ކަމިންއައުޓް2020: ފޯނު އޮރިޖިނަލްތޯ ބެލެނީއެއް ނޫން، ދެވެނީ އެއް ޖިންސުން ގުޅުން ހިންގުމަށް ހިތްވަރެއް
ސޯޝަން މީޑިއާގައި ތަފާތު އެކި އެކި ޗެލެންޖުތަކާއި ހޭޝްޓެގު ތަކަކީ އަބަދުވެސް މަޝްހޫރު ވަމުން އަންނަ އެއްޗެއްސެވެ. އެކި އެކި ދުވަސްވަރާ ދިމާކޮށް އެކި އެކި އެޖެންޑާތައް ފެތުރުމަށް ވެސް ހޭޝްޓެގްތައް ބޭނުން ކޮށް އުޅެއެވެ.
އެގޮތުން މީސް މީޑިއާގައި މިއަދު ވަރަށް ގިނަ ބަޔަކު ޝެއާ ކުރި އެކައްޗަކީ ފޯނުގެ އޮރިޖިނަލް ތޯ ބެލުމަށް "ކަމިންއައުޓް2020" ޖަހާފައި ޕޯސްޓުކުރުމަށް އޮތް ޕޯސްޓެކެވެ.
މި ޕޯސްޓު ގިނަ އަދަދެއްގެ ދިވެހިން ވެސް ޝެއާކޮށް އެފަދައިން ލިޔެފައިވާއިރު، ގިނަ ބަޔަކަށް މީގެ ހަގީގީ މާނަ ނޭނގޭކަން ފާހަގަ ކޮށްލެވެއެވެ. މި ލިޔުން ކޮޅުން ފޯނުގެ އޮރިޖިނަލްކަން ޔަގީނެއް ނުކޮށްދެއެވެ.
ކަމިންއައުޓް2020އަކީ އެއް ޖިންސުން ގުޅުން ހިންގާ މީހުން އެކަން ހާމަކުރުމުގެ ގޮތުން މި އަހަރު ބޭނުން ކުރަމުން އަންނަ ހޭޝްޓެގެކެވެ. ފޭސްބުކުގައި މިހެން ޖެހުމުން އަކުރުތައް ރެއިންބޯގެ ކުލަޔަށް ބަދަލު ވެގެންދަނީ އެއީ އެއްޖިންސުން ގުޅުން ހިންގާ މީހުން ރަމްޒުކޮށްދޭ ކުލަތަކަށް ވާތީއެވެ.
މީސް މީޑިއާގައި ފެންނަހާ އެއްޗެއް ޝެއާ ކުރުމަކީ ބައެއް ދިވެހިންގެ އާދައެވެ. ނަމަވެސް އެއްޗެއް ޝެއާ ކުރުމުގެ ކުރިން މި ޝެއާ ކުރެވެނީ ކިހާވަރެއްގެ ކޯއްޗެއްކަން ޔަގީން ކުރުމަކީ މުހިންމު ކަމެކެވެ.
