މި އަހަރުގެ އައިޓީބީ ފެއާ : ރާއްޖޭން ފުރިހަމައަށް ބައިވެރިވާން ތައްޔާރު
ދުނިޔޭގެ އެންމެ ބޮޑު ފަތުރުވެރިކަމުގެ މައުރަޒު ކަމަށްވާ "އައިޓީބީ ބާލިން 2026"ގައި ބައިވެރިވުމަށް ވިޒިޓް މޯލްޑިވްސް ކޯޕަރޭޝަން (ވީއެމްސީ)އިން ފުރިހަމައަށް ތައްޔާރުވެއްޖެއެވެ.
އަންނަ މާޗް މަހު ޖަރުމަނުވިލާތުގެ ބާރލިންގައި ބޭއްވުމަށް ހަމަޖެހިފައިވާ މި ފެއާގައި، ރާއްޖޭގެ ފަރާތުން ގިނަ ހަރަކާތްތަކެއް ކުރިއަށް ގެންދިއުމަށް ވަނީ ރާވާފައެވެ. އޭގެ ތެރޭގައި އެންމެ ހާއްސަ އެއް ހަރަކާތަކީ ގިނަ ބަޔަކު އިންތިޒާރުކުރާ "މޯލްޑިވިއަން ނައިޓް"އެވެ. މީގެ އިތުރުން 2027ވަނަ އަހަރާ ގުޅުން ހުރި މުހިންމު ކަންތައްތަކެއް ވެސް މި ފެއާގެ ތެރެއިން އިއުލާންކުރުމަށް ވަނީ ހަމަޖެހިފައެވެ.
ވިޒިޓް މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝިއުރީ ވިދާޅުވީ އައިޓީބީ ބާލިންއަކީ ރާއްޖޭގެ ފަތުރުވެރިކަން އިޝްތިހާރުކުރުމަށް ލިބޭ އެންމެ ބޮޑު އެއް ފުރުސަތު ކަމަށެވެ. އަދި "މޯލްޑިވިއަން ނައިޓް" އަކީ ރާއްޖޭގެ ސަގާފަތާއި މެހެމާންދާރީ ދުނިޔެއަށް ދައްކާލުމަށް ލިބޭ ރަނގަޅު ފުރުސަތެއް ކަމަށް އޭނާ ފާހަގަކުރެއްވިއެވެ.
ޖަރުމަނު މާކެޓުގެ މުހިންމުކަން
2025ވަނަ އަހަރު: ޖަރުމަނުން އެކަނި ރާއްޖެއަށް 167,822ފަތުރުވެރިން ޒިޔާރަތްކުރިއެވެ.
މަގްސަދު: ދުނިޔޭގެ ސަމާލުކަން ރާއްޖެއަށް ހޯދުމާއި، ބައިނަލްއަގުވާމީ ފަރާތްތަކާ އެކު ސްޓްރެޓެޖިކް ގުޅުންތައް ބަދަހިކުރުން.
ޖަރުމަނާއި ވިލާތުގެ މާކެޓަކީ ރާއްޖޭގެ ފަތުރުވެރިކަމުގައި އަދި ވެސް އެންމެ މުހިންމު ދައުރެއް އަދާކުރާ އެއް ސަރަހައްދެވެ. ވީއެމްސީގެ އަމާޒަކީ މިފަހަރުގެ ފެއާ މެދުވެރިކޮށް ރާއްޖެއަކީ ދުނިޔޭގެ އެންމެ މަގްބޫލު މަންޒިލްގެ ގޮތުގައި ދެމެހެއްޓުމަށް ބޭނުންވާ އިތުރު ކުރިއެރުންތައް ހޯދުމެވެ.
