މާލެ ސަރަޙައްދުގެ ގެސްޓުހައުސްތައް އަންނަ މަހު ހުޅުވާލަނީ
މާލެ ސަރަޙައްދުގެ ގެސްޓުހައުސްތައް އަންނަ މަހުގެ މެދުތެރޭގައި ހުޅުވުމުގެ ހުއްދަ ދެވޭނެ ކަމަށް އުއްމީދު ކުރައްވާ ކަމަށް ޓޫރިޒަމް މިނިސްޓަރ ޑރ. ޢަބްދުﷲ މައުސޫމް ވިދާޅުވެއްޖެއެވެ.
ދައުލަތުގެ މީޑިއާ އަށް ދެއްވި އިންޓަވިއު އެއްގައި ޑރ. މައުސޫމް ވިދާޅުވީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހުއްދަ ދިނުމުން ނޫން ގޮތަކަށް ގްރޭޓާ މާލޭ ސަރަހައްދުގައި ހިންގާ ގެސްޓްހައުސްތައް ހުޅުވުމުގެ ހުއްދަ ނުދެވޭނެ ކަމަށެވެ.
ޑރ. މައުސޫމް ވިދާޅުވީ މާލެ ސަރަޙައްދުގެ ގެސްޓުހައުސްތައް ހުޅުވުން ގުޅިފައިވަނީ ކޮވިޑްގެ ނަންބަރުތަކާއި ކަމަށެވެ. އެގޮތުން އެޗްޕީއޭއިން ހުއްދަ ދިނުމާއެކު މާލޭގެ ގެސްޓްހައުސްތައް ހުޅުވާލުމުގެ މަސައްކަތް ޓޫރިޒަމް މިނިސްޓްރީން ފަށާނެ ކަމަށް ވެސް ޑރ. މައުސޫމް ވިދާޅުވިއެވެ.
މާލެ ސަރަހައްދުގައި ކޮވިޑް-19 ގެ ކޭސްތައް ފަސް އިންސައްތައަށް ދަށް ވެއްޖެނަމަ ހުއްދަ ދެވޭނެ ކަމަށް އެޗްޕީއޭ އިން ބުނެފައިވާކަން ވެސް ޓޫރިޒަމް މިނިސްޓަރުގެ ވާހަކަފުޅުގައި ފާހަގަ ކުރައްވާފައިވެއެވެ.
