ކުޅުދުއްފުށީން ކޮވިޑް-19ގެ އަލާމާތްތައް ހުރި މީހަކު ފެނިއްޖެ
ށ. ނަރުދޫ "އަމާޒު" ބޯޓުން ކުޅުދުއްފުއްޓަށް އައި ތިން މީހުންގެ ތެރެއިން އެކަކުގެ ފަރާތުން ކޮވިޑް-19ގެ އަލާމާތައް ފެނިގެން ޓެސްޓު ކުރުމުގެ މަސައްކަތް ފަށައިފިއެވެ.
ކުޅުދުއްފުށީ ރީޖަނަލް ހޮސްޕިޓަލްގެ މެނޭޖަރު އަހުމަދު ދާއޫދު "ކުޅުދުއްފުށި އޮންލައިން" އަށް މައުލޫމާތު ދެމުން ވިދާޅުވީ، ނަރުދޫ ބޯޓުން ކުޅުދުއްފުއްޓަށް ތިން މީހަކު އައިސްފައިވާ ކަމަށާއި އެތަނުން އެކަކުގެ ސާމްޕަލް ނަގައި މާލެ ފޮނުވާލައިވާކަމަށެވެ.
އަހުމަދު ވިދާޅުވީ، ސާމްޕަލް ނެގުމަށްފަހު، އެ މީހާ ދިރިއުޅޭ ގެ މިހާރު މޮނިޓަރިންގެ ހާލަތަށް ގެނެސްފައިވާ ކަމަށާއި އެޗްޕީއޭގެ ލިޔުން އެ ގޭގެ ބޭރުގައި ހަރުކޮށްފައިވާނެ ކަމަށެވެ. އެ ގެޔަކީ، ކިރުދޫނިގެ އެވެ.
އޭނާ ވިދާޅުވީ، އެގެޔަށް ބޭނުންވާ ޒަރޫރީ ތަކެއްޗާއި ކަންކަން ސޯޝަލް ސަޕޯޓް ޑެސްކުން ކުރަމުންގެންދާނެ ކަމަށާއި ކޮންޓެކްޓްރޭސިން ހެދުމުގެ މަސައްކަތް މިހާރު ވަރަށް ބާރަށް ކުރިއަށްދާ ކަމަށެވެ.
އަމާޒު ބޯޓުގެ ކެޕްޓަން ކޮވިޑް-19 އަށް ފައްސި ވެފައިވާއިރު، އެޗްޕީއޭ އިން މިރޭ ވަނީ މި މަހުގެ 15 ވަނަ ދުވަހު އެ ބޯޓުން ދަތުރުކުރި މީހުން އެޗްޕީއޭގެ ހޮޓްލައިނަށް ގުޅައި އެންގުމަށް އެދިފައެވެ.
މި ބޯޓުން 98 މީހަކު ދަތުރުކޮށްފައިވާއިރު މި ބޯޓަކީ މި މަހުގެ 15 ވަނަ ދުވަހު މާލެއިން ފުރި ބޯޓެކެވެ. މި ބޯޓު ވަނީ ނ. މާފަރާއި ހެނބަދޫ، މިލަދޫ، ވެލިދޫ، ކެނދިކުޅުދޫ، ހޮޅުދޫ އަދި ށ. ނަރުދޫ، ފުނަދޫ، މާއުނގޫދޫ އަދި ފީވައްގެ އިތުރުން ހއ. އުތީމާއި ދިއްދޫ އަށް ދަތުރުކޮށްފައިވައެވެ.
މި ބޯޓުން ދަތުރުކުރި މީހުންގެ ތެރެއިން މިހާތަނަށް ފަސް މީހެއްގެ ފަރާތުން ވަނީ ބަލީގެ އަލާމާތްތަކެއް ފެނިފައެވެ.
