ހަގީގީ ހާދިސާ: ސުނާމީގައި މައިންބަފައިން ޣަރަޤުވީ ލޯ ކުރިމަތީގައި
ކޮންމެ މީހެއްގެ ހަޔާތަކީ ވެސް އެތައް ވާހަކައަކުން ފުރިފައިވާ ހަޔާތެކެވެ. ހިތާމައާ ހިތްދަތި ކަމަކީ ކޮންމެ މީހެއްގެ ހަޔާތުގެ ފޮތުގައި ހިމެނޭ ބައެކެވެ. އެކި މީހުން އެކި މިންވަރަށް މި ޖަޒުބާތުގެ އަސަރުގައި ހަޔާތް ވޭތުކުރާއިރު ލޮލުގެ ކުރިމަތިން މައިންބަފައިން ދުނިޔެ ދޫކޮށްދާ މަންޒަރަކީ އެއްވެސް މީހަކަށް ތަހައްމަލު ކުރަން ފަސޭހަ މަންޒަރެއް ނޫނެވެ. އެ ހިތާމައިގެ އަސަރަކީ އެއްވެސް އިންސާނަކަށް ބަރުދާސްތުކުރަން ފަސޭހަ އަސަރެއް ނޫނެވެ. މިއީ އެފަދަ ވާހަކައެކެވެ.
ނިދާ ހޭލީ އައު ދުވަހަކަށް މަރުޙަބާ ކިޔަމުންނެވެ. އެއްވެސް ހާލެއްގައި އެދުވަހަކީ ޙަޔާތުގައި އަންނާނެ އެންމެ ބިރުވެރި ދުވަހަށް ވެދާނެކަން އެނގޭނީ ވެސް ފަހެ ކާކަށް ހެއްޔެވެ؟ ދުވަހަކުވެސް ހަނދާނުން ފިލައިގެން ނުދާނެ އެތައް މަންޒަރުތަކެއް އަހަރެން އެދުވަހު ދުށީމެވެ. މިހާރުވެސް އެމަންޒަރުތައް ކޮންމެ ދުވަހަކު ފެންނަ ކަހަލައެވެ.
އެހެން ދުވަސްތަކެކޭ ވެސް އެއްފަދައިން އަހަރެން ދިޔައީ ވަޒީފާއަށް ދިއުމަށް ތައްޔާރު ވަމުންނެވެ. ހެނދުނުގެ ނާސްތާ ނެގުމަށް ފަހު ގައިން މީރު ވަސް ދުއްވާލުމަށް އަހަރެން ދިޔައީ ސެންޓުފުޅި ހޯދުމަށް ކޮޓަރިއަށެވެ. ސެންޓު ބުރުވާލައިގެން ފަހު ގެއިން ބޭރަށް މިސްރާބު ޖެހީމެވެ.
މާ ބާރަށް މީހުން ހަޅޭއްލަވާ އަޑު އިވުމުން ބޭރަށް ނިކުމެ އެންމެ ފުރަތަމަ ވެސް އަހަރެންނަށް ބަލާލެވުނީ އަޑު އަންނަ ދިމާލަށެވެ. ލޯ ކުރިމަތިން ފެންނަމުން އެދަނީ ވަރުގަދަ ބިޔަ ރާޅެއް ރަށުތެރެއަށް އަރައިގެން އަންނަ މަންޒަރެވެ. ދުނިޔެ ޤިޔާމަތްވަނީއޭ ވެސް ހިތަށް އެރިއެވެ. ލޯ ކުރިމަތިން އެއަންނަނީ އަހަރެންގެ ނިމުން ކަން ވެސް ނޭނގޭ ހިތަށް އެރިއެވެ.
މީސްމީހުން އެމީހުންގެ ދަރިން ގޮވައިގެން ދުވެފައި އައި މަންޒަރު އަހަރެން ދުށީ ނުހަނު ހާސްވެފައި ހުރެއެވެ. އަހަރެންނަކީ އަހަރެންގެ މުސްކުޅި މަންމަ އާއި ބައްޕައަށް ލިބިފައި ހުރި ހަމައެކަނި ދަރިއެވެ. އުޅެމުން ދިޔައީ ވެސް އެދެމީހުންނާ އެކުގައެވެ.
މިއީ އަހަރެންގެ ނިމުން ކަން ހިނދުކޮޅަކަށް އަހަރެންނަށް ހީވިއެވެ. ދުވެވުނު އެންމެ ބާރަކަށް އަހަރެން ދިޔައީ އަހަރެންގެ މަންމައާއި ބައްޕަގެ ސަލާމަތަށް ކުރެވެން އޮތްހާ ކަމެއް ކުރުމަށެވެ. އެހެން ނަމަވެސް މަންމައާއި ބައްޕަ ގާތަށް ދިއުމަށް ގެއަށް ނުވަދެވެނީސް އައި ބޮޑު ރާޅާއި އެކު އަހަރެން ދުރަށް އެއްލާލިއެވެ.
އަހަރެންގެ ލޯކުރިމަތިން ހަލާކުވެގެން އެދިޔައީ އަހަރެންގެ މަންމައާއި ބައްޕަ އެގެއްގައި ވާ އަހަރެމެން އެންމެން ދިރިއުޅެމުން ދިޔަ ގެއެވެ. ހިނދުކޮޅެއްގެ ތެރޭގައި ގެ އެއްކޮށް ބިމާ ހަމަވީ މަންޒަރު އަހަރެން ބަލަން ހުރީ މަޖުބޫރީ ހާލަތުގައެވެ. “މަގޭ މަންމައޭ، މަގޭ ބައްޕައޭ” ގޮވަމުން އަހަރެން ދިޔައީ ރާޅުގަނޑުގެ ތެރޭގައި އެހީތެރި ކަމަކަށް އެދި އާދޭސް ކުރަމުންނެވެ.
ގަހެއްގެ އެހީގައި އަހަރެން އޮތީ ގޭގެ ކައިރީގައެވެ. ރާޅުގެ ބާރު ދަށްވެ ލޮނުގަނޑު ކޮންމެ ވެސް ވަރަކަށް ތިރިވުމުން އަހަރެން އަވަސްވެގަތީ އަހަރެންގެ މަންމަ އާއި ބައްޕަ ފެންނާނެ ކަމުގެ އުއްމީދުގައެވެ. ރޮއެ ހަޅޭލަވަމުން އަހަރެންގެ ވެއްޓިފައިވާ ގޭގެ ފުރާޅުގެ ބައިތަކާއި ފާރުބުރިތައް ނަގަމުން އަހަރެން މަސައްކަތް ކުރީ އަހަރެންގެ މައިންބަފައިން ފެންނާނެ ކަމުގެ އުއްމީދުގައެވެ.
ދެން ފެނުނު މަންޒަރަކީ ހިތް ކުދި ކުދި ކޮށްލި މަންޒަރެކެވެ.
މިފަދަ ބޮޑު ކަމެއް ވާނޭ ކަމުގެ ހިލަމެއް ދުވަހަކު ވީ ނަމަވެސް މިކަން ހުއްޓުވުމަށް އަހަރެންނަށް ކުރެވެން އޮތްހާ ކަމެއް އަހަރެން ކުރީމުހެވެ. އަހަރެން ލޯކުރިމަތީގައި އެވަނީ އެހާ ލޯބިން އަހަރެންނާއި އެކު އެއްކޮށް އުޅެމުން އައި ލޯބިވާ މައިންބަފައިންގެ ފުރާނަ ނެތް މަސްގަނޑެވެ. ދަރިއަކަށް މިފަދަ ގޮތަކަށް އަމިއްލަ މައިންބަފައިން ގެއްލިގެން ދިއުމަކީ ލަގޮނޑިއަށް ކެތްވާ ވަރުގެ ކަމެއް ނޫންކަން ޔަގީނެވެ.
އެދުވަހު އަހަރެންގެ ހިތް ކުދިކުދި ވިއެވެ. މިއަދު އަހަރެންގެ މައިންބަފައިން އަހަރެން ގާތަކު ނެތެވެ. ދިން ލޯތްބާއި ކުލުނާއި އަޅާލުމަކީ ދުވަހަކު ވެސް ހަނދާން ނެތޭނެ ކަންކަމެއް ނޫނެވެ. އަދި އަގު އަދާ ކުރެވޭ ވަރުގެ ކަމެއް ވެސް ނޫނެވެ. މިއަދު އަހަރެން ގާތުގައި އަހަރެންގެ މަންމަ އަދި ބައްޕަ ހުންނަން އަހަރެން ކިތަންމެ ބޭނުންވިޔަސް އެފުރުސަތު ދެން ނުލިބޭނެއެވެ.
އަހަރެންގެ ލޯކުރިމަތީގައި އަހަރެންގެ މައިންބަފައިން ޣަރަޤު ވެގެން ދިޔައީ އަހަރެންގެ ހިތް ކުދިކުދިވި ޙާލުއެވެ. މިހެން މީހަކަށް މިވާހަކަ ކިޔައިދިން ކަމުގައިވީ ނަމަވެސް އަސްލު ހަގީގަތުގައި އަހަރެންގެ ހިތް ތަހައްމަލު ކުރަމުންދާ ވޭނަކީ އެއްވެސް ގޮތަކަށް ބަޔާން ކުރެވޭނެ އެއްޗެއް ނޫނެވެ. ހިތް ފަޅާލާ ދެއްކޭނަމަ ދެއްކީމުހެވެ. މިއަދު ވެސް އަހަރެން ވަރަށް އުފަލުން ފެނިދާނެއެވެ. އެހެން ނަމަވެސް އަހަރެން ހިތުގައި އަބަދު ވެސް އެހަނދާންތައް އަބަދުމެ އަބަދަށް ބިންވަޅު ނެގިފައި ވެއެވެ.
އަހަރެންގެ މައިންބަފައިންނަކީ ސުވަރުގޭގެ އަހުލުވެރިން ކަމުގައި ލައްވާށިއެވެ. އާމީން. މާތް ﷲ ގެ އިރާދަފުޅުން އާޚިރަތް ދުވަހުން އަހަރެންގެ މައިންބަފައިންނާ ބައްދަލު ކުރެވޭނެ ކަމުގެ ފޮނި އުއްމީދު އަބަދުވެސް ހިތުގައި ވާނެއެވެ.
Ads by STO
