ޝާފީގެ ޓިކްޓޮކް ދަތުރު: ފެށީ މަޖަލަކަށް، މީހުންނަށް އެހާ ކަމުދާނެކަމަށް އުންމީދު ކޮށްފައެއް ނޫން!
ގިނަ ބަޔަކު ބަލަމުން އަންނަ ޓިކްޓޮކްގެ މިފަހަރުގެ ސެގްމެންޓް ޚާއްސަ ކޮށްލާފައި މިވަނީ، ރާއްޖޭގެ ޓިކްޓޮކް ސްޓާރުންގެ ތެރޭގައި ގުނާލެވޭ އެކަކަށެވެ.
ކޮންމެ މިޔުޒިކެއް އިވުނަސް އެބީޓަކާއި އެއްވަރަށް ހަރަކާތްތައް ދައްކާލާ ޔޫސުފް ޝާފީ ސައީދު (ޝާފީ) އަކީ މަދު ދުވަސްކޮޅެއްގެ ތެރޭގައި އޭނާގެ ފޭންބޭސް ވަރަށް ވެސް ވަރުގަދަކުރި ހުނަރުވެރި ޒުވާނެކެވެ.
ޓިކްޓޮކްގައި އުޅޭތާ މިހާރު ގާތްގަނޑަކަށް ދެ އަހަރު ވެފައިވާ ޝާފީ، އޭނާގެ މިދަތުރުގެ ވާހަކަ "ދެން" އާއި ހިއްސާ ކުރަމުން ބުނީ އޭނާ ޓިކްޓޮކް ކުޅެން އެންމެ ފުރަތަމަ ފެށީ މަޖަލަކަށް ކަމަށެވެ.
"ފުރަތަމަ ހަމަ މަޖަލަކަށް ފެށީ، ސަކަރާތް ޖަހަން ވެގެން. ނަށާ ވީޑިއޯއެއް އެންމެ ފުރަތަމަ ލީވެސް. ދެން އެ ވަރަށް ގިނަ މީހުންނަށް ކަމުދިޔަ. ދެން ވެސް ހަމަ ވީޑިއޯއެއް ލީތަނުން އެއަށް ވެސް ވަރަށް ގިނަ މީހުން ތަރުހީބު ދިން. ހިއެއް ނުކުރަން އަސްލުގަ ފެށިއިރު އެހާ ސަޕޯޓު ލިބޭނެ ކަމަކަށް. އެކަމަކު ދެން އޭގެ ފަހުން ޓިކްޓޮކް ހަދަން ވަގުތު ވީވަރަކުން" ޝާފީ ބުންޏެވެ.
ގިލިލަންކަންފުށީގައި ވަޒީފާ އަދާކުރަމުންދާ ޝާފީ ބުނިގޮތުގައި ޓިކްޓޮކް އިން އޭނާގެ މޮޅު ނެށުން ފެނިގެން، މާލޭގެ ޑާންސް ގްރޫޕަކުން އެމީހުންނާއެކު ނެށުމަށް ފުރުސަތު ދިނެވެ. ޝާފީ އަށް ބޮޑަށް ޓިކްޓޮކް އަށް ނިކުމެވުނީ އޭގެ ފަހުންނެވެ.
ނެށުމުގެ ވީޑިއޯއަކުން ޓިކްޓޮކްއަށް ތަޢާރަފްވި ޝާފީއަށް އެންމެ ފަސޭހައިން ކުޅެވެނީ ވެސް ނަށާ ވީޑިއޯތައް ކަމުގައި އޭނާ ބުންޏެވެ.
ނަމަވެސް އޭނާގެ ހުނަރުވެރިކަން އެކިއެކި ރާގުތަކަށް ބަނޑިބަނޑި ލެއްވުމަކުން ނުނިމެވެ. ޝާފީއަކީ ވަރަށް މޮޅަށް މަދަހަ ކިޔާ ޒުވާނެއް ކަމަށާއި އޭނާ ކިޔާފައިވާ މަދަޙަތަކަށް ވެސް ބެލުންތެރިންގެ ފަރާތުން ހޫނު ތަރުހީބެއް ލިބެމުންދާކަން ފާހަގަ ކުރެވެއެވެ.
"ކިޔާ މަދަޙަތަކާމެދު އެންމެންގެ ވިއުވެސް ހަމަ ވަރަށް ޕޮޒިޓިވް. މަދަޙައިގެ ތެރެއަށް ވެސް ވަދެވުނީ ލަވައިން. ލަވަ އަސްލުގަ ކުރިން ނުކިޔަން. އެކަމަކު ރިސޯޓުން އަޅުގަނޑަށް ދިމާވީ ރައްޓެއްސަކާ، އެއީ ޝާދިން ބުނީ އަޅުގަނޑުގެ އަޑު ވަރަށް ރީއްޗޭ، ލަވަ ކިޔަންވީ ނޫންހޭ. ދެން އެހިސާބުން ލަވައިގެ ތެރެއަށް ވަދެވުނީ އަދި މަދަހަ ކިޔަން ވެސް ފެށުނީ. އެންމެ ފުރަތަމަ ކީމަދަހައަކީ 'މަޢުލާ ޔާ ޞައްލި' އެމަދަހަ ފޭސްބުކް އަށް ލީމަވެސް ވަރަށް ގިނަ މީހުން ބުނި ވަރަށް ރީއްޗޭ. އޭގެ ފަހުން ކޮވިޑް މަދަހަ ކީ. އެމަދަހަ ލީމަވެސް ވަރަށް ގިނަ މީހުން ކޮމެންޓުކޮށް މެސެޖުވެސް ކުރި" ޝާފީ ބުންޏެވެ.
ޝާފީ ވަނީ ވަރަށް ގިނަ މީހުންނާއެކު ވެސް ޓިކްޓޮކް ކުޅެފައެވެ. އެގޮތުން އޭނާއަށް އެންމެ ފަސޭހައީ "ނަސްރޭ" އާއެކު ޓިކްޓޮކް ކުޅެން ކަމަށް ވެސް ޝާފީ ބުންޏެވެ.
އެހެން މީހުންނެކޭ އެއްފަދައިން ޝާފީގެ ވެސް އެންމެ މަގުބޫލު ސްޓާރުންތަކެއް ހިމެނެއެވެ.
"އެންމެ ރީތީ ނަސްރޭގެ ޓިކްޓޮކް. ދެން ޝަރަފް އާއި، ޝާއިފް އާއި، ލާކް ގެ ޓިކްޓޮކް ވެސް ވަރަށް ރީތި" ޝާފީ ބުންޏެވެ.
ޝާފީގެ ފަރާތުން އޭނާގެ ފޭނުންނަށް ބުނެފައިވަނީ ބެލުންތެރިންގެ ކޮންމެ ހިޔާލެއް އޮތްކަމުގައިވީ ނަމަވެސް އެކަން ހިއްސާ ކޮށްލުމަށެވެ.
"އަަޅުގަނޑަށް ހަމަ ކޮންމެ މީހަކު މެސެޖު ކުރިޔަސް އަޅުގަނޑު އެމީހަކަށް ރިޕްލައި ކުރާނަން. ހުރިހާ އެންމެންނާވެސް އަޅުގަނޑު ރައްޓެހި. އެއްވެސް މީހަކާއި ރުޅިއެއް ނޫން" ނިންމާލަމުން ޝާފީ ބުންޏެވެ.
