ފެންވަރަން އެންމެ ރަނގަޅު ވަގުތަކީ ކޮބާ؟
ގިނަ މީހުންނަށް ދުވަސް ފެށެނީ ހެނދުނު ފެންވަރާލުމުންނެވެ. ހަމަ އެ ފަދައިން، ގިނަ މީހުންނަށް އަރާމުކޮށް ނިދާލެވެނީ ވެސް ރޭގަނޑު ފެންވަރާލައިގެންނެވެ. ދުވާލަކު އެއް ފަހަރަށް ވުރެ ގިނަފަހަރު ފެންވަރާ މީހުންނާއި، ދެ ދުވަހުން އެއްދުވަހު ފެންވަރާ މީހުން ވެސް އުޅެއެވެ.
އެކި މީހުން ގަޔާވަނީ އެކި ގޮތެވެ. ނަމަވެސް ތަޖުރިބާ ކާރުން ބުނަނީ ފެންވަރަން އެންމެ ރަނގަޅު ވަގުތަކީ ހަވީރު ވަގުތު ކަމަށެވެ. އެއީ ރާއްޖެއަށް ބަލާއިރު އާންމުކޮށް ފިނިހޫނުމިން އެއް މިނެއްގައި ހިފެހެއްޓިފައި ހުންނަ ވަގުތަށް ވާތީއެވެ.
ނަމަވެސް ހެނދުނު ނުވަތަ ރޭގަނޑު ފެންވެރުމަކުން ވެސް އެއްވެސް ގޯހެއް ނެތެވެ. އެ ވަގުތުތަކުގައި ވެސް އެކި ފައިދާތައް ލިއްބައިދެއެވެ.
މިސާލަކަށް ހެނދުނު ފެންވަރާ ނަމަ، އެ ދުވަހަކަށް އެމީހާގެ ހަށިގަނޑާއި މޫޑު ވެސް ތައްޔާރުކޮށްލައެވެ. ހަށިގަނޑުން ނުކުންނަ ތެޔޮކަން ފިލައި، ހަންގަނޑަށް ވެސް އަރާމު ލިބެއެވެ. އަދި ރޭގަނޑު ހަށިގަނޑުގައި އުފެދޭ ޖަރާސީމުތައް ވެސް ނައްތާލައެވެ.
ރޭގަނޑު ނިދުމުގެ ކުރިން ފެންވަރާ ނަމަ، ސްޓްރެސް ނެތިކޮށްލުމާއި ސިކުނޑިއަށް ވެސް އަރާމު ލިއްބައިދެއެވެ. އަދި މުޅި ދުވަހު ހަށިގަނޑުގައި އަށަގެންފައި ހުންނަ ހިރަފުހާއި ދާތައް ދުއްވާލައި، އަރާމުކޮށް ނިދާލަން މަގުފަހިކޮށްދެއެވެ.
ދެން އުފެދޭ ސުވާލަކީ ކޮންމެ ދުވަހަކު ފެންވަރަން ޖެހޭ ހެއްޔެވެ؟ އަމިއްލަ ސާފުތާހިރުކަމަށް ޓަކައި ކޮންމެ ދުވަހަކު ފެންވެރުމަކީ މުހިންމު ކަމެކެވެ. ނަމަވެސް ހަންގަނޑު ރީތިވެފައި، ގައިން ނުބައި ވަސް ނުދުވާ މީހުން ކޮންމެ ދުވަހަކު ފެން ނުވެރިޔަސް މައްސަލައެއް ނުޖެހޭނެ ކަމަށް ތަޖުރިބާކާރުން ބުނެއެވެ.
ކޮންމެ ދުވަހަކު ފެން ނުވަރާ މީހުންގެ ހަންގަނޑު ރަނގަޅަށް މޮއިސްޗަރައިޒްކޮށް، ގިނައިން ޑިއޯޑްރެންޓް ބޭނުން ކުރުމަށް ޑޮކްޓަރުން އިލްތިމާސް ކުރެއެވެ.
Ads by STO
