އީސީގެ ނައިބު ރައީސް އަކުރަމް މަގާމުން އިސްތިއުފާ ދެއްވައިފި
އިލެކްޝަންސް ކޮމިޝަންގެ ނައިބު ރައީސް އަދި ތަރުޖަމާނު އަޙުމަދު އަކްރަމް، އެމަގާމުން އިސްތިއުފާ ދެއްވައިފިއެވެ.
އަކުރަމް މިއަދު އެމަގާމުން އިސްތިއުފާ ދެއްވާފައިވާއިރު، އެކޮމިޝަންގެ އަންހެން މުވައްޒަފުންތަކަކަށް ޖިންސީ ފުރައްސާރަ ކުރިކަމުގެ ތުހުމަތުގައި އޭނާ މަގާމުން ވަކިކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއިން ރޭގައި ވަނީ ފާސްކޮށްފައެވެ.
މިމައްސަލަ ކޮމިޓީން ދިރާސާ ކުރިއިރު، އެބައްދަލުވުމަށް އަކުރަމް އާއި އީސީގެ މެންބަރުންގެ އިތުރުން މިމައްސަލައިގެ ވިކްޓިމުން ވެސް ވަނީ ހާޒިރު ކޮށްފައެވެ.
އަކުރަމް އާއި ގުޅޭގޮތުން މިނިވަން މުއައްސަސާތަކާއި ބެހޭ ކޮމިޓީން ބޭއްވި މިބައްދަލުވުން ބޭއްވީ ސިއްރު ބައްދަލުވުމެއްގެ ގޮތުގައެވެ. އޭނާ މަގާމުން ވަކި ކުރަން، އެބައްދަލުވުމުގައި ބައިވެރިވި މެންބަރުންގެ ތެރެއިން ދެ މެންބަރުން ފިޔަވާ ހުރިހާ މެންބަރުން ވެސް ވޯޓު ދެއްވިއެވެ.
އީސީގެ ނައިބު ރައީސް ކަމުގެ މަގާމަށް އަކުރަމް އައްޔަނު ކޮށްފައިވަނީ މިއަހަރުގެ މާރޗު މަހުގައެވެ.
