ދުނިޔޭގެ އެންމެ ބޮޑު ފްލޯޓިން ސޯލާ ނިޒާމު ރާއްޖޭގައި ގާއިމް ކުރަނީ
ދުނިޔޭގެ އެންމެ ބޮޑު ފްލޯޓިން ސޯލާ ނިޒާމު ރާއްޖޭގައި ގާއިމް ކުރުމަށް ނިންމައިފިއެވެ.
އެންވަޔަރަންމަންޓް މިނިސްޓަރ ޑރ ހުސައިން ރަޝީދު ހަސަން ވިދާޅުވީ ވޯރލްޑް ބޭންކުގެ އެހީގައި 36 މެގަވޮޓް ސޯލާ ޕީވީ ހައިބްރިޑް ސިސްޓަމް ގާއިމުކުރުމުގެ މަޝްރޫޢެއް ފެށުމަށް ތައްޔާރުވަމުން އަންނަ ކަމަށެވެ.
ރާއްޖެ ޓީވީ އިން ގެނެސްދިން ޕްރޮގްރާމެއްގައި ވާހަކަދައްކަވަމުން މިނިސްޓަރު ވިދާޅުވީ ވޯރލްޑް ބޭންކުގެ 313 މިލިއަން ޑޮލަރުގެ މަޝްރޫއުގެ ދަށުން 10 މެގަވޮޓް ޖަހަނީ ފްލޯޓިންގ ގޮތަށް ފެންމަތީގައި ކަމަށެވެ.
” އެއީ ދުނިޔޭގެ ނިސްބަތުންވެސް މިގޮތަށް ގާއިމުކުރެވޭ އެންމެ ބޮޑު ފްލޯޓިން ސޯލާ ނިޒާމަށްވާނެ. ދެން އޭގެ އިތުރުން އިތުރު ރަށްރަށުގެ 11 މެގަވޮޓް ކެޕޭސިޓީ އެބަ ގާއިމު ކުރަން “ މިނިސްޓަރު ވިދާޅުވިއެވެ.
ޕަވަރ ޕާރޗޭސް އެގްރިމެންޓްގެ ދަށުން 5 މެގަވޮޓް ސޯލާ ޖެހުމުގެ މަސައްކަތް ތައިލެންޑުގެ ކުންފުންޏަކާ ހަވާލު ކޮށްފައިވާކަން ވެސް މިނިސްޓަރު ވިދާޅުވިއެވެ.
އަދި އަމާޒަކީ މި މަޝްރޫއުގެ އަމަލީ މަސައްކަތް އަންނަ މަހު ފެށުން ކަމުގައި މިނިސްޓަރު ވިދާޅުވިއެވެ.
