ހަގީގީ ހާދިސާ: އަހަރެންގެ އެކުވެރިޔާއާ ދިމާވި ވިހަގަދަ ހަރުފަތައް
އެއީ މީގެ ދެ އަހަރު ކުރިއެވެ. ރައްޓެއްސަކު ބަލިވެ އުޅޭ ހަބަރު ލިބިގެން އޭނާއާ ގުޅާލައިފީމެވެ. ގުޅާލާފައި ފޯނު ނެގުމުން ބަލިވެ އުޅޭ ހަބަރު ލިބިގެން ގުޅާލީ ކަމަށާއި ހާލު ކިހިނެއްތޯ ސުވާލު ކޮށްލީމެވެ. ބަދަލުގައި އޭނާ އަހަރެންނާ ކޮށްލީ ސުވާލެކެވެ. އަހަރެންނަކީ ކާކުތޯއެވެ. އަހަރެން ބުނީމެވެ، އަހަންނަކީ ތިބާގެ އެކުވެރިއެކެވެ. ސުކޫލް ދައުރުގައި އުޅުނީ އެކުގަައި ނޫން ހެއްޔެވެ. އަހަރެންގެ އަޑުވެސް ހަމަ ނޭނގެނީތޯ ވެސް ސުވާލު ކުރެވުނެވެ.
އޭނާއަަަކަށް އަދިވެސް އަހަރެން މިއީ ކާކު ކަން އެނގޭ ވަރެެއް ނުވިއެވެ. އެންމެ ފަހުން އަހަރެންގެ ނަން ވެސް ބުނެފީމެވެ. ބުނި ކަމެއް ނޭނގެއެވެ. ކަންފަތް މައްޗަށް އެ ކަނޑާލީ ފޯނެވެ. ދެން ގުޅާގުޅާ ފޯނެއް ނުނެގިއެވެ. ގާތްގަނޑަކަށް ހަައެއްކަ ފަހަރު ގުޅުމުން ބްލޮކް ވެސް ކޮށްލައިފިއެވެެ. އަހަރެންގެ ހިތަށް އެރިއެވެ. ސަހަރޯއެވެ. މިވީ އަނެއްކާ ކިހިނެއް ބާވައެވެ. މަގުމަތިން ފެނިގެން ކޮފީއަކަށް ގޮސް ދެމީހުން އެތައް ސަކަރާތެއް ޖެހީ މީގެ ހަފްތާއެއްހާ ދުވަސް ކުރިން ވިއްޔާއެެވެ.
ކޮންމެއަކަސް އޭގެ ފަހުން އަހަރެންގެ ރަހުމަތްތެރިޔާ އަހަރެންގެ ދިރިއުޅުމަށް ބަޚަބަރެވެ. އަހަރެން ކޮބައިތޯ އަހަރެންގެ ހާލު ރަނގަޅުތޯ ވެސް ބަލަައެއް ނުލައެވެ. އެވަރުން ނުވެގެން މަގުމަތިން ފެނިގެން ގޮވާލިޔަސް މޫނު އަނބުރާލަނީ އެހެން ދިމާލަކަށެވެ. އަހަރެން ވަކި ކުރާނީ ކީއްހެއްޔެވެ. މިއީ ހާލަތު ހުރި ގޮތެވެ. އަހަރެން ވެސް ފަހަކުން އޭނާއަކަށް ނުގޮވަމެވެ. ބެހެއްޓި ހިސާބެއްގައި އަހަރެން ވެސް ހުރީއެެވެ.
ދުވަސްތައް ފާއިތުވަމުން ދެއެވެ. އަހަރެންގެ އެ އެކުވެރިޔާއާ ނުލާ ވެސް އަހަރެންގެ ދިރިއުޅުން ވޭތުވަމުން ދާނެތާއެެވެ. މިހެން އުޅެނިކޮށް ދާދި އިހަކަށް ދުވަހަކު އަހަރެންނަށް ފޯނު ކޯލެއް އައިސްފިއެވެ. އޮފީސް ނިންމާލާފައި ގެއަށް ދަނިކޮށެވެ. އަހަންނަށް ލިބުނީ ކުއްލި ހައިރާން ކަމެކެވެ. ފޯންގެ ސްކްރީނަށް އަރާފައިވާ ނަންބަރު ފެނުމުންނެވެ. ސޭވް ނުކޮށް އިން ނަމަވެސް އަހަރެންގެ ހިތަކުން އެ ނަންބަރު ދުވަހަކު ވެސް ފިލައިގެނެއް ނުދާނެއެވެ.
އާނއެކެވެ. އެއީ މީގެ ދެ އަހަރު ކުރިން އަހަރެން ބްލޮކް ކޮށްލި އަހަރެންގެ ރަހުމަތްތެރިޔާއެވެ. އަހަރެންގެ ގާތުގައި ވީ ކިހިނެއްކަން ވެސް ނުބުނެ ވަކިވެގެން ދިޔަ އެކުވެރިޔާއެވެ. ކޮންމެއަކަސް އަހަރެން ފޯނު ނަގައި ކަންފަތުގައި ޖައްސާލީ ތެޅިތެޅި އޮތް ހިތަކާ އެކުގައެވެ. އަހަރެންގެ އަތް މަޑުމަޑުން ތުރުތުރު އަޅަމުން ދިޔައެވެ.
އަހަރެން ފޯނު ނަގާ ހަލޯއޭ ބުނެލީމެވެ. އަހަރެންނަށް ހީވީ ހަމަ ރަނގަޅަށެެވެ. އެއީ އަހަރެންގެ ރަހުމަތްތެރިޔާއެވެ. އޭނާ އަހަރެންގެ ގާތުގައި އެދުނީ ބައްދަލު ކޮށްލަން ބޭނުންވާ ކަމަށެވެ. އަހަރެން ބުނީމެވެ. މިވަގުތުން މިވަގުތަށް ވެސް ހޭވައްލާ ތައްޔާރެވެ. ހަވީރު ދެމީހުން ކޮފީއަކަށް ދާން ނިންމާ ފޯން ބާއްވައިފީމެވެ.
އަހަރެންނަށް ގެއަށް ދިޔަ މަގުމަތީގައި ވެސް އަދި ގެއަށް ގޮސްފައި ވެސް ވިސްނެމުން ދިޔައީ އެކަންތަކާ ދޭތެރޭގައެވެ. ދެއަހަރު ދުވަހު ވާހަކަ ނުދައްކާ ހުުރުމަށްފަހު އަހަރެންގެ ރަހުމަތްތެރިޔާ އަހަރެންނަށް މިގުޅީ ކިހިނެއް ވެގެން ބާވައެވެ. ސަބަބަކާ ނުލާ އަހަރެންނާ ވާހަކަ ދެއްކުން ހުއްޓާލުމުން އަހަރެން މިއޮތް ހުރިހާ ދުވަހު މިހުރީ ވާނުވާގައި ވިއްޔާއެވެ.
ކޮފީއަށް ދާން ނިންމާފައި އޮތް ވަގުތު އައިސް ޖެހުނު އިރު އަހަރެން ހުރީ އަހަރެމެން ދެމީހުން ބައްދަލުވާން ނިންމި ކެފޭގައެވެ. ކާނިވާ ތެރޭގައި ހުރި ކެފޭއެއްގައި ދެމީހުން ސައިތައްޓެއް ބޯލަން ޖައްސާލީމެވެ. ބޭއިހްތިޔާރުގައި އަހަންނަށް އަހާލެވުނީ، މިއޮތް ހުރިހާ ދުވަހު އުޅުނީ ކޮންތާކުހޭ އެވެ. މިއޮތް ހުރިހާ ދުވަހު ހަބަރެއް ނުވީ ކީއްވެގެން ހެއްޔޭ އެވެ. އަހަރެން މަގުމަތިން ފެނިގެން ގޮވާލުމުން ވެސް އަޅާނުލާ، ޖަވާބު ނުދީ ދަނީ ކީއްވެގެން ހެއްޔޭ އެވެ.މިފަދަ އެތައް ސުވާލެއް އަހަރެން ކުރީމެވެ. ހިތުގައި ފުނި ޖެހިފަައިވާ ހުރިހާ ސުވާލު ތަކެއްހެން އަހަރެން އޭނާއާ ކޮށްލީމެވެ.
އަހަރެންގެ ގާތުގައި އަހަރެންގެ އެކުވެރިޔާ އެންމެ ފުރަތަަމަވެސް އެދުނީ މާފަށެވެ. އޭނާގެ މޫނުމަތިން އޭނާ އެކަމާ ވަރަށް ލަދުގަނެ ދެރަވެފައިވާ ކަން ހާމަވެގެން ދިޔައެވެ. އަހަރެން ބުނީމެވެ. އެކުވެރިޔާއަށް އަހަރެންގެ ހިތުގައި އެެއްވެސް ބުރަ ކަމެއް ނެތެވެ. އަހަރެން އެނގެން ބޭނުންވަނީ އަަހަރެންނާ އެކުވެރިޔާ ދުރުވާން ޖެހުނު ސަބަބެވެ. އަހަރެންނާ ވާހަކަ ދެއްކުން ހުއްޓާލަން އެކުވެރިޔާ ޖެހުނު ސަބަބެވެ.
އަހަރެންގެ އެކުވެރިޔާ ކިޔައިދިނެވެ. ބައެއްގެ ނުބައި ރޭވުމުގައި އޭނާއަށް ޖެހެވުނީއެވެ. ބަޔަކު ދެއްކިހާ ވާހަކައެއް ތިމަންނާއަށް ގަބޫލު ކުރެވުނީއެވެ. އަހަރެން ސުވާލު ކޮށްލީމެވެ. އެކުވެރިޔާގެ ގާތުގައި ތިޔަ ބުނާ ބަޔަކު ދެއްކީ ކޮންކަހަލަ ވާހަަކަތަކެއް ހެއްޔެވެ. ސުވާލު ކުރުމުން އަހަރެންގެ އެކުވެރިޔާ ކިޔައިިދިނެވެ. އަހަރެންނަކީ މަސްތުވާ ތަކެތި ބޭނުން ކުރާ މީހެއް ކަމުގައި އެމީހުން އޭނާ ގާތުގައި ބުނި ކަމަށެވެ. އަދި އަހަރެންނަކީ އެހެން މީހުން އަތުން ރުފިޔާ އަތުލައިގެން އުޅޭ މީހެއް ކަމަށް ވެސް ބުނިކަމަށެވެ. އަދި އަހަރެން އެކުވެރިންގެ ލޯބިވެރިންނާ "ފްލާޓް" ކޮށް ވާހަކަ ދައްކާ ކަމަށް ވެސް ބުނެފައިވެއެވެ.
އެމީހުން ހަދަހަދައިގެން ދެއްކީ ވާހަކަ އެކަންޏެއް ނޫނެވެ. ފޮޓޯ ވެސް އެޑިޓް ކޮށްގެން ދެއްްކީ އެވެ. އެވާހަކަތައް އަަހަރެންގެ އެކުވެރިޔާއަށް އެހާ ފަސޭހައިން ގަބޫލު ކުރެވުނީ އެހެންވެ ކަމުގައި ބުންޏެވެ. އަހަރެން ހަގީގަތުގައިވެސް ވަަރަށް ދެރަވިއެވެ. އަހަރެންނަށް އަހަރެންގެ އެކުވެރިޔާ އިތުބާރު ނުކުރީތީއެވެ. އެހެނަސް މިއަދު އޭނާއަށް ހަގީގަތް އެނގި އަހަރެންގެ ގާތުން މަޢާފަށް އެދިއްޖެއެވެ.
އަހަރެންގެ އެކުވެރިޔާ މިހުރިހާ ދުވަހު އެއްކުރި ފައިސާ ވެސް އެ މަކަރުވެރިން ވަގަށް ނެގީއެވެ. އޭނާއަށް ރަނގަޅު "އިންވެސްޓް" އެއް ކޮށްދޭނެ ކަމަށްބުނެ 3 ލަައްކަ އަށްވުރެ ގިނަ ރުފިޔާ އަތުލުމަށްފަހު އެމީހުން ވީ ބަޚަބަރެވެ. ރަނގަޅަށް ބެލި އިރު މިމީހުންނަކީ މަސްތުވާތަކެތި ބޭނުން ކުރުމުގައި އަރާ ތިބި ބައެކެވެ. އެމީހުން ޖަހައިގަތީ އަހަރެންގެ އެކުވެރިޔާގެ ފައިސާތައް އެކަންޏެއް ނޫނެވެ. އޭނާގެ ލޯބިވެރިޔާ ވެސް އެމީހުންގެ ބަސްތަކަށް ހައްލާލައިގެން ގެންދިޔައީއެވެ. މަރިޔަނބު ގެއްލި ކަތިވަޅި ގެއްލި ކޮށި ދަނޑުވެެސް އެންމެ ފަހުން އަަހަރެންގެ އެކުވެރިޔާއަށް ގެއްލުނީއެވެ.
ގިނަ އެކުވެރިންތަކެއް ވެސް އޭނާއަށް ގެއްލިގެން ދިޔައީ ހަމަ އޭނާގެ ހަޔާތަށް އެ އައި ވިހަގަދަ ހަރުފަތަކުގެ ސަބަބުންނެެވެ. މިއަދުވެސް އެމީހުން އަހަރެންގެ އެކުވެރިޔާއާ މަގުތައް މަތީން ދިމާކޮށް ހަދައެވެ. އަހަރެންގެ އެކުވެރިޔާ ދަށްކޮށްލައެވެ. އޭނާގެ ކުރީގެ ލޯބިވެރިޔާ ބޭނުން ކޮށްގެން އެތައް އެއްޗިއްސެއް ކިޔުއްވައެވެ.
މިއަދު އެގޮތަށް މީހުންގެ ދިރިއުޅުން ހަލާކު ކޮށް މީހުންގެ ދިރިއުޅުމަށް ވިހަ ލަމުން އުޅެވިދާނެއެވެ. އަހަރެން ދެރަވީ އަހަރެންގެ އެކުވެރިޔާއަށް އަލިފާނާއި ފެން ވަކިކުރަން ނޭނގުނީމައެވެ. އޮޅު ކޮށްގެން ގެންގުޅުނު ހަރުފަތައް އެންމެ ފަހު ވަގުތު ކާންދޭ އަތުގައި ދަތް އަޅާ ވިހަ ލާނެ ކަން އޭނާއަށް ނޭނގުނީއެވެ.
