ހޯރަފުށީ އެއާޕޯޓަށް ވަކިން އަރައިފޭބޭނެ ގޮތަށް ފާލަމެއް ހަދަން ނިންމައިފި
ހއ. ހޯރަފުށީގެ ފަޅުން ހިއްކި ސަރަހައްދުގައި ތަރައްގީކުރަމުން އަންނަ އެއާޕޯޓަށް ވަކިން އަރައި ފޭބޭނެ ގޮތް ހަދަން ހަމަޖެހިފައިވާ ކަމުގައި މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ހޯރަފުށީ އެއާރޕޯޓަށް އަރައިފޭބޭނެ ގޮތެއް އަތޮޅުގެ އެހެން ރައްޔިތުންނަށް ފަހިކޮށްދިނުމަށް ވަކިން ފާލަމެއް އެޅުމާއިމެދު ސަރުކާރުގެ ވިސްނުން ހުރިގޮތެއް އޮޅުން ފިލުވުމަށް މިއަދުގެ މަޖިލީހުގެ ޖަލްސާގައި އިހަވަންދޫ ދާއިރާގެ މެމްބަރު މުހައްމަދު ޝިފާއު ކުރެއްވި ސުވާލަށް ޖަވާބު ދެއްވަމުން، މިނިސްޓަރ އަސްލަމް ވިދާޅުވީ އެއަރޕޯޓަށް ވަކިން އަރައިފޭބޭނެ ގޮތްތަކެއް އަތޮޅުގެ އެހެން ރަށްތަކަށް ފަހިކޮށް ދިނުމަށް ވަކި ފާލަމެއް އަޅަން ހަމަޖެހިފައިވާކަމަށެވެ.
އެ އަތޮޅުގައި ، މީހުން ދިރިއުޅޭ 14 ރަށް އޮންނައިރު 12 ރަށަކުން ވަނީ އެކަމާ ގުޅޭ ކަންބޮޑުވުންތައް ރައީސަށް ހިއްސާކުރައްވައިފަ އެވެ. އެމްޓީސީސީއާ ހަވާލުކޮށްގެން ހަދަމުން އަންނަ އެއާޕޯޓުގެ ބޮޑުބައެއް ނިމިފައިވާއިރު މިހާރު ކުރަމުން އަންނަނީ ޓާމިނަލްއާ ގުޅޭ ކަންކަމެވެ. އެ އެއާޕޯޓު ތަރައްގީ ކުރުމަށްޓަކައި 842،200 އަކަ މީޓަރުގެ ބިން އެ ކުންފުނިން ވަނީ ހިއްކައިފަ އެވެ.
ޕީއެސްއެމްއާއި ވާހަކަ ދައްކަވަމުން ހއ.އަތޮޅު ކައުންސިލް ރައީސް ވިދާޅުވީ ކައުންސިލްތަކުން ވަކިން ފާލަމެއް އެޅުމަށް އެދުނީ މިހާރު އޮތްގޮތުން ދަތުރުގެ ޚަރަދުތައް ބޮޑުވެ ކުރަންޖެހޭ ދަތުރުވެސް ދިގުވާތީކަމަށެވެ. ނަމަވެސް ވަކިން ފާލަމެއް އަޅައި އެއަރޕޯޓަށް އަރައިފޭބޭނެ ގޮތަކަށް ހެދުމުން މިކަމަށް ހައްލެއް ލިބިގެންދާނެ ކަމަށް ކައުންސިލްތަކުން ބުނެއެވެ.
މިމައްސަލައިގައި ވާހަކަ ދައްކަވަމުން އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވީ މިސަރުކާރަކީ ރައްޔިތުންގެ އަޑު އަހާ ރައްޔިތުންގެ ބޭނުންތައް ފުއްދައިދޭނެ ސަރުކާރެއްކަމަށެވެ. އަތޮޅުގެ ގިނަ ރަށްތަކުން ހޯރަފުށީގައި އަޅާ އެއާރޕޯޓަށް އަރައިފޭބޭނެ ގޮތެއް ހަމަޖެއްސުމަށް އެދުމުން އެކަން ކޮށްދެއްވާނެކަމުގެ ޔަގީންކަން ކުރިން ވެސް އޮތްކަމަށް ޝިފާއު ވިދާޅުވިއެވެ.
ޖުމްލަ 198 މިލިއަން ރުފިޔާ ޚަރަދުކޮށްގެން ހިންގާ މި މަޝްރޫއު އެމްޓީސީސީއާ ހަވާލު ކުރުމުގެ އެއްބަސްވުމުގައި ސޮއިކޮށްފައި ވަނީ 2019 ވަނަ އަހަރުގެ މާޗް މަހުގެ 25 ގައެވެ. އަދި އެ މަސައްކަތް މިދިޔަ އަހަރު ފައްޓަވައި ދެއްވީ ރައީސް އިބްރާހިމް މުޙައްމަދު ޞާލިހެވެ.
Ads by STO
