ކުރީގެ މެންބަރެއްގެ ފަރާތުން ކުރިމަތިވި ޖިންސީ ފުރައްސާރައާ ހެދި އީސީގެ މުވައްޒަފަކު އަމިއްލައަށް މަރުވާން އުޅުން: ކޮމިޓީ
އިލެކްޝަންސް ކޮމިޝަން (އީސީ) ގެ ކުރީގެ އިސް މެންބަރެއްގެ ފަރާތުން ކުރިމަތިވި ޖިންސީ ފުރައްސާރައާ ހެދި އެތަނުގެ މުވައްޒަފަކު އަމިއްލައަށް މަރުވާން އުޅުނު ކަމަށް، އެކޮމިޝަންގެ މެންބަރަކާ ހަވާލާ ދެއްވައި މިނިވަން މުއައްސަސާތަކާ ބެހޭ ކޮމިޓީން މިއަދު ބުނެފިއެވެ.
އީސީގެ ނައިބު ރައީސް އަހުމަދު އަކްރަމް، އެކޮމިޝަންގެ މުވައްޒަފުންތަކަކަށް ޖިންސީ ފުރައްސާރަ ކުރިކަމުގެ ތުހުމަތުތަކެއް ފެންމަތިވެ، އެމައްސަލަ ރައްޔިތުންގެ މަޖިލީހުގެ މިނިވަން މުއައްސަސާތަކާއިބެހޭ ކޮމިޓީން ބަލާ އަކުރަމްގެ އިތުބާރު ނެތް ކަމަށް ފާސް ވުމުން، އޭނާ މިދިޔަ ބުރާސްފަތި ދުވަހު ވަނީ އެމަޤާމުން އިސްތިއުފާ ދެއްވާފައެވެ.
ނަމަވެސް އެކޮމިޝަންގެ މުވައްޒަފުން ބުނެފައި ވަނީ ޖިންސީ ފުރައްސާރަ ކުރުމަކީ އެކޮމިޝަންގައި ސަގާފަތެއްހެން ކުރަމުން އައިސްފައިވާ ކަމެއް ކަމަށެވެ.
މިކަމާއި ގުޅޭގޮތުން އޮންލައިން ނޫސް "މިހާރު" އަށް މައުލޫމާތު ދެމުން އެކޮމިޓީގެ މެންބަރަކު ވިދާޅުވެފައި ވަނީ ކޮމިޝަނުގެ ބައެއް މެމްބަރުންގެ ފަރާތުން ކުރިއްސުރެ ވެސް މުވައްޒަފުންނަށް ގޯނާތައް ކުރިމަތިވެފައިވާ ކަމަށާއި އެގޮތުން، ކުރީގެ މެންބަރެއްގެ ފަރާތުން ކުރިމަތިވި އެ ފަދަ ގޯނާތަކުގެ ސަބަބުން މުވައްޒަފަކު އަމިއްލައަށް މަރުވާން މަސައްކަތް ކުރި ކަމަށް، އީސީގެ މެމްބަރަކު މަޖިލީހުގައި ވިދާޅުވި ކަމަށެވެ.
"މިއީ ކުރިއްސުރެ ހިނގަމުން އަންނަ ބޮޑެތި މައްސަލަތަކެއް. އެކަމަކު މި މައްސަލަތަކެއް ނުބެލޭ،" މެންބަރު ވިދާޅުވެފައިވެއެވެ.
ޖިންސީ ފުރައްސާރައިގެ މައްސަލަތައް ކިތަންމެ ގިނަ ކަމަށް ބުނެފައިވީ ނަމަވެސް މިހާތަނަށް މިނިވަން މުއައްސަސާތަކާބެހޭ ކޮމިޓީއަށް ހުށަހަޅާފައި ވަނީ އަކުރަމްގެ މައްސަލަ އެކަންޏެވެ.
