ކަރަންޓީނު ފެސިލިޓީތަކަށް 595 މިލިއަން ރުފިޔާ ހަރަދު ކޮށްފައިވޭ: ނަޝީދު
ކޮވިޑް-19 އާ ގުޅިގެން ސަރުކާރުން ގާއިމްކޮށްފައިވާ ކަރަންޓީން ފެސިލިޓީތަކަށް މިހާތަނަށް 595 މިލިއަން ރުފިޔާ ހަރަދުކޮށްފައިވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މިއަދު ބޭއްވި މަޖިލީހުގެ ޖަލްސާގައި ވާހަކަ ދައްކަވަމުން ނަޝީދު ވަނީ ކަރަންޓީން ފެސިލިޓީތަކާ ގުޅޭ ގޮތުން އަންނަ ޝަކުވާތަކާ ބެހޭ ގޮތުން ވާހަކަ ދައްކަވާފައެވެ. އެގޮތުން މި ފަހުން އެންމެ ބޮޑު ބަހުސްއެއް އުފެދުނީ އެ ތަނުން ރޯދަ ވީއްލަން ދިން ކާނާއާ ގުޅޭ ގޮތުންނެވެ.
އެގޮތުން އެ ތަނުން ރޯދަ ވީއްލުމަށް ބަތާއި މުގުރިހަ ދީފައި ހުރި ކަމަށް ބުނެ މީހަކު ވަނީ މީސް މީޑިއާގައި ނުރުހުން ފާޅުކޮށްފައެވެ.
ނަޝީދު ވިދާޅުވީ ކަރަންޓީން ފެސިލިޓީތަކުގައި ރޯދަ ވީއްލަން ހުރި ތަކެތީގެ ލިސްޓެއް އެމަނިކުފާނަށް ލިބިވަޑައިގެންފައިވާކަމަށާއި އޭގެ ތެރެއިިން އެއް ތަނުން އިއްޔެ ދީފައިހުރި ތަކެތީ ތެރޭގައި ހުރީ ދެ ޗަޕާތީ، ކުކުޅު ރިހަ، ކުޅިމަސް، ބަތް ކޮޅެއް، ޕިއްޒާ ފޮއްޗެއް، ކޭކު ކޮޅެއް، ބިސް ގަނޑެއް އަދި ޖޫސް ކަމަށެވެ.
ނަޝީދު ވިދާޅުވީ ކަރަންޓީން ފެސިލިޓީތަކުގައި ރޯދަ ވީއްލުމުގެ ކަންކަން ރަނގަޅަށް ގެންދިއުމަށް ސަރުކާރުން ކުރެވެން ހުރި ހުރިހާ މަސައްކަތެއް އެބޭފުޅުން އެބަ ކުރައްވާ ކަމަށާއި ހުރިހާ ވަޒީރުން އެކަމުގައި ވަރަށް އަވަދި ނެތި އުޅުއްވަމުން ގެންދަވާ ކަމަށެވެ.
"މިހާރު ކަރަންޓީނު ފެސިލިޓީތަކަށް 595 މިލިއަން ރުފިޔާ ހަރަދު ވެއްޖެ. ދެން " ނަޝީދު ވިދާޅުވި އެވެ.
ކަރަންޓީން ފެސިލިޓީތަކާއި ހަވާލުވެވަޑައިގަތް ހުންނެވި ޓުއަރިޒަމް މިނިސްޓަރު އަލީ ވަހީދުވެސް ރޯދަ ވީއްލަވަނީ ހަމަ އެކަނި އެ ފެސިލިޓީތަކުން ލިބެން ހުރި ތަކެތި ކަމަށާއި އެ ޔަގީންކަން މިނިސްޓަރު ދެއްވި ކަމަށް ވެސް ނަޝީދު ވިދާޅުވި އެވެ.
