ކޮވިޑް-19ގެ ނުރައްކަލުން އަރައިގަނެވިއްޖެ ކަމަށް ނިންމުމަކީ ގޯހެއް: މަބްރޫކް
ކޮވިޑް-19ގެ ނުރައްކަލުން ރާއްޖެ އަށް އަރައިގަނެވިއްޖެ ކަމަށް ނިންމުމަކީ މިވަގުތު ހެދޭނެ އެންމެ ބޮޑު ގޯސް ކަމަށް ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ ރާއްޖެ ވަށައިގެން ޠޫފާނެއްހެން އެނބުރެމުންދާކަމަށާ، ކާފިއުގެ މުއްދަތު އުވާލާފައިވަނީ ކޮވިޑް-19 ގެ ނުރައްކާ ރާއްޖެއަށް ކުޑަވެގެނެއް ނޫން ކަމަށެވެ.
"ކޮންމެ ދުވަހަކު 3 ގަޑިއިރަށް އުޅަނދުފަހަރު ދުއްވުން މަނާކޮށް ޢާންމުން މަގުމަތީގައި ނޫޅުމަށް އަންގައި ޢިއުލާންކުރުމާއެކު ދެންފެނުނީ މަނާ ވަގުތު ނިމުމާއެކު ކުރިއަށްވުރެ މާގިނަބަޔަކު މަގުމަތީގައި ތޮއްޖެހޭ. އެގޮތައް އޮތުމުން ފިހާރަތަކަށް އެއްފަހަރާ ދިއުންފަދަ ކަންކަން ފާހަގަކުރެވުމުން ތޮއްޖެހުން އިތުރުވާތީ އެކަން ހުއްޓުވުމަކީ ކާފިއުގަޑިއެއް ނުބާއްވަން ނިންމީ." މަބްރޫކް ވިދާޅުވިއެވެ.
މަބްރޫކް ވަނީ މިކަމުގައި އަމަލުކުރަމުންދާގޮތް ޤައުމެއްގެ ގޮތުގައި، ރައްޔިތެއްގެ ގޮތުގައި ބަދަލުނުކުރަން އިލްތިމާސް ކުރައްވާފައެވެ. އަދި ވީހާވެސް ބޮޑަށް މިކަމުން ސަމާލުވެ ކުރިއަށްއޮތް ދުވަސްދުވަހުގައިި މަސައްކަތްކުރުން މުހިއްމު ކަމަށް ވެސް އޭނާ ވިދާޅުވިއެވެ.
ކޮވިޑް-19އާ ގުޅިގެން ކޮންޓެކްޓް ޓްރޭސްކޮށް އަލާމާތްތައް ފެނުނަސް ޕޮޒިޓިވް ނުވާމީހުންނާއި، ރިސޯޓުތަކުގައި މުއްދަތު ހޭދަކުރުމަށްފަހު ޢާންމުންގެ ތެރެއަށްދާ މީހުންނާމެދު މުޖުތަމަޢުގައި މިހާރު ދެކޭގޮތް ބަދަލުކުރަން ޖެހޭކަމަށްވެސް މަބްރޫކް ވިދާޅުވިއެވެ.
"އަޅުގަނޑުމެންނަށް އެބައިވޭ ހިތާމަވެރި ވާހަކަތައް، ރަށްރަށަށް އެމީހުން ނާރުވާ، އެއީ ބަލިބައެއްކަމަށް ބަލައިގެން ދިމާވާން ބޭނުންނުވާ ދަށުދަރަޖައިގެ ބައެއްގެގޮތުގައި އެމީހުންނާދޭތެރޭ ކަންތައްކުރާކަހަލަ ވާހަކަތައް. މިކަހަލަ ދަނޑިވަޅެއްގައި އަޅުގަނޑުމެންނަށް އެނގޭނީ އަޅުގަނޑުމެންގެ އަސްލު ގޮތާއި، މުޖުތަމައެއްގެ ގޮތުގައި އަސްލު ސިފަ" މަބްރޫކް ވިދާޅުވިއެވެ.
ރާއްޖޭގައި ކޮވިޑް-19އަށް ފައްސިވި މީހުންގެ އަދަދު އިއްޔެ ވަނީ 20 އަށް އަރާފައެވެ. މިހާތަނަށް މިބަލިން 14 މީހަކުވަނީ ރާއްޖޭގައި ރަނގަޅުވެފައެވެ.
