ކޮވިޑް ޖެހުނު 88 އަހަރުގެ މީހަކު ވެންޓިލޭޓަރަށް ލައިފި، ހާލު ސީރިއަސް!
ރާއްޖޭގައި ކޮވިޑް-19 ޖެހުނު 88 އަހަރުގެ މީހަކު ވެންޓިލޭޓަރަށް ލައިފިއެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި ޑރ މުޙައްމަދު އަލީ ވިދާޅުވީ އުމުރުން 88 އަހަރުގެ އެމީހާ ވެންޓިލޭޓަރަށް ލާފައިވަނީ ޙާލު ސީރިއަސްވެ ނޭވާލާން އުނދަގޫ ވާތީ ކަމަށެވެ.
"ވެންޓިލޭޓަރަށް ލުމުގެ މާނައަކީ ނޭވާލާ ހޮޅީގެ ތެރެއަށް ހޮޅިއެއް ލައްވާފައި މެޝިނަކާއި ގުޅާފައި އޮންނަ ވާހަކަ. ވެންޓިލޭޓަރަށް ލުމަށްފަހު އޮކްސިޖަން ދޭންޖެހޭ މިންވަރު އިތުރުކުރާކަށް ނުޖެހޭ އިރާދަކުރެއްވީތީ. ނަމަވެސް ލޭގެ ޕްރެޝަރު ހިފަހައްޓާވަރު ތަންކޮޅެއް ދަށްވުމުން އެކަމަށް ބޭސް ދެމުންދަނީ" ޑރ.މުހައްމަދު އަލީ ވިދާޅުވިއެވެ.
ވެންޓިލޭޓަރަށް ލީ އިރާއި މިހާރާއި އަޅާބަލާއިރު، އޭރަށް ވުރެ ހާލު އިތުރަށް ގޯސް ވެގެން ނުދާ ކަމަށްވެސް ޑރ. މުހައްމަދު އަލީ ވިދާޅުވިއެވެ.
މި މީހާއެކު އިތުރު ފަސް މީހަކަށް ވެސް ދަރުމަވަންތަ ހޮސްޕިޓަލުގެ އައިސީޔޫގައި އަންނަނީ ފަރުވާ ދެމުންނެވެ. އޭގެ ތެރެއިން އެކަކުގެ ޙާލު މިހާރު ރަނގަޅުވެ، ކޯވިޑް-19އަށް ހެދި ފުރަތަމަ ޓެސްޓް ނެގެޓިވްވުމުން ދަރުމަވަންތަ ހޮސްޕިޓަލުގެ 17ވަނަ ފަންގި ފިލާއަށް އަށް މިހާރު ވަނީ ބަދަލުކޮށްފައެވެ.
