ވަޒީފާއާ ބެހޭ ޓްރައިބިއުނަލްގެ މެންބަރު ސައުސަން ނިޔާވެއްޖެ
އިންޑިއާގައި ސިއްޙީ ފަރުވާ ހޯއްދަވަމުން ގެންދަވަނިކޮށް، ވަޒީފާއާ ބެހޭ ޓްރައިބިއުނަލްގެ މެންބަރުކަމުގެ މަޤާމުގައި ހުންނެވި އަލްއުސްތާޛާ ފާޠިމަތު ސައުސަން މިއަދުގެ ހެނދުނުގެ ވަގުތެއްގައި ނިޔާވެއްޖެއެވެ.
ޤާނޫނީ ދާއިރާގައި ގިނަ ދުވަސްތަކެއް ވަންދެން މަސައްކަތްކުރައްވައި، އަގުނުކުރެވޭފަދަ ޚިދުމަތްތަކެއް ޤައުމަށް ފޯރުކޮށްދެއްވާފައިވާ ސައުސަން އެ ޓްރައިބިއުނަލްގެ މެންބަރުކަމަށް އައްޔަންކުރައްވާފައި ވަނީ މިއަހަރުގެ އޭޕްރީލް މަހުގެ 15ވަނަ ދުވަހުއެވެ.
ފަންނީ ގޮތުންނާއި އަޚުލާޤީ ގޮތުން ނަމޫނާ ދެއްކެވި މި ކުޅަދާނަ ޤާނޫނީ ވަކީލު ކުއްލި ގޮތަކަށް ދުނިޔެއާ ވަކިވެވަޑައިގަތުމުގެ ފުން ހިތާމައިގައި، ޢާއިލާގެ މެންބަރުންނާއި ގާތް ރަޙުމަތްތެރިންގެ އިތުރުން ޤާނޫނީ ދާއިރާގައި ހަރަކާތްތެރިވާ ގިނަ އަދަދެއްގެ ބަޔަކު ދަނީ ހިތާމަފާޅުކޮށް ތައުޒިޔާގެ މެސެޖުތައް ފޮނުވަމުންނެވެ.
