އާމިރު ފުލުހުންގެ ހައްޔަރަށް ގެންދިޔައީ އަމުރަށް ނުކިޔަމަންތެރިވުމުން: ފުލުހުން
ފުލުހުންގެ ބެލުމުގެ ދަށަށް ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ގެންދިޔައީ މަގުމަތި ބަލަހައްޓަން ތިބި ފުލުހުން މަޑުކުރަން ބުނުމުން، މަޑުނުކޮށް އަމުރަށް ނުކިޔަމަންތެރި ވުމުން ކަމަށް ފުލުހުން މައުލޫމާތު ދީފިއެވެ.
ބާރުގެ ބޭނުންކޮށްގެން ފުލުހުންގެ ބެލުމުގެ ދަށަށް އާމިރު ގެންދާ ވީޑިއޯއެއް މިހާރު މީސްމީޑިއާގައި ދައުރުވަމުންދާއިރު، ދެ ފުލުހަކު ވެގެން އޭނާ ހުއްޓުވަން އުޅުމުން އަނިޔާނުކުރާށޭ އާމިރު ވިދާޅުވާ އަޑު އެ ވީޑިއޯ އިން އިވެ އެވެ.
[caption id="attachment_191300" align="alignnone" width="660"]
މީސްމީޑިއާގައި ދައުރުވަމުންދާ ވީޑިއޯއިން ނަގާފައިވާ ފޮޓޯއެއް[/caption]
ހުޅުމާލޭ ފޭސް 2ގައި ރޭ މެންދަމު 1:00 ހާއިރު، ޗެކު ޕޮއިންޓު ޖަހައިގެން ފުލުހުން އުޅަނދުތައް ޗެކުކުރަމުން ދިޔަކަމަށާއި އެ ސަރަހައްދުން ދުއްވާފައިވާ ދިޔަ ސައިކަލެއް މަޑުކުރަން އެންގުމުން، ހަޑިހުތުރު ބަހުން ފުލުހުންނާއި މުއާމަލާތްކޮށް، ނުރައްކާތެރި ބާރު ސްޕީޑުގައި ދިޔުމުން، ފުލުހުން ފަހަތުން ގޮސް ހުއްޓުވާފައިވާ ކަމަށް ފުލުހުން މައުލޫމާތުދީފައިވެއެވެ.
މި މައްސަލައާއި ގުޅޭ މައުލޫމާތު ފުލުހުން ހާމަކުރިނަމަވެސް، ސައިކަލު ދުއްވަން އިން މީހާގެ މައުލޫމާތު ހިއްސާކޮށްފައިނުވެއެވެ. އެހެންނަމަވެސް ހާދިސާ ހިނގި ގޮތަށް ބަލާއިރު އަދި މިހާރު މީސްމީޑިއާގައި ދައުރުވާ ވީޑިއޯތަކަށް ބަލާއިރުވެސް ފުލުހުންގެ ބެލުމުގެ ދަށަށް ގެންގޮސްފައިވަނީ އާމިރުކަން ވަނީ އެނގިފައެވެ.
ކޮމެންޓް