"ކޮވިޑް އިޖާބަ" : އަނެއްކާ ވެސް ދީލަތި ދިވެހީންގެ އެހީތަކެއް ހާލުގައި ޖެހިފައިވާ ދިވެހިންނަށާއި ބިދޭސީންނަށް
މުޅި ދުނިޔެއަށާއި ދިވެހިރާއްޖެއަށް ކުރިމަތިވެފައިވާ ކޮވިޑް 19ގެ ބަލިމަޑުކަމުގެ މުސީބާތުގެ މިދަނޑިވަޅުގައި އެހީ ޖަމްއިއްޔާ އާއި ވެލްނެސް އެސޯސިއޭޝަން އަދި އެކްސްޕެކްޓް ސަޕޯޓްވައިބާ ކޮމިއުނިޓީ (ބައި ރީނާ) ގުޅިގެން ދިވެހިންނަށާއި ބިދޭސީންނަށް އެހީތެރިކަން ފޯރުކޮށްދޭން ފަށައިފިއެވެ.
އެހީ ޖަމްއިއްޔާއިން ހާމަ ކުރިގޮތުގައި ވެލްނެސް އަދި ބައި ރީނާ އާއި ގުޅިގެން ހިންގާ ''ކޮވިޑް އިޖާބަ'' ޕްރޮޖެކްޓްގެ ދަށުން ދަތި އުނދަގުލުގައި ދިރިއުޅޭ ނިކަމެތި ރައްޔިތުންނަށް އެހީތެރިވަމުން ދާ ކަމަށާއި އެގޮތުން ހާލުގައި ޖެހިފައިވާ އާއިލާތަކަށާއި ބިދޭސީންނަށް ކާބޯޓަކެތީގެ ޕެކޭޖްތައް އަދި ކާބޯތަކެތީގެ ޕާރުސަލްތައް ފޯރުކޮށް ދެމުން ދާ ކަމަށެވެ.
އެހީ ޖަމިއްޔާއިން މަޢުލޫމާތު ދިން ގޮތުގައި މި ޕްރޮޖެކްޓްގެ ދަށުން މިހާރު ވެސް ވަރަށް ގިނަ ބައެއްގެ ދީލަތި އެހީ ލިބި ، ގިނަ ބަޔަކަށް އެހީތެރި ވެވިއްޖެ ކަމަށާއި އެކަމަށް ޓަކައި އެހީވެދެއްވި ހުރިހާ ފަރާތްތަކަށް ޝުކުރު އަދާ ކުރައްވާ ކަމަށެވެ.
އެހީގެ ގޮތުގައި މި ޕްރޮޖެކްޓަށް ޖުމްލަ 300,433.46 ރުފިޔާ މިހާތަނަށް ވަނީ ލިބިފައެވެ. އޭގެ ތެރެއިން އެހީގެ ގޮތުގައި މިހާތަނަށް 183،603.71 ރުފިޔާ ހަރަދު ކޮށްފައިވާއިރު، ޖުމްލަ 44 އާއިލާއަކަށާއި 361 ބިދޭސީއަކަށް އެހީތެރިކަން ފޯރުކޮށްދީފައިވެއެވެ.
މި ޕްރޮޖެކްޓްގެ ތެރެއިން އެހީތެރިކަން ފޯރުކޮށްދެނީ ފުރަބަންދާއި ގުޅިގެން ވަޒީފާ ގެއްލި، އާމްދަނީ ލިބޭނެ މަގެއް ނެތް އާއިލާތަކަށާއި ހާލުގައިޖެހިފައިވާ ބިދޭސީންނަށެވެ. މިފަދަ ފަރާތްތަކަށް ކާބޯތަކެތީގެ ޕެކޭޖްތައް ފޯރުކޮށްދިނުމުގެ އިތުރުން، ތުއްތު ކުދިން ދިރިއުޅޭ ގެތަކުގައި ބޭނުންވާ ޒަރޫރީ ބައެއް ސާމާނުވެސް ފޯރުކޮށްދެއެވެ.
މި ދަނޑިވަޅުގައި ހާލުގައި ޖެހިފައިވާ ފަރާތްތަކާއި އެހީ ބޭނުންވާ ފަރާތްތަކުން އެ ފަރާތްތަކުގެ މަޢުލޫމާތު ހިއްސާ ކުރެއްވުމަށް ''ކޮވިޑް އިޖާބަ'' ޕްރޮޖެކްޓުން އިލްތިމާސްކުރެއެވެ.
އެހީއަށް އެދި ހުށައަޅަން ބޭނުންވާ ފަރާތްތަކުންނާއި މައުލޫމާތު ސާފު ކުރެއްވުމަށް އެދި ލައްވާ ފަރާތްތަކުން އެހީ ޖަމިއްޔާގެ ހޮޓްލައިން ނަންބަރު 7803433 ނުވަތަ ހެވަތަ ހޮޓްލައިން ނަންބަރު 9133433 އާއި މަޢުލޫމާތު ހިއްސާ ކުރެއްވުމަށް މި ޕްރޮޖެކްޓް ހިންގާ ފަރާތުން ވަނީ އެދި ލައްވާފައެވެ.
މީގެއިތުރުން، ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށްދޭން ބޭނުންވާ ފަރާތްތަކަށް އެހީ ޖަމިއްޔާގެ އެކައުންޓް ނަންބަރު 7770000014820 މެދުވެރިކޮށް އެހީ ފޯރުކޮށްދިނުމުގެ ފުރުސަތު ވަނީ ހުޅުވާލާފައެވެ.
އެހީ ޖަމްއިއްޔާއިން މަޢުލޫމާތުދޭގޮތުގައި، މި ޕްރޮޖެކްޓުގައި ޝާމިލްވާން ބޭނުންވާ ފަރާތްތަކަށް އެ ފުރުސަތު މިހާރުވެސް ވަނީ ހުޅުވާލާފައިއެވެ. އެގޮތުން ހާލުގައި ޖެހިފައިވާ އާއިލާތަކަށް ކާބޯތަކެތި ޑެލިވަރީ ކުރުން ފަދަ މަސައްކަތްތަކުގައި ބައިވެރިވާން ބޭނުންވާ ފަރާތްތަކަށް އެ ފުރުސަތު އޮތް ކަމަށް ވެސް އެ ޖަމްއިއްޔާައިން ވަނީ ބުނެފައެވެ.
އެހީ ޖަމިއްޔާއިން ވަނީ މީގެ ކުރިން ވެސް ރާއްޖޭގެ އެކި ކަންކޮޅުތަކުގައި ހާލުގައި އުޅެމުންދާ އާއިލާތަކަށާއި ވަކިވަކި ފަރުދުންނަށް އެކި ގޮތްގޮތުން އެހީތެރިކަން ފޯރުކޮށްދީފައެވެ. އެގޮތުން، ކޯވިޑް-19ގެ ކުރިންވެސް އެހީއަށް ބޭނުންޖެހިފައިވާ ބައެއް ޢާއިލާ ތަކަށް ކޮންމެ މަހަކުވެސް ކާބޯތަކެތި ފޯރުކޮށްދެމުން ގެންގޮސްފައިވެއެވެ.
