ލިބިފައިވާ އާދަޔާ ޚިލާފު ނުވަތަ ތަފާތު ސިފައިގެ ސަބަބުން މަޝްހޫރުކަން ލިބުނު ބައެއް މީހުން
ޤުދުރަތުން އެމީހަކަށް ދެއްވާފައިވާ ސިފައަކީ އެންމެ ރީތި ސިފައެވެ. ނަމަވެސް ބައެއް މީހުން ނޭފަތާއި ކަންފަތާއި ކޯތާފަތުގެ ސާޖަރީތައް ހަދާ ރީތި ވުމަށް މަސައްކަތް ކުރެއެވެ. އަދި ބައެއް މީހުން އެމީހުންނަށް ލިބިފައިވާ ސިފައަކީ އާދަޔާ ޚިލާދު ނުވަތަ މަލާމާތް ލިބޭ ފަދަ ސިފައަކަށް ވި ނަމަވެސް އެފަދަ ސިފަތަކާމެދު ހިތުން ރުހި އެކަންކަމާއެކު ދިރިއުޅުން ކުރިއަށް ގެންދެއެވެ. ތިރީގައި އެވަނީ އެފަދަ މީހުންގެ ތެރެއިން މަޝްހޫރުކަން ލިބުނު ބައެއް މީހުންނެވެ.
1. ވިނީ ހަރލޯ
ކެނެޑާގެ ޒުވާން މޮޑެލް އިންސްޓަގްރާމްގައި އާންމުކޮށްފައިވާ ފޮޓޯތަކެއް، އެމެރިކާގެ ނެކްސްޓް ޓޮޕް މޮޑެލް ހުށައަޅާދޭ ފަރާތަށް ފެނިގެން އޭނާއަށް އެ ޝޯއިން ފުރުސަތު ލިބުމާއި އެކު ވިނީއަށް ގިނަބައެއްގެ ލޯ އަމާޒު ވެގެން ދިޔައެވެ. މި ޝޯގެ ފައިނަލަށް ދިއުމަށްފަހު ވިނީގެ މަޝްހޫރުކަން އިތުރުވެ، ބޮޑެތި މަޖައްލާތައް ކަމަށްވާ ވޯގް، ކޮސްމޮޕޮލިޓަން އަދި ގްލެމަރ އަށް ވިނީގެ ފޮޓޯތައް އެރިއެވެ. ވިނީއަކީ ހުދުބައްޔަކީ އައިބު ކަމެއް ނޫންކަން ދުނިޔެއަށް ދައްކައިދިން ޒުވާން އަންހެން ކުއްޖެކެވެ.
2. ޑެނިއަލް ކްރޫން
އުފެދުމުގައި ހުރި މައްސަލައެއްގެ ސަބަބުން ޑެނިއަލްގެ ދެލޮލުގެ ކުލަ ތަފާތެވެ. އެއް ލޮލުގެ ކުލައަކީ މުށިކުލައެވެ. އަދި އަނެއް ލޮލުގެ ކުލައަކީ ނޫކުލައެވެ. މި ގޮތަން މި މައްސަލަ ބައެއް ޖަނަވާރުންގެ ވެސް ހުރެއެވެ. އޭގެ ތެރޭގައި ބުޅާ އަދި ކުއްތާ ހިމެނެއެވެ. ޑެނިއަލް އަކީ ސިއްޙީ ދާއިރާއިން މަތީ ތަޢުލީމް ހާޞިލް ކޮށްފައިވާ ކުއްޖެއްގެ އިތުރުން އިންސްޓަގްރާމްގައި ވަރަށް މަޝްހޫރު ކުއްޖެއެވެ.
3. މިކޭލާ ހޯމްގްރެން
ޑައުން ސިންޑްރޯމް ހުންނަ ކުދިންނަކީ ވަރަށް ހުނަރުވެރި ބައެކެވެ. ނަމަވެސް ފެޝަން އިންޑަސްޓްރީ އިން މި ފަދަ ކުދިން ފެނުމަކީ އާންމު ކަމެއް ނޫނެވެ. މިހެން މިކަން އޮތް މިކަން ބަދަލުކޮށް ތާރީޚްގެ ސަފްޙާތަކުގައި މިކޭލާ ހޯމްގްރެންގެ ނަން ލިޔެލީ އެމެރިކާގެ ރީތީގެ މުބާރާތަކުން މޮޅުވުމާއި ގުޅިގެންނެވެ. އޭގެ ފަހުން މި ޒުވާން މޮޑެލް އަދި ނެށުންތެރިޔާ އަކީ ސޯޝަލް މީޑިޔާގައި ދަންނަ މޫނަކަށް ވެއްޖެއެވެ. އިންސްޓަގްރާމްގައި 14،000 މީހުން މިކޭލާ ފޮލޯ ކުރެއެވެ.
4. ލާ އޮސްގިއަރ
ހަށިގަނޑާ އަޅާބަލާއިރު ލާ އޮސްގިއަރގެ ފައި ދިގު ކަމުން، ސްކޫލުގައި ކުދިން އޭނާއަށް ބުލީކޮށް ހެދިއެވެ. އޮސްގިއަރ ބުނީ، އޭނާ ވިހޭއިރު ފައިއޮތީ ވަރަށް ބޮޑަށް ލެނބިފައިކަމަށާ، އެއީ ރަޙިމުގައި އެވަރަށް ޖާގަ ނެތުމުން ކަމަށެވެ. 2013 ވަނައަހަރުން ފެށިގެން އޮސްގިއަރގެ ފިޓްނަސް ވީޑިއޯތައް އޭނާ ދިޔައީ އިންސްޓަގްރާމްގައި ހިއްސާކުރަމުންނެވެ. މިއަދު އޮސްގިއަރގެ 239،000 ފޮލޯވާރސް އިންސްޓަގްރާމްގައި ތިބެއެވެ.
5. އޭވާ ކްލާކް
އަލްބީނިޒަމްގެ ސިފަތަކުގެ ސަބަބުން ލޮލުގެ މައްސަލަތައް ޖެހި ލޯ އަނދިރި ވެފައިވާ އެވާ ކްލާކްގެ މަންމަ، އޭވާއަށްޓަކައި ވަރަށް ފަޚުރުވެރިވެއެވެ. ދަރިފުޅުގެ އާދަޔާ ޚިލާފްގެ ސިފައިގެ ސަބަބުން ދުނިޔެއަށް ފޮރުވައިގެން ނުގެންގުޅެއެވެ. އަބަދުވެސް އޭވާގެ ފޮޓޯތައް އިންސްޓަގްރާމްގައި ހިއްސާ ކުރެއެވެ. މިއަދު އޭވާގެ 90 ހާސް ފޮލޯވަރުން އެބަ ތިއްބެވެ. އަދި މަޝްހޫރު ލަވަކިޔުންތެރިޔާ ބިއޯންސޭ އާއި އެކު ވަގުތު ހޭދާ ކުރުމުގެ ފުރުސަތުވެސް އޭވާއަށް ވަނީ ލިބިފައެވެ.
6. ހަރްނާމް ކޯރް
އިންޑިޔާގެ ޕަންޖާބުގެ އާއިލާއަކުން، އިނގިރޭސިވިލާތަށް އުފަން ހަރްނާމް ކޯރް އަކީ ވަރަށް ގިނަ އަންހެނުން ތަޖުރިބާ ކުރާ ކަމެއްގެ އިންތިހާ ތަޖުރިބާ ކުރާ އަންހެނެކެވެ. އޯވަރީގައި ސިސްޓް ހުރުމުގެ ސަބަބުން އުމުރުން 12 އަހަރުން ފެށިގެން މޫނާއި މޭމަތީގައި ވަރަށް ގަދައަށް ހުންނަނީ އިސްތަށި ފަޅާފައެވެ. މިއީ ހޯމޯންގެ ބެލެންސް ގެއްލުމުން ވަރަށް އާންމުކޮށް ދިމާވާ ސިއްޙީ މައްސަލައެކެވެ. ނަމަވެސް އެހެން އަންހެނުން އެކި ގޮތްގޮތުން އިސްތަށި ނައްތާލި ނަމަވެސް ހަރްނާމް ގަސްތުކުރީ މިއީ ގުދުރަތުން ދިމާވި މައްސަލައެއް ކަމުން މިކަމާއި އެކުގައި އުޅޭށެވެ. ނަމަވެސް ފުރަތަމަ ކޮޅުގައި ވަރަށް ބޮޑެތި ފުރައްސާރައަށް ކުރިމަތިލާން ޖެހުނު ހަރްނާމް އަކީ މިހާރު މޮޑެލް އެއްގެ އިތުރުން، ބުލީ އާ ދެކޮޅަށް މަސައްކަތް ކުރާ ފަރާތެކެވެ.
7. ހަމަދް ޖަމާން
މޫނުގައި އާދަޔާ ޚިލާފަށް ގިނައިން ޖަހާފައިވާ ލައްތަކުގެ ސަބަބުން މީހުނަށް ފޮރުވިގެން އުޅުމުގެ ބަދަލުގައި ހަމަދް ބޭނުންވީ އޭނާގެ ކިބައިގައިވާ ތަފާތު ސިފަ ބަލައިގަނެގެން އެއީ ހިތްވަރެއް ކަމަށް ބަލައިގެން ކުރިއަށް ދާށެވެ. މިއަދު ހަމަދް އަކީ ކާމިޔާބު މޮޑެލް އެކެވެ. މޭކަޕް ބޭނުންކޮށްގެން މި ލައްތައް ފޮރުވުމުގެ ބަދަލުގައި ހަމަދް ބޭނުންވީ ދުނިޔެއަށް ހަމަދްގެ އަސްލު ސިފަ ދައްކާށެވެ.
8. ސިމޯން ތޮމްސަން
އާދާޔާ ޚިލާފަށް ދުރުވެފައި މެދުދެދަތުގެ ސަބަބުން މަޝްހޫރު ކަން ލިބުނު މޮޑެލްގެ ކެރިއަރު ފަށާ ދިނުމަށް، އެމެރިކާގެ މަޝްހޫރު ރެޕަރ ކަންޔޭ ވެސްޓް އެހީތެރިވެދިން ނަމަވެސް މިއަދު ލިބިފައިވާ ކާމިޔާބީގެ ސިއްރަކީ ސިމޯންގެ ކެރުމާއި ފަސްނުޖެހުމެވެ. މިއަދު ސިމޯންއަކީ ދުނިޔޭގެ މަޝްހޫރު ބްރޭންޑްތަކަށް މޮޑެލް ކޮށްދޭ ކުޅަދާނަ ފަންނާނެކެވެ.
9. ޚޫދިޔާ ޑިއޮޕް
މިއީ ހަމުގެ ކުލަ އަނދިރިކަމުން ވަރަށް ޅަ އުމުރުން ފެށިގެން އެކިފާޑުގެ ބުލީގެ ޝިކާރަކަށް ވެފައިވާ ކުއްޖެކެވެ. ސެނެގޯލް އަށް ނިސްބަތްވާ އެންމެ 23 އަހަރުގެ ޚޫދިޔާ މޮޑެލްކުރަމުން ދިޔައީ އޭނާގެ ވަރަށް ގާތް މީހުންގެ ފަރާތުން ހިތްވަރު ލިބިގެންނެވެ. 2019 ވަނަ އަހަރުގެ ޑިސެމްބަރ މަހު ބޮޑު މަޝްހޫރުކަމެއް ލިބި، އިންސްޓަގްރާމްގައި 538،000 މީހުން ފޮލޯކުރާ ޚޫދިޔާ ބުނީ ރީތި ވުމަކީ ކުލައަކުން ވާކަމެއް ނޫންކަން ދުނިޔެއަށް ދައްކަން ބޭނުންވާ ކަމަށެވެ. ތަފާތު ވުމަކީ ވެސް ރީތި ކަމެކެވެ.
10. ޝަވެލް
އެއްވެސް ޝައްކެތް ނެތް ގޮތުގައި، ޝަވެލް އެހެން މީހުންނާ ތަފާތުވަނީ، ޝަވެލްގެ ނޫކުލައިގެ ލޮލުގެ ސަބަބުންނެވެ. ޝަވެލްގެ މޮޑެލިންގެ ކެރިއަރުގެ އިތުރުން ޝަވެލްއަކީ ސޯޝަލް މީޑިޔާގައި ގިނަބަޔަކު ދަންނަ މޫނެކެވެ. ޝަވެލްގެ އިންސްޓަގްރާމް އެކަންޓުން އޭނާކުރާ ވަރަށް ގިނަ ކަންތައް އޭނާއަށް ސަޕޯޓް ކުރާ މީހުންނާ ހިއްސާކުރެއެވެ. އެހެންކަމުން މިއަދު ޝަވެލްއަށް ފޮލޯ ކުރާ 35 ހާސް މީހުން އިންސްޓަގްރާމްގައި އުޅެއެވެ.
