖެހޭތީ މާބޮޑަށް އަޅައެއް ނުލަމެވެ.
ކޮންމެއަކަސް އަހަރެން ގެއަށް ދިޔައީ ދަތުރުކޮށްފައި އައުމުން ވެފައި ހުރި ވަރުބައްޔެއްގެ ސަބަބުން ނިދާލާނީއޭ ހިތާއެވެ. ގެއަށް ގޮސް އަހަރެންގެ ކޮޓަރިއަށް ވަދެ ޖައްސާލުމާއެކު ނިދިއްޖެއެވެ. ހޭލެވުނީ ފޯން ރިންގު ވާ އަޑަށެވެ. ބަލާލިއިރު ގުޅަނީ އަހަރެންގެ އެކުވެރި ހަމީދެވެ. އެއީ އަހަރެންގެ ސުކޫލް ދައުރުގެ ގާތް މިތުރެކެވެ. ހަމީދު ބުނީ އޭނާއާއެކު ރަށުގެ ރެސްޓޯރަންޓަކަށް ކޮފީއަކަށް ދިއުމަށެވެ.
ހަމީދުއާއި އޭނާގެ ލޯބިވެރިޔާ އަދި ހިޝްމާއާއެކު އަހަރެން ދިޔައީ ރަށުގެ ބަނދަރު ސަރަހައްދުގައި ހަދާފައިވާ ރެސްޓޯރަންޓަކަށެވެ. ނަމަވެސް ހިޝްމާއާއި އަހަންނަކީ ލޯބީގެ ގުޅުމެއް އޮންނަ ދެމީހުންނެއް ނޫނެވެ. އަހަރެންގެ ބައިވެރިޔަކީ އެހެން ރަށެއްގެ ކުއްޖެކެވެ. ކޮންމެއަކަސް ކޮފީ ނިންމާލުމަށްފަހު އަހަރެންގެ ސައިކަލުގައި ހިޝްމާ ގެއަށް ލައިދިނުމަށް ދިޔައީމެވެ.
ހިޝްމާ ގޮވައިގެން ސައިކަލުގައި ދުއްވާފައި ދަނިކޮށް އަނެއްކާ ވެސް މި ދާން ޖެހުނީ އެއްކަލަ ބަނބުކެޔޮ ގަހުގެ ކައިރިންނެވެ. އެތަނުގައި އެވަގުތު ވެސް ހަރު އުމުރުގެ އަންހެނުން ތަކެއް ތިއްބެވެ. އަހަރެމެން ދާން ފެށުމުން އަނެއްކާ ވެސް ފާޑަކަށް ބަލަން ފެށިއެވެ.
އަހަރެން ހިޝްމާ ގެއަށް ލުމަށްފަހު ދިޔައީ އަހަރެންގެ މާމަމެންގެ ގެއަށެވެ. އެގެއަށް ގޮސް މާމަ އާއި ކާފައާއެކު ވަގުތުކޮޅެއް ހޭދަކޮށްލުމަށް ފަހު އަހަރެން ނިދަން ދިޔައީމެވެ.
ކޮންމެއަކަސް ޖެހިގެން އައި ދުވަހު އަހަންނަށް ހޭލެވުނީ ގާތްގަނޑަކަށް 9 ޖަހަން އުޅެނިކޮށެވެ. ތެދުވެގެން އަހަރެން ސައިބޯން ދިޔައީމެވެ. ސައިބޯން އިންދާ އަހަންނާ މަންމަ ކުރި ސުވާލުން އަހަރެން އަނގައަށް ލައިލައި އިން ރޮށިކޮޅަށް ވެސް ވީ ކިހިނެއް ކަމެއް ނޭނގެއެވެ. ދިޔައީ އަރުތެރެއިން އެތެރެއަށް ކަމެއް ނުވަތަ ހަފާނުލާ ހިރުގަނޑުގައި ތާށިވީ ކަމެއް ވެސް ނޭނގެއެވެ.
ވާނީ ވެސް އެހެންތާއެވެ. މަންމަ އެހީ އަހަންނާއި ހިޝްމާއާ އުޅެނީ ލޯބީގެ ގޮތުން ގުޅިގެން ހެއްޔޭ ވިއްޔާއެވެ. އަހަރެން މަންމަ ގާތުގައި ތިޔައީ ކާކު ދެއްކި ވާހަކައެއްތޯ އަހާލީމެވެ. ބުނީ މަންމަގެ އެކުވެރި ވިރާޝާ ދެއްކި ވާހަކައެއް ކަމަށެވެ. އެގޮތުން ހިމްނާގެ ގެއަށް އަހަރެން ދިޔައީ އޭނާގެ މައިންބަފައިންނާ ވާހަކަ ދައްކާ ކައިވެނީގެ ކަންތައްތައް ހަމަ ޖައްސަން ކަމުގައި މަންމަ ގާތުގައި އެބުނާ ވިރާޝާ އެއް އޮތީ ބުނެފައެވެ. އަދި ދެމީހުން ރޭގައި ރަށް ކުޑަކޮށް ބުރުޖަހަން އުޅުނު ކަމުގައިވެސް މަންމަ ގާތުގައި ވިރާޝާ އޮތީ ބުނެފައެވެ.
އަހަރެންގެ ކައިރިއަށް ރުޅިވެސް އައެވެ. ނަމަވެސް ޕަކަޕަކަ އަޅާފައި އަހަންނަށް ފެށުނީ ހޭނށެވެ. އާނ އެހެންޏާ މީހަކު އަންހެން ކުއްޖެއްގެ ގެއަށް މެންދުރުގެ ކެއުމަށް ގޮސް ނިކުތްތަން ފެނުމުން ވެސް އެދިޔައީ ވަލީ ހޯދަން ވިއްޔާއެވެ. އަހަރެން މަންމަ ގާތުގައި ބުނީމެވެ. މަންމާއެވެ. ތިކަހަލަ ވާހަކަތައް ގަބޫލު ނުކުރާށެވެ. އަދި ކަންވީގޮތް މަންމައަށް ކިޔައިދިނީމެވެ. މަންމަވެސް ފެށީ ހޭނށެވެ.
އަހަރެން ދެން ދިޔައީ އަހަރެންގެ ތުއްތަގެ ގެއަށެވެ. ދިއުމުން ތުއްތަ އަހަރެންގެ ގާތުގައި އެހި ވާހަކައިން އަހަރެން ހުރި ތަނަށް ނުވެއްޓުނީ ކިރިޔާއެވެ. ތުއްތަ ގާތުގައި ތުއްތަގެ ރައްޓެހި އައިންތު ދައްކާފައި އޮތް ވާހަކައެކެވެ.އަހަރެން ހިޝްމާއާ އިންނަން ރަން ކިޔައިފި ޔޯލައެވެ. 4000 ރުފިޔާ އަށް ޔޯލައެވެ. އަދިވެސް ތުއްތަ ބުނި ގޮތް އަހަރެން ހަނދާން އެބަހުއްޓެވެ.
"އެއުޅޭ އައިންތު ބުނި، ވިރާޝާ ބުންޏޯ، ހަފީޒާ ބުންޏޭ އެގޯތި އަމީނާ ބުންޏޭ ހަސަންފުޅު ގޯތި ހިޝްމާއާ ދޮންހުސޭނު ގޯތި ފަޒީލުއާ އުޅެނީ އިންނާށޭ. ރޭ ރުއްސައިފިޔޭ ވެސް ބުންޏޭ ބުނި. 4000 ރުފިޔާއަށް ރަން ކިޔައިފިއޯ ވެސް. ދެން އަހަރެން ބުނިން، އެސޮރު އަހަރެމެންނަށް އަންގާ ނުލާ ތިވަރު ކަމެއް ނުކުރާނެޔޭ"
ކޮންމެއަކަސް މިވާހަކަ އަޑުއަހައި ނިމުނުއިރު އަހަރެން ހުރީ ހަގީގަތުގައި ރުޅި އައިސްފައެވެ. އަންހެން ކުއްޖަކު ގޮވައިގެން ސައިކަލުގައި އޭނާ ގެއަށް ލައިދޭން ދިޔުމުން އޭނާއާ އަހަރެން އިންނަން އުޅޭ ކަމަށް ވީއެވެ. ހުކުރުން ފައިބައިގެން މެންދުރު ކެއުމަށް އެގެއަށް އަހަރެން ދިއުމުން އަހަރެން އޭނާއާ އިންނަން ވަލީ ހޯދަން ދިޔައީ ކަމަށްވެ އޭނާ އަހަންނަށް ރަން ކީ ކަމަށް ވީއެވެ. މިއީ ދެން ބޮޑުވަރެވެ.
އަހަރެން ރަށުގައި ހުރީ ޖުމުލަ 5 ދުވަހުއެވެ. އެ 5 ދުވަހުވެސް އަހަރެންގެ ގާތުގައި ކޮންމެވެސް މީހަކު ބުންޏޭ ކިޔާފައި ކޮންމެވެސް މީހަކު އަހަރެންގެ ގާތުގައި އެވާހަކަ ދެއްކިއެވެ. އަހަރެންވާ ހިތަށް އެރިއެވެ. ބުންޏޭ، ބުންޏޭ ވާހަކަތައް ހާދަހާ ވާ މަޖަލެވެ. އެކަކު ކައިރިން އަނެކަކު ކައިރިއަށް ދާއިރު މިއޮންނަނީ ބަދަލުވެފައި ވިއްޔާއެވެ.
މިއީ އަހަރެން 2 އަހަރު ފަހުން ރަށަށް ދިއުމުން އަހަރެންނަށް ދިމާވި ތަފާތު ކަމެކެވެ. ތަނެއްގައި އިއުލާނެއް ޖަހައިގެން ކަމެއް އެންގުމަށްވުރެ، ހަރު އުމުރުގެ އަންހެނެއްގެ ގާތުގައި އެވާހަކަ ބުނުމުން ރަށު ތެރޭގައި އެވާހަކަ ފެތުރުން މާ އަވަސްވާނޭ އަހަރެންގެ ހިތަށް އެރިއެވެ."
މިއީ އަޅުގަނޑުގެ އެކުވެރިޔާ އަޅުގަނޑަށް ކިޔައިދިން ވާހަކައެކެވެ. މިވާހަކަ އަޑު އަހާފައި ދެން އަޅުގަނޑު ބުނާނީ ވެސް ކީކޭ ހެއްޔެވެ. "ބުންޏޭ، ބުންޏޭ" ވާހަކަތައް އަހަރެމެން އަދިވެސް ގަބޫލުކުރުން ހުއްޓާކަށް ނުވޭ ވިއްޔާއެވެ.ކޮންމެ ވާހަކައެއް ވެސް މިވެނި މީހަކު ބުންޏޭ އެވެނި މީހަކު ބުންޏޭ ބުނެގެން ބުނާއިރަށް ގަބޫލު ކުރާނަމަ، ސަލާމަތެއް ނެތް ކަން ގައިމެވެ.
ތީީ މިހާރުު ރަށްފުށުގަަ ޢާއްމުކަމެއް. ރީއްޗަށްް ބުނާނަމަަ ވަބާއެއްް. ތަންތަންް ފަނާވެދަނީީ އެހެންވެ. ފިތުނަަ ފަސާދަަ ޢާއްމުވަނީީ މިގޮތައްް ވާހަކަަ ދައްކާތީވެެ.
ހަމަ އަސްލުވެސް ބުންޔެ ބުންޔެ ވާހަކަ ނުވާނެ އަދު އަހަން