ކޮވިޑް19: އަކްޝޭ ކުމާރްގެ ދީލަތި އެހީއެއް މުމްބާއި ޕޮލިސް އަށް
ކޮވިޑް19 އާ ދެކޮޅަށް އިންޑިއާ އިން ކުރަމުން އަންނަ ހަނގުރާމައަށް އެހީވުމުގެ ގޮތުން މަޝްހޫރު ތަރި އަކްޝޭ ކުމާރު، މުމްބާއީ ޕޮލިސް އަށް 20 މިލިއަން އިންޑިއަން ރުޕީސް ހަދިޔާކޮށްފައެވެ.
އަކްޝޭ ވަނީ މީގެ ކުރިން ވެސް ކޮރޯނާ ވައިރަސް އިން އަރައިގަތުމަށް އެއްކުރި ޕީއެމް- ކަރެސް ފަންޑަށް ވެސް އެހީވެފައެވެ. އަކްޝޭ އަކީ މި ފަންޑަށް އެހީވި ބޮލީވުޑް ގެ އެންމެ ފުރަތަމަ ފަންނާނުކަން ވެސް ފާހަގަކޮށްލަން ޖެހެއެވެ.
މުމްބާއީ ޕޮލިސްއަށް އަކްޝޭ އެހީވިކަން ހާމަކޮށްފައިވަނީ އެ ޕޮލިސްގެ ކޮމިޝަނަރ ކުރެއްވި ޓްވީޓަކުންނެވެ. އެ ޓްވީޓުގައި އޭނާ ވަނީ އަކްޝޭ ވެދެއްވި ދީލަތި އެހީއަށް ވަރަށް ބޮޑަށް ޝުކުރު އަދާކޮށްފައެވެ. އަދި އެ ރުފިޔާ ހަރަދު ކުރެވިގެންދާނީ މުމްބާއީ ޕޮލިސް ގެ ހުރިހާ މުވައްޒަފުންގެ ސަލާމަތާއި ރައްކާތެރިކަމަށްޓަކައި ކަންވެސް އޭނާ ވަނީ ކަށަވަރުކޮށްދީފައެވެ.
ބޮލީވުޑްގެ ގިނަ ފިލްމީ ތަރިން ދިރިއުޅެމުން އަންނަ މުމްބާއި ސިޓީ އަކީ އިންޑިއާގައި ކޮވިޑް19 އެންމެ ބޮޑަށް ކުރި އެއް ހިސާބެވެ. މުމްބާއީ އިން ވަނީ ކޮވިޑް19 ގެ 5000 ވުރެ ގިނަ ކޭސް ރިޕޯޓުކުރެވިފައެވެ.
