ޤުދުރަތީ ރީތި ކުލައެއް ގެންނަން ކަމަށް ބުނެ މިމޮޑެލް ތުންފަތުގައި ހޭކީ ހީނާފަތް
އާއްމު ގޮތެއްގައި މީހުން ހީނާފަތް އަޅަނީ ދެ އަތުގައާއި ފައިގެ އިތުރުން ބޮލުގައެވެ. ނަމަވެސް ޗިކާގޯ ގެ މި މޮޑެލް މުޅިން ތަފާތެވެ.
ބްރައިނާ ކްރިސްޓިއަންސަން ނަމަކަށް ކިޔާ އުމުރުން 44 އަހަރުގެ މޮޑެލް، ތުންފަތުގައި ހީނާފަތް ހާކާ ވީޑިއޯއެއް އާއްމުކޮށްފައި ވަނީ ޓިކްޓޮކް ގައެވެ.
އެންމެ 45 ސިކުންތުގެ އެވީޑިއޯއިން ފެންނަނީ ބްރައިނާ ތުންފަތުގައި ހީނާފަތް ހޭކުމަށްފަހު އެއް ގަޑިއިރު ވަންދެން ބަހައްޓާ ތަނެވެ. އެއަށްފަހު ހީނާ ފަތްތައް ފުހެލާއިރު ތުންފަތް ހުންނަނީ އޮރެންޖު ކުލައަކަށްދާ ރަތް ކުލައެއްގައެވެ.
ތުންފަތުގައި ހީނާފަތް ހޭކުމުން އެތައް ބަޔަކު ވަނީ އޭނާއާއި އެކި ސުވާލު ކޮށްފައެވެ. އެއީ ކީއްވެ ކުރި ކަމެއްތޯ އެހުމުން ބްރައިނާ ބުނީ، އޭރުން އޭނާގެ ތުންފަތް ބޮޑުކޮށް ހުރުމުގެ އިތުރުން ޤުދުރަތީ ރީތިކުލައެއް ތުންފަތަށް އަރާފައި ހުންނަ ކަމަށެވެ.
ތުންފަތުގައި ހުންނަނީ ވަރަށް ނާޒުކު ހަމަކަށް ވުމުން ހީނާފަތް ހޭކީމަ އެއްވެސް ގެއްލުމެއް ވޭތޯ ކުރި ސުވާލަށް އޭނާ ވަކި ޖަވާބެއް ދީފަައެއް ނުވެއެވެ.
