ޕީޓްރަލް އަޙްމަދުބެ އަވަހާރަވުމުން ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެ
ރާއްޖޭގެ ކާބޯތަކެތީގެ ސިނާޢަތުގައި ބައިޤަރުނަށްވުރެ ދިގު މުއްދަތެއްގައި ޚިދުމަތްކުރެއްވި މަޝްހޫރު ވިޔަފާރިވެރިޔާ އަޙްމަދު އާދަމް (ޕީޓްރަލް އަޙްމަދުބެ) އުމުރުފުޅުން 86 އަހަރުގައި މިއަދު މާލޭގައި އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެ މަރްޙޫމްގެ ޢާއިލާއަށާއި މައްޗަންގޮޅީގެ ރައްޔިތުންނަށް ތަޢުޒިޔާ ފޮނުއްވައިފިއެވެ.
މީސްމީޑިއާ 'އެކްސް' ގައި ހިއްސާ ކުރެއްވި ޕޯސްޓެއްގައި ރައީސް މަރްޙޫމް އަޙްމަދުބެ ސިފަކުރެއްވީ ވަރަށް ހިތްހެޔޮ އަދި އަޚްލާޤު ރަނގަޅު ނަމޫނާ ޝަޚްޞިއްޔަތެއްގެ ގޮތުގައެވެ. މީގެ އިތުރުން މައްޗަންގޮޅީގެ ތަރައްޤީއަށާއި، ޚާއްޞަކޮށް ވިކްޓްރީ ސްޕޯޓްސް ކްލަބް އަދި ކްލަބް ލެގޫންސް ފަދަ ކުޅިވަރު ޖަމާޢަތްތަކަށް އޭނާ ވެދެއްވި ދީލަތި އެހީތެރިކަން އެމަނިކުފާނު ފާހަގަކުރެއްވިއެވެ.
ނަވާރަސަތޭކަ ހަތްދިހައިގެ އަހަރުތަކުގެ ތެރޭގައި ލޮނުމަސް ފަދަ އަމިއްލަ އުފެއްދުންތަކުން ވިޔަފާރީގެ ތެރެއަށް ވެންނެވި އަޙްމަދަކީ ދިވެހިންގެ މެދުގައި މަޤުބޫލުވި 'ގުރާބުތުނޑި ހޮޓާ' އާއި 'ހޮޓެލް ޕީޓްރަލް' ގެ ބާނީއެވެ. ކޭޓަރިންގ ދާއިރާގައި 55 އަހަރު ހޭދަކުރެއްވިއިރު، ދައުލަތުގެ ބޮޑެތި މުއައްސަސާތަކަށް ވެސް އޭނާ ވަނީ ފެންވަރު ރަނގަޅު ޚިދުމަތްތަކެއް ދިގު މުއްދަތަކަށް ފޯރުކޮށްދެއްވާފައެވެ. އަހްމަދުބެ އަވަހާރަވީއިރު އުމުރުފުޅުން 86 އަހަރެވެ.
މިއަދުގެ އަސުރު ނަމާދަށްފަހު އާސަހަރާ މިސްކިތުގައި މަރްޙޫމްގެ މައްޗަށް ކަށުނަމާދު ކޮށްފައިވާއިރު، ރައީސުލްޖުމްހޫރިއްޔާ ވަނީ މަރްޙޫމްގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރުކުރެއްވުން އެދި މާތްﷲ ގެ ހަޟްރަތުގައި ދުޢާ ދަންނަވާފައެވެ.
