މި މީހާ ފޭސް މާސްކް ހޭކީ މުޅި މޫނުގައި، ދެންވީ ގޮތެއް އެނގޭތަ؟
މޫނާއި ހަންގަނޑު ރީތި ކޮށް ބެހެއްޓުމަކީ ގިނަ ބަޔަކު ވަރަށް ސަމާލުކަންދީގެން ޤަވާއިދުން ކުރާ ކަމެކެވެ. އަގުބޮޑު ބްރޭންޑެޑް ފޭސް މާސްކް ތަކަށާއި ސެލޫންތަކަށް ރުފިޔާ ޚަރަދު ކުރާ މީހުންވެސް މަދެއް ނޫނެވެ. ނަމަވެސް ބައެއް މީހުންނަކީ ޤުދުރަތީ މާއްދާތައް ބޭނުން ކޮށްގެން އަމިއްލަ އަށް ގޭގައި މިފަދަ ކަންކަން ކުރާ މީހުންނެވެ. ބައެއްފަހަރު ނަތީޖާ ވަރަށް ރަނގަޅު ވިޔަސް އަނެއްބައި ފަހަރުތަކުގައި ހީވެސް ނުކުރާ ގޮތަށް ގޭގައި ތައްޔާރު ކުރާ ބާވަތްތަކުގެ ނަތީޖާ ބަދަލުވެގެން ދެއެވެ.
އެގޮތުން މިއީ ވެސް ގޭގައި އަމިއްލަ އަށް ފޭސް މާސްކް އެއް ތައްޔާރު ކުރި މީހަކަށް ވީގޮތެއްގެ ވާހަކަ އެކެވެ. ސްކޮޓްލޭންޑް އަށް ނިސްބަތްވާ ޖޯން މީޗަން ނަމަކަށް ކިޔާ މި މީހާ ފޭސް މާސްކް ތައްޔާރު ކުރީ ޗާކޯލް އިންނެވެ. އަދި މަތީ ތުންފަތާއި، ތުނބުޅި އަދި އޭނާގެ ބުމަ ވެސް ހިމެނޭ ގޮތަށް ފޭސް މާސްކް އެޅި އެވެ. ތިބާ އަކީ ދުވަހަކު ވެސް ޗާކޯލް ފޭސް މާސްކް އެޅި މީހެއްނަމަ މޫނާއި މާސްކް ވަކި ކުރާއިރު އެވާ ތަދު އެނގޭނެ ކަން ގައިމެވެ. ކޮންމެ އަކަސް، ފޭސް މާސްކް ނެއްޓި އިރު ޖޯންގެ ބުމަ އެއް ނެތެވެ. އަދި ތުނބުޅި އެއްވެސް ނެތެވެ. ފޭސް މާސްކް އާ އެކު ނެއްޓުނީއެވެ.
ޖޯން ބުނި ގޮތުގައި އޭނާ މިގޮތަށް ފޭސް މާސްކް އަޅަން ޖެހުނީ އޭނާގެ އަންހެނުންގެ ސަބަބުންނެވެ. އޭނާގެ މޫނު ސާފު ކުރުމަށް ފޭސް މާސްކެއް އަޅައިދޭން ބުނުމުން އަންހެނުން އެކަމަށް ދެކޮޅު ހެދިއެވެ. އެހެން ކަމުން އަމިއްލައަށް ފޭސް މާސްކެއް އެޅީ ކަމުގައި ޖޯން ބުންޏެވެ.
ޖޯންގެ އަންހެނުން ޓްރޭސީ ، ލޮލަށް ފޭސް މާސްކްގެ އަސަރު ނުކުރާނޭ ގޮތަށް އެޅުމަށް ބުނުމުން ހަމަ ސީދާ އެގޮތަށް އެޅީއެވެ. ބުމައިގައި ނޭޅުމަށް ނުބުނޭ ވިއްޔާއެވެ. ޓްރޭސީގެ އިރުޝާދު ތަކަށް ތަންކޮޅެއް ބޮޑަށް އަމަލު ކުރެވުމުން އެކަހަލަގޮތެއް ވެދާނެ ކަމަށް ޖޯން ބުންޏެވެ.
ޓްރޭސީ ޖޯންގެ މޫނުން ފޭސް މާސްކް ނައްޓާ ވީޑިޔާ ވަނީ ސޯޝަލް މީޑިޔާގައި އާންމު ވެފައެވެ. މި ވީޑިޔޯގައި ޓްރޭސީ ބުނެފައި ވަނީ ވެކްސް ކުރުމެކޭ ޖޯންގެ ފޭސް މާސްކް އެކޭ ތަފާތެއް ނެތް ކަމަށެވެ. މޫނުން ފޭސް މާސްކް ނެއްޓުނީ ވަރަށް އުނދަގުލުން ކަމަށާއި އެހާމެ ތަދުވި ކަމުގައި ޖޯން ބުންޏެވެ. އަދި ޓްރޭސީ އަށް ރައްދު ދިނުމުގެ ގޮތުން ޖޯން ބުނީ ރީތި ވުމަށް އަންހެނުން މިފަދަ ކަންކަން ކުރިޔަސް ފޭސް މާސްކް އެޅުމަށްވުރެ މޫނު ހަޑިކޮށް ހުއްޓަސް މާ ރަނގަޅު ވާނެ ކަމަށެވެ. ޖޯން ބުނީ ތުނބުޅި ނެތަސް ބުމަ ހުރި ނަމަވެސް އޭނާގެ މައްސަލައެއް ނެތް ކަމަށެވެ.
Ads by STO
