ނޫސްވެރިކަމުގައި ގިނަ އަހަރުތަކެއް ހޭދަކުރެއްވި އިމާދު، ހިތުގެ ބައްޔަށް ފަރުވާ ހޯއްދަވަނީ
ނޫސްވެރިކަމުގައި ގާތްގަނޑަކަށް 30 ވަރަކަށް އަހަރު ހޭދަ ކޮށްފައިވާ އިމާދު ލަތީފު، ހިތުގެ ބައްޔަށް ފަރުވާ ހޯއްދެއްވުމަށް ރޭ އައިޖީއެމްއެޗް ގައި އެޑްމިޓު ކޮށްފިއެވެ.
އެނގިފައިވާ ގޮތުގައި އިމާދު މިވަގުތު އޮންނެވީ އައިސީޔޫ ގައެވެ. ރޭގައި އެމަނިކުފާނު އެޑްމިޓު ކުރުމަށްފަހު އެންޖިއޮޕްލާސްޓީ ހަދައި އިމާދުގެ ހިތަށް ސްޓެންޓެއް ލައްވާފައިވާ ކަމަށް ވެސް މައުލޫމާތު ލިބެއެވެ.
އައިސީޔޫ ގައި އޮންނެވި ނަމަވެސް އިމާދުގެ ހާލު ސްޓޭބަލް ކަމަށް ވެސް މައުލޫމާތު ލިބެއެވެ.
ކުރީގެ އެންމެ މަޝްހޫރު "ހަވީރު" ނޫހުން 1992 ގައި ނޫސްވެރިކަމުގެ ދާއިރާއަށް ނިކުންނެވި އިމާދު، އެނޫހުގައި ދިގު 17 އަހަރު ހޭދަ ކުރައްވާފައިވެއެވެ.
އިމާދު އެންމެ ފަހުން ހުންނެވީ ވީޓީވީ ގެ ނިއުސް ހެޑްގެ މަގާމުގައެވެ. ނަމަވެސް އެތަނުގައި ވެސް 10 ވަރަކަށް އަހަރު ހޭދަ ކުރެއްވުމަށްފަހު އެމަގާމުން މިދިޔަ އަހަރު އަމިއްލަފުޅަށް އިސްތިއުފާ ދެއްވާ، ފަހުން އެމަނިކުފާނު ވަނީ ސިޔާސީ ދާއިރާއަށް ނިކުންނަވާފައެވެ.
ނޫސްވެރިކަމުގެ ދާއިރާއަށް ގިނަ އަހަރުތަކެއް ވަންދެން ޚިދުމަތް ކޮށްދެއްވި އިމާދު ލަތީފު ވަނީ އެދާއިރާއިން ޝަރަފުވެރި "އަލިމަސް ގަލަން" ވެސް މިދިޔަ އަހަރު ހާސިލު ކުރައްވާފައެވެ.
މާތް ﷲ އިމާދު ލަތީފަށް އަވަސް ޝިފާއެއް ދެއްވާ، ބާއްޖަވެރި އުފާވެރި ޙަޔާތެއް ދެދުނިޔޭގައި ވެސް ދެއްވާށިއެވެ. އާމީން!
