އެމެރިކާގެ ސެކްރެޓަރީ އޮފް ސްޓޭޓް ޕޮމްޕިއޯ މިއަދު ރާއްޖެ ވަޑައިގަންނަވަނީ
އެމެރިކާގެ ސެކްރެޓަރީ އޮފް ސްޓޭޓް މައިކަލް ޕޮމްޕިއޯ މިއަދު ރާއްޖެ ވަޑައިގަންނަވާނެ ކަމަށް ފޮރިން މިނިސްޓްރީން ބުނެފި އެވެ.
ޕޮމްޕިއޯ ރާއްޖެ ވަޑައިގަތުމަށް ހަމަޖެހިފައިވަނީ މިއަދު މެންދުރުފަހުގެ ވަގުތެއްގައެވެ.
ޕޮމްޕިއޯ ރާއްޖެ ވަޑައިގަތުމުން އެމަނިކުފާނަށް މަރުހަބާ ދަންނަވާނީ ޚާރިޖީ ވަޒީރު ޢަބްދުﷲ ޝާހިދު އެވެ. އެއަށްފަހު ރައީސް އިބްރާހިމް މުޙައްމަދު ޞާލިޙުގެ އަރިހަށް އިޙްތިރާމުގެ ޒިޔާރަތެއް އެމަނިކުފާނު ކުރައްވާނެއެވެ.
ރައީސް ޞާލިޙާ ބައްދަލު ކުރެއްވުމަށްފަހު ޕޮމްޕިއޯ އާއި ޚާރިޖީ ވަޒީރު ޝާހިދާ ދެމެދު ދެ ޤައުމުގެ ރަސްމީ މަޝްވަރާތައް ކުރިއަށް ގެންދިޔުމަށް ވަނީ ހަމަޖެހިފައެވެ.
އެމެރިކާގެ ސްޓޭޓް ޑިޕާޓްމަންޓުން ބުނީ ދެ ގައުމުގެ ގާތް ގުޅުން އިތުރަށް ހަރުދަނާ ކުރުމާ ގުޅޭ ގޮތުން މިބައްދަލުވުމުގައި މަޝްވަރާ ކުރެވޭނެ ކަމަށެވެ.
އޭގެ އިތުރުން އިންޑިއާ ކަނޑުގެ ސަލާމަތީ ކަންކަމާއި ޓެރަރިޒަމާ ދެކޮޅަށް އެކުގައި މަސައްކަތް ކުރުމަށް ރާއްޖެ އާއި އެމެރިކާއިން މަޝްވަރާ ކުރާނެ ކަމަށް ސްޓޭޓް ޑިޕާޓްމަންޓުން ބުނެފައި ވެއެވެ.
މިބައްދަލުވުންތަކުގައި ދެ ޤައުމުން އެެއްވެސް އެއްބަސްވުމެއްގައި ސޮއި ކުރުމަށް ހަމަޖެހިފައިވާ ކަމުގެ މައުލޫމާތެއް ލިބިފައެއް ނުވެއެވެ.
ނަމަވެސް އެ ދެ ބޭފުޅުންގެ މަޝްވަރާއާއި ގުޅޭގޮތުން މީޑިއާ އަށް މައުލޫމާތު ދެއްވުމަށް 16:00 ޖޮއިންޓް ޕްރެސް ސްޓޭޓްމަންޓެއް އެ ދެ ބޭފުޅުން ދެއްވާނެއެވެ.
