ގައުމު ހިންގަން އެނގޭ ބަޔަކަށް ގައުމުގެ ހިންގުން ހަވާލު ކުރަން ޖެހޭ : ޝަރީފް
ކޮވިޑް-19 ގެ ބަލިމަޑުކަމުގައި އިގްތިސޯދު ހީނަރުވެފައިވާ އިރު ރައްޔިތުންނަށް ދިމާވެފައިވާ ދަތި ހާލަތުގައި މިހާރު މިއޮތް ސަރުކާރަށް އެހީތެރިކަން ދޭނެ ގޮތެއް ހަމަޖައްސަން ނޭނގުނު ކަމަށް އިދިކޮޅު ކޯލިޝަންގައި ހިމެނޭ ޕީއެންސީގެ ޕާލިމެންޓްރީ ގްރޫޕްގެ ލީޑަރު އާދަމް ޝަރީފު އުމަރު ވިދާޅުވެއްޖެ އެވެ.
އާދަމް ޝަރީފް ވަނީ މިކަން ސަރުކާރަށް އިތުރަށް ނުވާނެ ކަމަށް ވިދާޅުވެ ވަރަށް ބޮޑަށް ފާޑު ކިޔުއްވާފައެވެ.
އާދަމް ޝަރީފް މިހެން ވިދާޅުވީ ދައުލަތުގެ ހަރަދަށް ޒިންމާވުމުގެ ގާނޫނުގެ ބައެއް މާއްދާތައް އިސްތިސްނާކޮށް ސަރުކާރުން އެމްއެމްއޭއިން 4.4 ބިލިއަން ރުފިޔާ ނެގުމުގެ ހުއްދައަށް އެދުނު މައްސަލާގައި ބަހުސް ކުރައްވަމުންނެވެ.
މަޑުއްވަރީ ދާއިރާގެ މެންބަރު އާދަމް ވަނީ މިއީ އެއްގޮތަކަށް ވެސް ކުރަން ރަނގަޅު ނޫން ކަމެއް ކަމަށް ފާހަގަކޮށް އެކަމަށް ވަރަށް ބޮޑަށް ދެކޮޅު ހައްދަވާފައެވެ.
އަދި ކޮވިޑް19 ގެ ސަބަބުން ރައްޔިތުންނަށް ބޮޑެތި ދަތިތަކެއް ކުރިމަތި ވެފައިވާ ދަނޑިވަޅުގައި ރައްޔިތުންނަށް އެހީވުމަށް ސަރުކާރު ނުކުޅެދިފައިވާ ކަން ފާހަގަ ކޮށް ޝަރީފް ވަނީ އަވަސް ރިޔާސީ އިންތިހާބެއް ބޭއްވުމަށް ގޮވާލާފައެވެ.
"އަޅުގަނޑަކަށް ނުފެނޭ މި ސަރުކާރަށް މި ކަން ވާނެ ކަމަކަށް، އަޅުގަނޑު ހަމަ ގޮވާލަން މި ދަނޑިވަޅަކީ އަވަސް އިންތިހާބެއް ބާއްވަން ޖެހޭ ދަނޑިވަޅުކަން، މި ގައުމު ހިންގަން އެނގޭ ބަޔަކަށް ގައުމުގެ ހިންގުން ހަވާލު ކުރަން ޖެހޭ،" އާދަމް ޝަރީފު ވިދާޅުވި އެވެ.
